ސަރުކާރުގެ އިގްތުސާދީ ސިޔާސަތު ފެއިލްވެ، ހިންގުމުގެ ނިޒާމު ކަންފަތި ވެގެންދާ ކޮންމެ ފަހަރަކު، ރައީސް ޔާމިނަށް ކުރާކަމަށާއި، އެހެންނަމަވެސް މިބީދައިން ރައީސް ޔާމިނަށް އަނިޔާކުރުން ހުއްޓާލުމަށް ރައްޔިތުންގެ މަޖިލިހުގެ ދިއްދޫ ދާއިރާގެ ކުރީގެ މެމްބަރު އަބުދުއްލަތީފު މުހައްމަދު ސަރުކާރަށް ގޮވާ ލައްވައިފިއެވެ.

ރައީސް ޔާމިންގެ މައްޗަށް މިހާރުގެ ކުރިމިނަލް ކޯޓުގައި ކުރިޔަށްދާ މައްސަލަތަކަށް އިޝާރާތް ކުރައްވާ ލަތީފް ވިދާޅުވެފައިވަނީ، ސަރުކާރުގެ އިގްތިސާދީ ސިޔާސަތު ފެއިލްވެ، ހިންގުމުގެ ނިޒާމުގެ ސޯބުތައް ކަންފަތިވެ، ރައްޔިތުންގެ ކުރިމަތީގައި ފަޟީހަތްވާ ކޮންމެ ފަހަރަކު ތަރައްގީގެ ބާނީ ރައީސް ޔާމީނަށް ކުރާ އަނިޔާ ހުއްޓާލުމަށް އިލްތިމާސް ކުރާ ކަމުގައެވެ.

ސަރުކާރުގެ އިގްތިސާދީ ސިޔާސަތު ފެއިލްވެ، ހިންގުމުގެ ނިޒާމުގެ ސޯބުތައް ކަންފަތިވެ، ރައްޔިތުންގެ ކުރިމަތީގައި ފަޟީހަތްވާ ކޮންމެ ފަހަރަކު ތަރައްގީގެ ބާނީ ރައީސް ޔާމީނަށް ކުރާ އަނިޔާ ހުއްޓާލުމަށް އިލްތިމާސް ކުރަން

— Abdul Latheef (@funamalatheef) December 7, 2021

ރައީސް ޔާމީންގެ މައްޗަށް މިހާރު ހިންގެ ޝަރީއަތްތަކަކީ، މިސަރުކާރުން އެމަނިކްފާނަށް ކުރާ އަނިޔާއެއްގެ ގޮތުގައި ލަތީފް ސިފަ ކުރައްވާފައިވާއިރު، ޔާމީން މައްޗަށް އުފުލާފައިވާ ދަޢުވާތަކުގެ ޝަރީއަތްތައް ނިމެންދެން ޕާސްޕޯޓް ހިފެހެއްޓުމުގެ އަމުރެއް ކްރިމިނަލް ކޯޓުން އިއްޔެވަނީ ނުދީފައެވެ.

އެމްއެމްޕީއާރުސީން ރިސޯޓެއްގެ ގޮތުގައި ތަރައްޤީ ކުރުމަށް ދޫކުރި ރ. ފުއްގިރިއާއި ވ. އާރަށް ކުއްޔަށް ދޫކުރުމުގެ މުއާމަލާތާއި ގުޅިގެން ރައީސް ޔާމިންގެ މައްޗަށް ވަނީ މަނީ ލޯންޑަރިންގެ ކުށުގެ ދަޢުވާއާއި ރިޝްވަތުގެ ހިފުމުގެ ދައުވާ އުފުލާފައެވެ. އިއްޔެގެ އަޑު އެހުމަކީ ރައީސް ޔާމީންގެ ޝަރީއަތް ނިމެންދެން ޕާސްޕޯޓް ހިފެހެއްޓުމަށް އެދި ދައުލަތުން އުފުލި މައްސަލައިގެ އަޑު އެހުމެކެވެ.

18ވަނަ ރައްޔިތުންގެ މަޖިލިހުގައި ދިއްދޫ ދާއުރާގެ މެމްބަރުކަން ކުރެއްވި ލަތީފަކީ ރައީސް ޔާމިންގެ ވެރިކަމުގައި ގޮޑި ގެއްލުނުކަމަށް އޭރުގެ ސުޕްރީމް ކޯޓުން ނިންމި 12 މެމްބަރުންގެ ތެރޭގައި ހިމެނޭ ބޭފުޅެކެވެ. އަދި އޭރު ލަތީފްވަނީ ވަނީ ރައީސް ޔާމިންގެ ސަރުކާރާ ދެކޮޅަށް ވަރަށް ބޮޑަށް މަސައްކަތްވެސް ކުރައްވާފައެވެ.

އެހެންނަމަވެސް، މި ސަރުކާރު ވެރިކަމަށް އައުމަށް ކުރި ކެމްޕޭނުގައިވެސް ބައިވެރިވެ ވަޑައިގެންނެވި ލަތީފް މިހާރު މަސައްކަތް ކުރައްވަމުން ގެންދަވަނީ މިސަރުކާރާ ދެކޮޅަށެވެ. އަދި މީގެއިތުރުން ލަތީފް ފާހަގަވެގެން ގޮސްފައިވަނީ ރައީސް ޔާމިން މިނިވަން ކުރުމަށް ވަރަށް ބޮޑަށް އަޑު އުފުއްލެވި، އަދި ސަރުކާރާ ދެކޮޅަށް ކުރެވޭ މުޒާހިރާތަކުގެވެސް އިސްސަފުގައި ހަރަކާތްތެރިވާ ބޭފުޅެއްގެ ގޮތުގައެވެ.

މި ސަރުކާރު ވެރިކަމަށް ގެނައުމަށް މައްސަަކަތް ކުރި 12 މެމްބަރުން ވިދާޅުވެފައިވަނީ، އެ 12 މެމްބަރުންނަށް 2019ގެ މަޖިލިސް ކެމްޕޭނުގައި އެމެމްބަރުންގެ ދާއިރާތައް ޚާއްސަ ކޮށްދެއްވާނެކަމަށް އޭރުގެ ކޯލިޝަންނުން ވީވައުދު ފުއްދުމުގައި އެންމެ ބޮޑަށް ހުރަސް އެޅުއްވީ ބޭފުޅަކީ ރައީސް ނަޝީދު ކަމުގައެވެ. އަދި އެއަށްފަހު ލަތީފް ގެންދަވަނީ ވަރަށް ބޮޑަށް ރައީސް ނަޝީދަށް ފާޑު ވިދާޅުވަމުން ކަންވެސް ފާހަގަ ކޮށްލެވެއެވެ.