ޔުނައިޓެޑް އަރަބި އެމިރޭޓްސްގައި މަސްތުވާތަކެއްޗާއި ދެކޮޅަށް ހަދާފައިވާ ގާނޫނުތަކުން ދޭ އަބަދަބުތަކަށް އެގައުމުން ބޮޑެތި ލުއިތަކެއް ދީފިއެވެ. މިގޮތުން، މަސްތުވާ ބާވަތެއް ކަމުގައިވާ ކެނެބިސްގައި ހިމެނޭ އެންމެ ބާރުގަދަ އެއް މާއްދާކަމަށްވާ ޓެޓްރާހައިޑްރޯކެނަބިނޯލް (THC) ހިމެނޭ ތަކެތި ޔޫއޭއީއަށް އެތެރެ ކޮށްގެން ދޭން ގާނޫނުގައި ކަނޑައަޅާފައި އޮންނަ އަދަބުތަކަށް ވަނީ ބޮޑެތި ލުއިތަކެއް ދީފައެވެ.
ޓެޓްރާހައިޑްރޯކެނަބިނޯލް (THC)އަކީ ކެނެބިސްގައި ހިމެނޭ މަސްތުވުމަށް ބޭނުން ކުރާ މައިގަޑު އެއް ކެމިކަލްއެވެ.
ޔޫއޭއީގައި އާދީއްތަ ދުވަހު އެގައުމުގެ ގެޒެޓްގައި އާންމު ކޮށްފައިވާ ގާނޫނުގައިވާ ގޮތުން، ކެނެބިސް ހިމެނޭ ކާބޯ ތަކެއްޗާއި، ބޯ އެއްޗިއްސާއި އަދި އެހެނިހެން އައިޓަމްތައްވެސް އެތެރެކޮށްގެން، އެއީ އެތެރެކުރި ފުރަތަމަ ފަހަރު ކަމަށްވާނަމަ، އެތެރެކުރި ފަރާތެއް ޖަލަކަށް ނުލާނެއެވެ.
އޭގެ ބަދަލުގައި އެގައުމުގެ އޮތޯރިޓީން އެތެރެކުރި ތަކެތި ހިފައްޓާ ތަކެތި ނައްތާލާނެއެވެ.
ޔޫއޭއީގައި މަސްތުވާތަކެއްޗާބެހޭ ގާނޫނުން މި ދިން ލުއި ފާހަގަވެގެން ދަނީ، އާންމު މަސްތުވާތަކެއްޗާއި، ކެނެބިސްއިން ފެށިގެން ގޮސް އާންމުކޮށް ގަންނަން ހުންނަ ބޭސްތަކުގައި ހިމެނޭ މަސްތާ ބާވަތެއް ކަމުގައިވާ ނާކޮޓިކްސް ފަދަ އަދި ހޭނައްތާ ބޭސްތައްވެސް އެތެރެކުރުން ދުނިޔޭގައި އެންމެ ބޮޑަށް ހިފެހެއްޓިފައި އޮތް އެއް ގައުމު ކަމުގައިވާ ޔޫއޭއީއަށް ގެނައި ފާހަގަ ކޮށްލެވޭ ބޮޑު ބަދަލެއްގެ ގޮތުގައެވެ.
ޔޫއޭއީއަކީ މިހާތަނަށް މަސްތުވާ ބާވަތްތައް އެގައުމުގައި އެތެރެކުރުމާއި ވިއްކުންވެސް މަނާ ކޮށްފައި އޮތް ގައުމުކެވެ. އަދި މަސްތުވާތަކެތި ބޭނުން ކޮށްފިނަމަ 4 އަހަރަށް އެގައުމުގައި ޖަލަށް ލެވެއެވެ.
މަސްތުވާތަކެއްޗާބެހޭ ގާނޫނުން އިތުރަށް ދިން ލުއިތަކުގެ ތެރޭގައި، މަސްތުވާތަކެތީގެ ކުށުގައި ފުރަތަމަ ފަހަރަށް ޖަލަށްލެވޭ އެންމެ މަދު މިންވަރު ކަމުގައިވާ ދެ އަހަރު 3 މަހަށް ބަދަލު ކުރުމާއި، ޑިޓެންޝަން ސެންޓަރުތަކުގައި އެހެން ކުށްވެރިންނާއި ވަކިން ބައިތިއްބައިގެން ފަރުވާދިނުން ހިމެނެއެވެ.
ޔޫއޭއީގައި މަސްތުވާތަކެތި ބޭނުން ކުރާ ބޭރު ގައުމުތަކުގެ ރައްޔިތުންނާމެދު އަމަލް ކުރަމުން އައި ގޮތަކީ، ޖަލުގެ މުއްދަތު ހަމަވުމަށްފަހު ޑީޕޯޓު ކުރުމެވެ. އެހެންނަމަވެސް ގާނޫނުން ދީފައިވާ ލުއިތަކުގެ ތެރޭގައި، ޔޫއޭއީގައި މަސްތުވާތަކެތި ބޭނުންކުރާ، ގައުމުން ބޭރުގެ މީހުންނާއި މެދު އަމަލްކުރާނެ އުސޫލުވަނީ ގާޒީއަށް ދޫ ކޮށްލާފައެވެ.
ޔޫއޭއީން މަސްތުވާތަކެއްޗާބެހޭ ގާނޫނަށް މިގެނައި ބަދަލުތަކަކީ، އެގައުމު އުފެދުނުތާ 50 އަހަރު ފުރުން ފާހަކުރުމުގެ ގޮތުން، އެގައުމުގެ ގާނޫނީ އޮނިގަޑަށް ގެންނަމުންދާ އިސްލާހުގެދަށުން، ޔޫއޭއީއަކީ، ދުނިޔޭގެ އެކި ގައުމުތަކުގެ މީހުންނަށް މަރުހަބާ ކިޔާ ގައުމެއްގެ ގޮތުގައި ދެއްކުމުގެ އިތުރުން، ފަތުރުވެރިންނާއި އިންވެސްޓަރުންގެ ޝައުގުވެރިކަން އިތުރު ކުރުވުމެވެ.
އިސްކާމިކް ޝަރީޢާގެ މައްޗަށް ބިނާވެފައޮތް ޔޫއޭއީގެ ގާނޫނުލް އުގޫބާތުގެ ދަށުން، އެތައް އަހަރެއްވަންދެންވަނީ، އެގައުމަށް ޒިޔާރަތް ކުރާ ފަތުރުވެރިންނާއި، އަދި އެގައުމުގައި ދިރިއުޅޭ ގައުމުން ބޭރުގެ ރައްޔިތުން، އެހެން ބައެއް ގައުމުތަކުގައި ކުށެއްކަމަށް ނުބަލާ އާދައިގެ ގިނަ ކަންކަމުގައި ޖަލަށްލަމުން ގޮސްފައެވެ.
