ލޯކަލް ޓޫރިޒަމްގެ ނަމުގައި ކ.މާފުށި ވަނީ ހަލާކުވެފައިކަމަށާއި، ލޯކަލް ޓޫރިޒަމް ޤަވާއިދު ތަންފީޒް ނުކުރެވޭކަމަށް ވިދާޅުވެ ދީނީ ޢިލްމުވެރިޔާ ޢަލީ ޒައިދު ފާޑުވިދާޅުވެއްޖެއެވެ.
މާފުއްޓަކީ ރާއްޖޭގައި އެންމެ ފުޅާ ދާއިރާއެއްގައި ލޯކަލް ޓޫރިޒަމް ހިންގަމުން އަންނަ ރަށެވެ.
ޢަލީ ޒައިދު ވިދާޅުވީ ލޯކަލް ޓޫރިޒަމްގެ ނަމުހައި މާފުށި ވަނީ ހަލާކުވެފައިކަމަށާއި، ނޭދެވޭ މަންޒަރުތައް ފެނިވަޑައިގަތްކަމަށެވެ. ލޯކަލް ޓުއަރިޒަމްގެ ޤަވާޢިދުތައް ތަންފީޒް ނުކުރެވޭކަމަށާއި، އެކަންކުރެވޭނަމަވެސް ކޮންމެވެސް ވަރެއްވީސްކަމަށް އޭނާ ވިދާޅުވިއެވެ. ޒައިދު ވަނީ ޑޮލަރުހިފައިގެން ކައްވަޅަކަށް ނުދެވޭނެކަމަށް ހާމަކުރައްވާ ފާޑުވިދާޅުވެފައެވެ.
އިހަށް ދުވަހު އަޅުގަނޑު ކ.މާފުށްޓަށް ޒިޔާރާތްކުރިން! ލޯކަލްޓުއަރިޒަމްގެ ނަމުގައި ރަށެއްއެއޮތީ ހަލާކުކޮށްލާފަ! ނޭދެވޭ މަންޒަރުތައްދުށިން! ލޯކަލް ޓުއަރިޒަމްގެ ޤަވާޢިދުތައް އިމްޕްލިމެންޓެއް ނުކުރެވޭ! އެކަންކުރެވޭނަމަވެސް ކޮންމެވެސް ވަރެއްވީސް! ޑޮލަރުހިފައިގެން ކައްވަޅަކަށް ނުދެވޭނެ!
— Ali Zaid (@alizaid1000) November 26, 2021
މުޅި ރާއްޖެއަށް ބަލާއިރުވެސް، އެންމެ ބޮޑަށް ރަށު ފަތުރުވެރިކަމުގެ ވިޔަފާރި ރާއްޖޭގައި ކުރާ އެއް ރަށަކީ މާލެ އަތޮޅު މާފުއްޓެވެ. މާފުއްޓަކީ ލޯކަލް ޓުއަރިޒަމްގެ ޚިދުމަތް އެންމެ ފުރަތަމަ ރާއްޖޭގައި ފެށި ރަށްވެސްމެއެވެ. މިހާރުވެސް އެރަށުގައި 34 ގެސްޓްހައުސް ހިންގަމުން އާދެއެވެ. ބެޑް ކެޕޭސިޓީއަކީ 1600އިން މައްޗެވެ.
ސަރުކާރުން އަންނަނީ އަންނަ ޖެނުއަރީ މަހުގެ 1 ގައި ހޯމް ސްޓޭ ޓުރިޒަމް ފެށުމަށްވެސް ތައްޔާރުވަމުންނެވެ. އެއީ މީހުން ދިރިއުޅޭ ގޭގޭގައި ފަތުރުވެރިން ބޭތިއްބުމަށް ހިންގާ މަޝްރޫޢުއެކެވެ. އެންމެ ފުރަތަމަ ހޯމް ސްޓޭ ޓުރިޒަމް ފެށުމަށް ހަމަޖެހިފައިވަނީ މ.ދިއްގަރުގައި ރިހާކުރު އައިލެންޑްގެ ގޮތުގައެވެ.
ކޮމެންޓު ފޮނުވާ