މާލެ އަތޮޅު މާފުށީގައި އިސްލާމް ދީނާއި ބީރައްޓެހި ދީނުގެ އަސާސްތަކާއި މުޖުތަމައުގެ ރީތި އާދަކާދަތަކާއި މުޅިން ހިލާފުކަންކަން ކުރިޔަށް ގެންދާތީ އެރަށު ކައުންސިލުން ކަންބޮޑުވުން ފާޅުކޮށް، އެފަދަ އަމަލު ހިންގާ ފަރާތްތަކާއިމެދު ފިޔަވަޅު އަޅާނެ ކަމުގެ އިންޒާރު ދީފިއެވެ.
ފުޅާ ދާއިރާއެއްގައި ގެސްޓްހައުސް ވިޔަފާރި ކުރަމުންދާ މާފުއްޓަކީ ދުވާލެއްގެ މައްޗަށް ގިނަ އަދަދެއްގެ ގެސްޓުން ޒިޔާރަތްކުރާ ރަށެކެވެ. އަދި އެރަށުގެ އާމްދަނީގެ ބޮޑު ހިއްސާއެއްވެސް އަދާކުރަނީ ލޯކަލް ޓުވަރިޒަމުން ލިބޭ އާމްދަނީއެއްގެ މައްޗަށެވެ.
މާފުށީ ކައުންސިލުން ނެރުނު އިއުލާނެއްގައި ބުނީ ކައުންސިލުން ކުއްޔަށް ދޫކޮށްފައިވާ ބިންތަކުގައި އެއްބަސްވުމާއި ހިލާފު އަމަލުތައް ހިންގަމުން ގެންދާ ކަމަށެވެ. އެއްބަސްވުމުގައި ޣައިރު ޤާނޫނީ އެއްވެސް މަސައްކަތެއް ނުވަތަ އެކަށީގެންނުވާ، ބޭއަދަބީ އެއްވެސް ބޭނުމަކަށް ބިން ބޭނުންކޮށްގެން ނުވާނެ ކަމަށް ބަޔާންކޮށްފައި އޮތްނަމަވެސް ކަންކަން ހިނގަނީ އެހެން ނޫންކަމަށް ކައުންސިލުން ބުނެއެވެ.
ގިނަ ބިންތަކުގައި ދިވެހިރާއްޖޭގެ ޤާނޫނާއި ގަވާއިދުތަކާއި ޚިލާފަށް އިސްލާމީ މުޖުތަމައެއްގައި ކުރުމަށް ބަލައި ނުގަނެވޭނެފަދަ އަމަލުތައް ހިންގަމުން އަންނަކަމުގެ ޝަކުވާ ރަށުގެ އާންމު ރައްޔިތުންގެ ފަރާތުންލިބި، ކައުންސިލަށްވެސް ވަނީ ފާހަގަކުރެވިފައި ކަމަށް ކައުންސިލުން ބުނެއެވެ.
ގިނަ ބިންތަކުގައި ދިވެހިރާއްޖޭގެ ޤާނޫނާއި ގަވާއިދުތަކާއި ޚިލާފަށް އިސްލާމީ މުޖުތަމައެއްގައި ކުރުމަށް ބަލައި ނުގަނެވޭނެފަދަ އަމަލުތައް ހިންގަމުން އަންނަކަމުގެ ޝަކުވާ ރައްޔިތުންގެ ފަރާތުން ލިބޭކަން ހާމަކޮށް އިތުރަށް އެ ބަޔާނުގައި ބުނެފައިވަނީ ނަމާދު ގަޑި ތަކުގަޔާއި ރޭގަނޑު 00:00 ގެ ފަހުން އަޑުގަދަކޮށް ބާރަށް ލަވަ ޖަހާ މައްސަލައާއި، ކައުންސިލްގެ ހުއްދަ ނެތި ބިންތަކާއި އިންވެގެންވާ މަގުތައް ބަންދުކޮށް އެތަނުގައި ދިވެހިރާއްޖޭގެ ޤާނޫނާއި ގަވާއިދުތަކާއި، އިސްލާމް ދީނާއި ދިވެހި ޘަޤާފަތަށް ފުށުއަރާފަދަ ޣައިރު މުސްލިމުންގެ ނުވަތަ ބޭރު ޤައުމުތަކުގެ ދީނާއި ގުޅޭ ދުވަސްތައް ފާހަގަކުރުމާއި، އިސްލާމީ ރިވެތި އަޙްލާޤުގެ ބޭރުން އަމަލުކުރަމުން އަންނަކަން ކައުންސިލްގެ ސަމާލުކަމަށް އައިސްފައިވާ ކަމަށެވެ.
މާފުށީ ކައުންސިލުން ބުނީ ބިންތައް ކުއްޔަށް ދީފައިވާ އެއްބަސްވުމާއި ޚިލާފަށް ބިންތަކުގައި ކުރިއަށްގެންދާ ޚަރަކާތްތައް ހުއްޓާލުމަށާއި، ބިން ދޫކޮށްފައިވާ ބޭނުންފިޔަވައި އެހެން ބޭނުމެއް ބިމުގައި ކުރަންވާނީ މިކައުންސިލަށް ލިޔުމުން ހުށަހަޅައި ލިޔުމުން ހުއްދަ ހޯދައިގެންކަމަށް އިޢުތިމާސްކޮށް ނަސޭޙަތްތެރިވާ ކަމަށެވެ. މިނޫން ގޮތަކަށް ބިންތަށް ބޭނުންކުރާނަމަ އެއްބަސްވުމުގެ 11 ވަނަ މާއްދާއިން ކައުންސިލަށް ލިބިދޭ ބާރުގެ ދަށުން އެއްބަސްވުން ބާތިލްކުރާނެކަމަށް ވެސް އިއުލާނުގައި ބުނެފައި ވެއެވެ.
ކޮމެންޓު ފޮނުވާ