މިއަދަކީ މީގެ 33 އަހަރުކުރިން ދިވެހިރާއްޖޭގެ މިނިވަންކަން ނަގާލަން، ދިވެހި ޚާއިނުންގެ މަދުބަޔަކާއި، ބޭރުގެ ކުލީ ޓެރަރިސްޓުންގެ ބަޔަކު ދިން ޢުދުވާނީ ޙަމަލާގައި ޝަހީދުވި އަބުތާލުން ފަސްދާނުލާފައިވާ ސަރަހައްދު ސާފުކޮށް، ނަންބޯޑުތައް ހަރުކޮށްފިއެވެ.
3 ނޮވެމްބަރު 1988 ގައި ޝަހީދުވި 19 ޝަހީދުން ފަސްދާނު ލެވުނީ ހެންވޭރު ސަހަރާގައެވެ. ޝަހީދުން ވަޅުލާފައިވާ ސަރަހައްދު ސާފުކޮށް މަހާނަތައް ވަކިން އެގޭނެހެން މާލެ ސިޓީ ކައުންސިލުން ވަނީ ސަރަހައްދު ވަކި ކޮށްފައެވެ. އެތައް އަހަރެއް ވަންދެން މިތަން ސާފުނުކޮށް ހުރުމުން ކުނިތައް ގިނަވެ ހުރީ ވަރަށް ބޮޑަށް ހަޑިވެފައެވެ. ނަމަވެސް ސިޓީ ކައުންސިލުން ވަނީ ކުނިތައް ނަގައި އަލުން ކުލަލައި ނަންބޯޑުވެސް ހަރުކޮށްފައެވެ.
— Dr Mohamed Muizzu (@MMuizzu) November 3, 2021
މާލެ ސިޓީ ކައުންސިލުން ވަނީ މިއަދާއި ދިމާކޮށް މާލޭގެ ބޮޑެތި މަގުތަކުގައި ޤައުމީ ދިދަވެސް ޖަހާފައެވެ. ސިޓީ ކައުންސިލްގެ މޭޔަރު ޑރ.މުއިއްޒު ވިދާޅުވީ ނަސްރުގެ ދުވަސް ފަނޑުވާނޭހެން އެއްވެސް ބަޔަކު މަސައްކަތް ކޮށްގެން ނުވާނެކަމަށެވެ. އަދި ސަރުކާރުން ނޭންގި ނަމަވެސް މުޅި މާލޭގައި ސިޓީ ކައުންސިލުން ދިދަ ބަހައްޓާނެކަމަށެވެ.
ސަރުކާރުން އެދިފައިނުވިނަމަވެސް، މާލެ ސިޓީ ކައުންސިލުން ނަސްރުގެ ދުވަހުގެ މުނާސަބަތުގައި މާލޭގެ މަގުމަތީގައި ދިދަޖެހުން. ސަރުކާރުން އެދިފައިވަނީ ޖުމްހޫރީ ދުވަހު އެކަނި ދިދަޖަހަން. ނަސްރުގެ ދުވަހުގެ މުހިއްމުކަން ފަނޑުވިޔަ ނުދިނުމަށް އެންމެހާ ފަރާތްތަކަށް އިލްތިމާސްކުރަން. pic.twitter.com/KWU4Gmvhqk
— Dr Mohamed Muizzu (@MMuizzu) November 3, 2021
އެދުވަހު 18 ވަރަކަށް ގަޑިއިރު ވަންދެން ރާއްޖޭގެ ވެރިރަށް މާލެ، ދިވެހި ޤައުމަށް ޣައްދާރުވި އަދާވާތްތެރިންގެ ބާރުގެ ދަށަށް ގެންދިޔައެވެ. ހަތިޔާރާއެކު ދިވެހި ސިފައިންގެ މައި މަރުކަޒަށް ޙަމަލާދެމުން ގެންދިޔައެވެ. މި ޙަމަލާތަކުން ދިވެހި ޤައުމާއި ރައްޔިތުންގެ ދިފާޢުގައި ނިކުތް ސިފައިންގެ 8 ބޭފުޅަކު ބާޣީންގެ ޙަމަލާތަކުގެ ޝިކާރައަކަށްވެ ޝަހީދުވެގެންދިޔައެވެ. އަދި ޢާންމުންގެ ތެރެއިން ޝަހީދުކޮށްލި 11 މީހުންނާއެކު ޖުމްލަ 19 މީހުން މި ޢުދުވާނީ ޙަމަލާގައި ވަނީ ޝަހީދުކޮށްލާފައެވެ.
ނޮވެމްބަރު 3 ވަނަ ދުވަހުގެ ޢުދުވާނާ ގުޅިގެން އޭރުގެ ރައީސުލްޖުމްހޫރިއްޔާ އަލްއުސްތާޛް މައުމޫން ޢަބްދުލްޤައްޔޫމާއި ސިފައިންގެ އިސްވެރިން، ދިވެހިރާއްޖެ މިއުދުވާނުން ދިފާޢުކުރެއްވުމަށްޓަކައި ބޭރުގެ ޤައުމުތަކުގެ އެހީތެރިކަމަށް އެދިވަޑައިގެންނެވިއެވެ. ދިވެހި ސަރުކާރުން އެހީއަށް އެދުނު ގައުމުތަކުގެ ތެރެއިން އެންމެ އަވަހަށް ރާއްޖެއަށް އެހީ ފޯރުކޮށްދެވުނީ އަވައްޓެރި އިންޑިއާއަށެވެ.
ކުލީސިފައިންގެ ހަމަލާ މާލެއަށް ދޭންފެށިތާ ގާތްގަޑަކަށް 17 ވަރަކަށް ގަޑިއިރުގެ ތެރޭގައި އިންޑިޔާ ސިފައިންގެ 1600 އެއްހާ މީހުން ކަނޑާއި ވައިގެ މަގުން ރާއްޖެ އައިސް ޙަރަކާތްތެރިވާން ފެށިއެވެ. އިންޑިއާ ސިފައިންނަށް ރާއްޖެ އާދެވުނުއިރު ދިވެހި ސިފައިންނާއި، ކުލީ ސިފައިންނާ ދެމެދު ޙަމަލާތައް ބަދަލު ކުރެވި ހަނގުރާމަ އޮތީ މައިތިރިވެފައެވެ. އޭރު ދިވެހި ސިފައިންގެ މަސައްކަތްކުން ކުލީ ސިފައިންގެ އެތައް ބަޔަކު ވަނީ މަރާލާފައެވެ.
