ބިލިއަނަރ ބިލް ގޭޓްސްއަށްފަހު، އޭނާގެ މަގާމަށް ވަޑައިގަންނަވަން ތައްޔާރަށް ހުންނެވި، އޭނާގެ ދޮށީ އަންހެން ދަރިފުޅު، ޖެނިފަރ ގޭޓްސް، މިސްރުގެ ރައްޔިތެއް ކަމުގައިވާ ނަޔެލް ނާސިރު އާއި އިސްލާމީ ސަގާފަތާ އެއްގޮތަށް ބޭއްވުނު ހަފްލާއެއްގައި ކައިވެނި ބައްލަވައިގަތުމަށްފަހު، އަގުބޮޑު ކައިވެނީގެ ހަފްލާގެ ފޮޓޯތައް އާންމު ކޮށްފިއެވެ.

ބިލް ގޭޓްސްގެ ދޮށީ އަންހެން ދަރިފުޅު، ޖެނިފަރ ގޭޓްސް ކައިވެނި ބައްލަވައިގެންނެވި، ނަޔެލް ނާސިރުއަކީ އަސްދުއްވުމަށް ކުޅަދާނަ މީހެކެވެ.

މި ދެ ލޯބިވެރިން އެމީހުންގެ ކައިވެނި ހަފްލާ ބާއްވާފައިވަނީ، އެމެރިކާގެ ނިއުޔޯކުގެ ވެސްޓްޗެސްޓަރގެ އަމިއްލަ ބިމެއްގައި، މިމަހުގެ 16ވަނަ ދުވަހުއެވެ.

މި ހަފްލާގައި ގޭޓްސް ވެޑިންގެ ޑްރެސްއެއްގެ ގޮތުގައި ލައިގެން ހުންނެވީ އެމެެރިކާގެ މަޝްހޫރު ޑިސައިނަރ އެއްކަމުގައިވާ ވޭރާ ވޭންގެ ޑިޒައިންގެ ހެދުމުކެވެ. އަދި ނާސިރު ހުންނެވީ ކްލެސިކް އަރުމާނީ ސްޓައިލުގެ ހެދުމެއްގައެވެ.

ދެލޯބިވެރިންގެ ކައިވެނީގެ ރަސްމިއްޔާތު ފެށިގެންދިޔައީ އޮކްޓޯބަރު މަހުގެ 15ވަނަ ދުވަހުގެ ހަވީރު އިސްލާމީ ސަގާފަތާ އެއްގޮތަށް ބޭއްވުނު ރަސްމިއްޔާތަކަށް ފަހުއެވެ. މި ރަސްމިއްޔާތުގައި ބައިވެރި ވެފައިވަނީ ދެ ލޯބިވެރިންގެ އެންމެ ގާތް އާއިލީ މީހުން އެކަންޏެެވެ.

"އަހަރެމެންގެ އެންމެ މުހިން ހަފްލާ ބޭއްވިގެން ދިޔައީ ހޮނިހިރު ދުވަހު ހަވީރު. އެއީ ވަރަށް ރީތި ދުވަހެއް، ވާރޭ ވެހެން ފެށުމުގެ ކުރިން އަހަރެމެން ހުރިހާ ފޮޓޯއެއް ނަގާ ނިންމާލިން. ކައިވެނި ކޮށްދިނީ ވަރަށް ދުވަސްވީ އާއިލީ ރަހުމަތްތެރިއެއް، އަދި އަހަރެމެން ދެމީހުން ކައިވެނީގެ އަހުދު ނާމާގައި ސޮއިކުރިން،" ގޭޓްސް އެމެރިކާގެ ވޯގު މެޒިންއާއި ވާހަކަ ދައްކަމުން ވިދާޅުވެފައި ވެއެވެ.

"އެއީ ވަރަށް ޚާއްސަ ވަގުތު ކޮޅެއް."

"އަހަރެން މެޑިކަލް ސްކޫލުގައި ކިޔަވަމުން އަދި ނަޔެލް އޮލިމްޕިކްސްއަށް ތައްޔާރުވަމުން، ކައިވެނީގެ ހަފްލާއަށް ތައްޔާރު ވުމަކީ ފަސޭހަކަމެއް ނޫން،" އެމެރިކާގެ ސްޓެންފޯޑުން ގްރޭޖުއޭޓް ވެފައިވާ ގޭޓް ވިދާޅުވެފައި ވެއެވެ.

"އެހެންނަމަވެސް، އަހަރެމެންގެ މިހާ މުހިންމު ދުވަހެއް، އެންމެ ގާތް މީހުންނާއެކީ ހިއްސާ ކޮށްލުމަކީ ކޮންމެހެންވެސް މުހިންމު ކަމެއް."

"އަހަރެމެންގެ މި އުއްމީދު ހަގީގަތަކަށް ހަދާ ދިނުމުގައި އަހަރެމެންނާއެކީ މަސައްކަތް ކޮށް، އަދި އެހީތެރިވެދިން އެންމެންނަށްވެސް އަހަރެމެން ޝުކުރުވެރި ވަން."

ހަފްލާއަށް ތައްޔާރުވަމުން ދިޔައިރު، އަހަރެމްނެ ދެމީހުންނަށް ލިބިގެންދިޔަ އެންމެ ބޮޑު ނަސޭހަތަކީ، މިހަފްލާއަކީ އަހަރެމެން ދެމީހުންނަށްޓަކާ އަދި އަހަރެމެން ދެމީހުން އެކަކު އަނެކަކު ދެކެވާ ލޯބީގެ އަގު ވަޒަންކުރުމުގެ ގޮތުން ބޭއްވޭ ހަފްލާއެއްކަން އަބަދުވެސް ހަދާން ބެހެއްޓުމުގެ ނަސޭހަތް. އަހަރެމެން މުޅި ހަފްލާއަށް ތައްޔާރުވަމުން ދިޔައިރުވެސް މިކަން ހަދާނުގައި ބެހެއްޓިން. އަދި އަހަރެމެން ޔަގީންކުރިން އަހަރެމެން ދެމީހުން އާއިލާވެސް ހިންހަމަ ޖެހިގެން މިހަފްލާގައި ބައިވެރިވާކަން ޔަގީން ކުރުމަށް،" ގޭޓްސް ވިދާޅުވެފައިވެއެވެ.