ސާފް ޗެންޕިއަންޝިޕްގައި އިންޑިއާތުން ބަލިވެ މުބާރާތާއި އަލްވަދާއު ކިޔަން ޖެހުނު ނަމަވެސް އާ ހިތްވަރާއިއެކު ޤައުމީ ޓީމު އަލުން ނިކުނާނެކަމީ ކަށަވަރުވާ ކަމެއްކަމުގައި ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
މެއި މަހުގެ 6 ވަނަ ދުވަހުގެރޭ ދިން ނުރައްކާތެރި ހަމަލާއަށްފަހު ރާއްޖެ ވަޑައިގެން ސާފް ޗެންޕިއަންޝީޕްގައި އިންޑިއާއި ރާއްޖެ މެޗު ބެއްލުވުމަށް ރައީސް ނަޝީދު ވަނީ ދަނޑަށް ވަޑައިގެންފައެވެ. މިމެޗު ބެއްލެވުމަށް ރައީސް ނަޝީދާއި ރައީސް ޞާލިހުގެ އިތުރުން ދައުލަތުގެ އިއްޒަތް ތެރިންނާއި، ވަޒީރުންނާއި، މަޖިލިސް މެމްބަރުންނާއި، ގިނަ އަދަދެއްގެ ސަޕޯޓަރުންވެސް ދަނޑަށް ވަދެފައިވެއެވެ.
ޓީމު ބަލިވުމުން ހިތްވަރު ދެއްވައި ރައީސް ނަޝީދު ކުރެއްވި ޓުވީޓުގައި ވިދާޅުވީ ނާކާމިޔާބީގައި ހިތްވަރު ގަދަ ކުރަންޖެހޭ ކަމަށެވެ. އަދި ޤައުމީ ޓީމު އަލުން އެނބުރި ހިތްވަރާއިއެކު އައިސް ކާމިޔާބު ހޯދާނެކަމީ ޝައްކު އުފެދޭ ކަމެއް ނޫންކަމަށް ރައީސް ނަޝީދު ވިދާޅުވިއެވެ.
ނާކާމިޔާބީގައި ހިއްވަރު ގަދަ ކުރައްވާ. ﷲގެ އިރާދަފުޅުން އާ ހިތްވަރާއިއެކު ޤައުމީ ފުޓުބޯޅަ ޓީމު އަލުން ނިކުންނާނެކަމީ އަޅުގަނޑުގަށް ކަށަވަރުކަމެއް.
– ރައީސް ނަޝީދު ވިދާޅުވިއެވެ.
މި މަހުގެ 1 ވަނަ ދުވަހުން ފެށިގެން 16 ވަނަ ދުވަހަށް ކުރިޔަށްދާ މި މުބާރާތުގައި ރޭ ކުޅުނު މި މެޗަކީ މި މުބާރާތުގެ ދިހަވަނަ މެޗެވެ. މި މެޗުގައި 3 ލަނޑު 1 ލަނޑުން ކުރިހޯދައި މެޗް ކާމިޔާބުކުރީ އިންޑިއާގެ ޓީމެވެ. މި ނަތީޖާއާއެކު އިންޑިއާގެ ޓީމު ވަނީ މުބާރާތުގެ ފައިނަލަށް ގޮސްފައެވެ. ރޭގެ މެޗުން ބަލިވުމުން ރާއްޖެ ވަނީ މުބާރާތުގެ ފައިނަލަށް ދިއުމަށް ކުރި އުންމީދު ފެނަށް ގޮސްފައެވެ.
މީގެ ކުރިން ރާއްޖެ ވަނީ ސާފް ޗެންޕިއަންޝިޕް 2 ފަހަރު ކާމިޔާބުކޮށްފައެވެ. އެއީ 2008 އަދި 2018 ވަނަ އަހަރު އެވެ.
