ރައްޔިތުންގެ މަޖިލީހުގެ ރައީސް ދިރިއުޅުއްވަން ދައުލަތުން ހަމަޖައްސަވާ ވަގުތީ ގެކޮޅު "މުރައިދޫގެ" މިމަހުގެ ނިޔަލަށް ނިމޭނެކަމަށް ޕްލޭނިން މިނިސްޓްރީން ބުނެފިއެވެ.
ރައްޔިތުންގެ މަޖިލީހުގެ ރައީސް މުޙައްމަދު ނަޝީދު އަވަހާރަކޮށްލުމަށް މެއި 6ގައި ދިން ޓެރަރިސްޓް ހަމަލާއައިގުޅިގެން ދައުލަތުގެ ވެރިންނަށް ދައުލަތުން ރަސްމީ ގެ ހަމަޖައްސައިދިނުމަށް ނިންމާ މަޖިލީހުގެ ރައީސްއަށާއި، އުއްތަމަ ފަނޑިޔާރަށް ގެ ހަމަޖައްސައިދިނުމުގެ މަސައްކަތް ދައުލަތުން ވަނީ ނިންމާފައެވެ. އެގޮތުން އެ ދެބޭފުޅުން ދިރިއުޅުއްވަން ގެ އެޅުމަށް ވަނީ ބިންވެސް ކަނޑައަޅާފައެވެ.
ނަމަވެސް އޭގެ ކުރިން ވަގުތީ ގެކޮޅެއްގެ ގޮތުން މަޖިލީހުގެ ރައީސް ދިރިއުޅުއްވަން މަރާމާތުކުރަމުންދަނީ މުރައިދޫގެއެގެ. އަދި އުއްތަމަ ފަނޑިޔާރު ދިރިއުޅުއްވަން ކަނޑައަޅާފައިވަނީ ކުރީގެ ނާއިބު ރައީސް ޢަބްދުﷲ ޖިހާދު ދިރިއުޅުއްވި ރެހެންދި ފްލެޓްއެވެ.
ޕްލޭނިން މިނިސްޓްރީން ބުނީ، ރައީސް ނަޝީދު ދިރއުޅުއްވަން ވަގުތީގޮތުން ހަމަޖައްސަވާ މުރައިދޫގެ މަރާމާތު ކުރުމުގެ މަސައްކަތް ކުރިއަށްދާކަމަށާއި، މިމަހުގެ ނިޔަލަށް ނިންމާލެވޭނެކަމަށެވެ.
މެއި 6ގެ ހަމަލާއަށްފަހު ބޭސްފަރުވާއަށް ރާއްޖެއިން ބޭރަށް ވަޑައިގެން އުޅުއްވުމަށްފަހު ފަސް މަސްދުވަސްފަހުން ރައީސް ނަޝީދު އިއްޔެ ވަނީ ރާއްޖެ ވަޑައިގެންފައެވެ. އަދި އެމަނިކުފާނުގެ ސެކިއުރިޓީ ވަނީ ވަރަށް ބޮޑަށް ވަރުގަދަކޮށްފައެވެ. ރައީސް ނަޝީދުގެ އަމިއްލަފުޅު ގެ ކެނެރީގޭގައި ސެކިއުރިޓީ ހަމަޖައްސަަވަން އުނދަގޫވާތީ، ރައީސް ނަޝީދު މިވަގުތު ހުންނަވަނީ ހޮޓެލް ޖެންގައެވެ.
