ފިލިޕީންސްގެ ރައީސް ރޮޑްރިގޯ ޑުޓާޓޭގެ އަންހެން ދަރިފުޅު ފިލިޕީންސްގެ ރައީސްކަމަށް ވާދަކުރައްވަން ނިންމަވާފައިވާ ކަމަށާއި، އަދި އޭނާގެ ނާއިބު ރައީސެއްގެ ގޮތުގައި ވާދަ ކުރައްވާނީ ޑުޓާޓޭގެ ޒަމާންވީ އެކުވެރިޔާ އަދި މިހާރުގެވެސް ނާއިބު ރައީސް ކަމަށް، ބައެއް މީޑިއާތަކުން ރިޕޯޓު ކޮށްފިއެވެ.

ސާރާ ޑުޓާޓޭ ކާޕިއޯއަކީ ފިލިޕީންސްގެ ތިންވަނައަށް އެންމެ ބޮޑު ސިޓީ ކަމުގައިވާ ޑަވާއޯގެ މިހާރުގެ މޭޔަރެވެ. އަދި އޭނާވަނީ މިހަފްތާގެ ހޮނިހިރު ދުވަހު، ޑަވާއޯގެ މޭޔަރުކަމަށް އަނެއްކާވެސް ކުރިމަތި ލެއްވުމަށް ފޯމު ހުށަހަޅުއްވާފައެވެ. މީގެކުރިން ޑުޓާޓޭ ކާޕިއޯވަނީ އަންނަ އަހަރު އޮންނަ އެގައުމުގެ ރިޔާސީ އިންތިޚާބުގައި ވާދަ ނުކުރައްވާނެ ކަމަށް ވިދާޅުވެފައެވެ.

ޑުޓާޓޭގެ އަންހެން ދަރިފުޅު ފިލިޕީންސްގެ ރައީސްކަމަށް ވާދަ ކުރައްވާނޭކަމަށް އޭބީއެސް-ސީބީއެން އިން ރިޕޯޓު ކޮށްފައިވަނީ، މިހާރުގެ ރައީސް ޑުޓާޓޭ އޭނާ ސިޔާސީ ކަންކަމުން ދުރަށް ޖެހިވަޑައިގަންނަވަން ނިންމަވާފައިވާކަން ހާމަ ކުރެއްވުމަށްފަހު، ހޮނިހިރު ދުވަހު މީޑިއާކަށް ދެއްވި އިންޓަވިއުއަކާ ހަވާލާދީއެވެ.

މިއިންޓަވިއު ޑުޓާޓޭ ދެއްވާފައިވަނީ، އޭނާގެ ޒަމާންވީ އެންމެ ގާތް އެކުވެރި، ފިލިޕީންސްގެ ސެނެޓަރ ކްރިސްޓޮފަ ބިންގ ގޯއާއެކީ އޭނާ ނައިބު ރައީސްކަމަށް ވާދަކުރެއްވުމަށް ފޯމު ހުށަހެޅުއްވުމަށް އޭނާއާއެކީ ވަޑައިގެން ހުންނަވައިގެންނެވެ.

މިއިންޓަވިވްގައި ނޫސްވެރިއަކު ޑުޓާޓޭއާ ސުވާލު ކޮށްފައިވަނީ، "މިފަހަރުގެ ޓިކެޓަކީ ސާރާ-ގޯ ތޯ؟،" މިހެން އައްސަވާފައެވެ. ޖަވާބުގައި ޑުޓާޓޭ ވިދާޅުވެފައިވަނީ، "މިފަހަރު ސާރާ-ގޯ،" މިހެންނެވެ.

ފިލިޕީންސްގެ ރައީސްގެ ވާހަކަ ފުޅު އިތުރަށް ޔަގީން ކުރުމަށް ސާރާ ޑުޓާޓޭ ކާޕިއޯގެ ތަރުޖަމާން ކްރިސްޓިއާނާ ގާސިއާ ފްރެސްކޯއާއި ރޮއިޓާސްއިން ސުވާލުކުރުމުން އޭނާ ވިދާޅުވެފައިވަނީ، "އަހަރެންނަށް ލިބިފައިވަނި ހަމަ ލޯކަލް މީޑިއާތަކުން ދޭ މައުލޫމާތު، އޭގެ މައްޗަށް އަހަރެންގެ އެއްވެސް ކޮމެންޓެއް ނެތް،" ކަމުގައެވެ.

އަންނަ ރިޔާސީ އިންތިޚާބުގައި ނައިބު ރައީސްކަމަށް ވާދަކުރެއްވުމަށް ފޯމު ހުށަހަޅުއްވާފައިވާ ގޯ ވަނީ މި ޚަބަރާ ގުޅޭގޮތުން އެއްވެސް ކޮމެންޓެއް ކުރެއްވުމަށް ދެކޮޅު ހައްދަވާފައެވެ.

ފިލިޕީންސްގެ ގާނޫނު އަސާސީ އޮތްގޮތުން، 6 އަހަރުގެ އެއްޓާމް ފުރިހަމަ ކުރުމާއެކު، ދެން އިތުރަަށް ފިޕިޕީންސްގެ ކުރިޔަށް އޮތް ދައުރަށް ވާދަކުރުމުގެ ފުރުސަތު ޑުޓާޓޭއަކަށް ލިބިގެނެއް ނުދާނެއެވެ.

މަސްރަހު ދިރާސާ ކުރާ ފަރާތްތަކުން މީގެ ކުރިންވެސް ވަނީ، ޑުޓާޓޭގެ އަންހެން ދަރިފުޅު ސާރާ ޑުޓާޓޭ ކާޕިއޯއަށް ރިޔާސީ އިންތިޚާބުގައި ވާދަކުރުމުގެ ފުރުސަތު އެންމެ ފަހުވަގުތު ޑުޓާޓޭ ދެއްވާނޭ ކަމުގައި އަންދާޒާ ކޮށްފައެވެ.

ފިލިޕީންސްގެ ޑަވައޯގެ މޭޔަރުކަން އޭނާގެ ބައްޕަ ޑުޓާޓޭއަށްފަހު މިހާރު އަދާ ކުރައްވަމުން ގެންދަވާ ޑުޓާޓޭ ކާޕިއޯ މީގެކުރިން ވިދާޅުވެފައިވަނީ، އޭނާގެ ބައްޕައާއި އޭނާއާއި ދެބޭފުޅުން އެއް ޓިކެޓެއްގައި ވާދަ ނުކުރެއްވުމަށް ނިންމަވާފައިވާތީ، އަންނަ އަހަރު ބޭއްވުމަށް ހަމަޖެހިފައިވާ ރިޔާސީ އިންތިޚާބުގައި ވާދަ ނުކުރެއްވުމަށް އޭނާ ނިންމަވާފައިވާ ކަމުގައެވެ.

ފިލިޕީންސްގެ ރިޔާސީ އިންތިޚާބު ބޭއްވުމަށް ހަމަޖެހިފައިވަނީ، އަންނަ އަހަރުގެ މޭމަހުއެވެ.

ޑުޓާޓޭގެ ވެރިކަމުގައި، ފިލިޕީންސްއިން ޑްރަގްގެ ވަބާ ނައްތާލުމަށް އޭނާ ގެންގުޅުއްވި ހަރުކަށި ސިޔާސަތުގެ ސަބަބުން ޑުޓާޓޭއަށް ވަނީ އެތައްބައެއްގެ ފާޑު ކިއުން އަމާޒުވެފައެވެ.

މިގޮތުން އޭނާ ކުރިޔަށް ގެންދެވި މި ކެމްޕޭނުގައި، އެއްވެސް ޝައީއަތަކާއި އަދި ތަހުގީގެއްވެސް ކުރުމެއްނެތި، އޭނާގެ އަމުރަށް ބަޑިޖަހާ ފިލިޕީންސްގެ އެތައްބަޔަކު މަރާލާފައިވާތީ، އިންސާނިއްޔަތާ ޚިލާފު ބޮޑެތި ޖަރީމާތަކެއް ހިންގުމުގެ ތުހުމަތު ބައިނަލް އަގުވާމީ ފަރާތްތަކުންވެސް ދަނީ އޭނާގެ މައްޗަށް ކުރަމުންނެވެ.