ދިވެހިރާއްޖޭގެ ރައްޔިތުންގެ މަޖިލިހަކީ ދައުލަތުގެ ތިން ބާރުގެ ތެރޭގައި ހިމެނޭ އެއްބާރެވެ. އަދި އެއީ ގާނޫނު ހެދުމުގެ ބާރުގެ އިތުރުން، ދައުލަތުގެ ހިންގުމުގެ ނިޒާމުގެ ތެރޭގައި ހިމެނޭ އެތައެއް މުވައްސަސާތަކެއް ޒިންމާދާރު ކުރުވާ، އަދި ޖަވަބުދާރީ ކުރުވުމުގައިވެސް މުހިންމު ދައުރެއް އަދާކުރާ އެއް މުވަސަސާވެސް މެއެވެ.

މި ސަބަބަށްޓަކާ 2008ވަނަ އަހަރު ދިވެހިން ބަލައިގަތް ފެހި ގާނޫނު އަސާސީގައި، ވަކި ބާބެއްގެ ގޮތުގައި ރައްޔިތުންގެ މަޖިލިހުގެ އިހުތިސާސްތަކާއި، އެމަޖިލީހަށް ލިބިދީފައިވާ ބާރުތަކާއި، އަދި އެމަޖިސް އެކުލެވިގެންވާ ގޮތާއި އޭގެ އިތުރުން އެ މަޖިލިހުގެ މެމްބަރުންގެ ކިބައިގެން ހުންނަންޖެހޭ ޝަރުތުތައްވެސް ވަނީ ވަރަށް ފުރިހަމަޔަށް ކަޑައަޅާ ބަޔާން ކުރެވިފައެވެ.

އެހެންނަމަވެސް މިހުރިހާ ޝަރުތުތަކެއް ގާނޫނު އަސާސީގައި އެކަށައަޅާ ބަޔާން ކުރެވިފައިވާއިރުވެސް، ޚުދު ގާނޫނު އަސާސީންވެސް، ދައުލަތުގެ އެހެން މުވައްސަސާތަކަށް، ލިބިދީފައިނުވާ ޚާއްސަ އިމްތިޔާޒު ތަކަކާއި ބާރުތަކެއް މި މުވައްސަސާއަށް ލިބިދީފައިވާކަން ފާހަގަ ކޮށްލަން ޖެހެއެވެ. ހަމަ އެއާއެކު، ދިވެހި އެހެން ފަރުދުންނަށް ލިބިދީފައި ނުވާ ބާރުތަކެއް، ނުވަތަ އިމްތިޔާޒުތަކެއް މަޖިލިހެކޭ އެއްފަަދައިން ރައްޔިތުންގެ މަޖިލިހުގެ މެމްބަރުންނަށްވެސް ގާނޫނު އަސާސީން ވަނީ ލިބިދީފައެވެ. އެހެންނަމަވެސް، ހަދާން ބަހައްޓަންވީ އެންމެ މުހިންމު ނުކުތާއަކީ، ރައްޔިތުންގެ މަޖިލިހުގެ މެމްބަރުންނަށް މި ބާރުތަކާއި އިޚްތިޔާރުތައް، ނުވަތަ ގާނޫނު އަސާސީން ލިބިދީފައިވާ ޚާއްސަ އިމްތިޔާޒުތައް ލިބިދީފައިވަނީ، ޚާއްސަ ހާލަތްތަކެއްގައި ކަމެވެ.

އެއީ، ރައްޔިތުންގެ މަޖިލިހުގައި މެމްބަރުން، މަޖިލިހު ކޮމިޓީތަކުގައި ނުވަތަ ޗެމްބަރުގައި ވާހަކަ ދައްކަވާއިރު، ބަހުސްކުރެއްވުމަށް ނުވަތަ ޚިޔާލު ފާޅު ކުރެއްވުމަށް ލިބިދީފައި އޮންނަ މިނިވަންކަމަކާއި އިމްތިޔާޒުތަކެވެ. މަޖިލިހުން ބޭރުގައި، ނުވަތަ އެހެން ފޯރަމްތަކުގައި، މަޖިލިސް މެމްބަރަކަށް ވީތީ ލިބިދިފައި ހުރި އިޚްތިޔާރުތަކެއް ނުވަތަ އުމްތިޔާޒުތަކެއް ނޫނެވެ.

މިގޮތުން ގާނޫނު އަސާސީގެ 90 ވަނަ މާއްދާގެ (ހ)ގައި ބަޔާން ކުރަނީ ތިރީގައި މިވާ ފަދައިންނެވެ.

"ރައްޔިތުންގެ މަޖިލިހުގެ ޖަލްސާއެއްގައި، ނުވަތަ އެމަޖިލިހުގެ ކޮމިޓީއެއްގައި މަޖިލިހުގެ މެމްބަރަކު ނުވަތަ އެނޫންވެސް މީހަކު އިސްލާމްދީނުގެ އަސްލަކާ ޚިލާފް ނުވާ ގޮތުގެ މަތީން ދެއްކި ވާހަކައެއް ނުވަތަ ހުށަހެޅި ހުށަހެޅުމެއްގެ ސަބަބުން ނުވަތަ ވޯޓު ދިނުމުގައި އަމަލުކުރި ގޮތެއްގެ ސަބަބުން، ކޯޓަށް އެމީހަކު ހާޒިރުކޮށް ނުވަތަ އެމީހަކާމެދު އެއްވެސް ތަހުގީގެއް ހިންގައި ނުވަތަ ހައްޔަރުކޮށް ނުވަތަ ބަންދެއްކޮށް ނުވަތަ އެމީހަކާމެދު ދައުވާއެއްކޮށް ހަދައިގެން ނުވާނެއެވެ."

އެހެންކަމުން، ފެހި ގާނޫނު އަސާސީން، ދައުލަތުގެ އެންމެ މުހިންމު އެއްބާރު ކަމުގައިވާ ގާނޫނު ހަދާ މަޖިލިހަށާއި އަދި މަޖިލިހުގެ މެމްބަރުންނަށް ނުހަނު ފުޅާ ދާއިރާއެއްގައި ބާރުތަކާއި އިމްތިޔާޒުތަކެއް ލިބި ދީފައިވި ނަމަވެސް، ޚުދު ގާނޫނު އަސާސީން މިކަންކަމުގައި ދަމާފައިވާ، މެމްބަރުންނަށް އެރޮގު ހުރަސް ނުކުރެވޭނޭ ރަތް ރޮގެއް އޮތްކަން ފާހަގަ ކޮށްލަންޖެހެއެވެ.

އެއީ އެ މަޖިހުގައިވެސް، ރައްޔިތުންގެ މަޖިލިހުގެ މެމްބަރުންނަށް އިސްލާމްދީނު އަސްލަކާ ޚިލާފު ވާހަކައެއް ނުދެއްކޭނެކަން ގާނޫނު އަސާސީގައި އިސްވެދިޔަ ފަދައިން ބަޔާން ކޮށްފައި އޮންނަ އޮތުމެވެ. އެހެން ދީންތަކަށް ދައުވަތުދީ، ދިވެހިރާއްޖޭގައި އެހެން ދީންތަކަށް އަޅުކަން ކުރުމަށް ގޮވާލާ، އެކަމަށް ވަކާލާތުކޮށް ހެދުމުގެ ފުރުސަތު ގާނޫނު އަސާސީން ލިބިދީފައެއް ނުވެއެވެ. އަދި އިސްލާމްދީން ނަފީކޮށް ވާހަކަ ދެއްކުމުގެ އެއްވެސް ފުރުސަތެއް ގާނޫނު އަސާސީން ލިބިދީފައި ނެތްއިރު، އެއީ 2008ވަނަ އަހަރު ދިވެހިން ބަލައިގެންފައިވާ ގާނޫނު އަސާސީން މުތުލަގަށް މަނާ ކޮށްފައި އޮތްކަމެއްވެސް މެއެވެ.

ދީނީ މިނިވަންކަމަށް، މަޖިލިހުގައި މެމްބަރު ޖާބިރު ގޮވާލެއްވުން

މިހަފްތާގެ ބުދަ ދުވަހު ބޭއްވުނު ރައްޔިތުންގެ މަޖިލިހުގެ ޖަލްސާގައި ކާށިދޫ ދާއިރާގެ މެމްބަރު އަބުދުﷲ ޖާބިރުވަނީ، މިރާއްޖޭގައި އެހެން ދީންތަކުގެ މީހުންނަށްވެސް އަޅުކަން ކުރުމުގެ ފުރުސަތު އޮންނަންޖެހޭ ކަމަށް ވިދާޅުވެ، "މި ރާއްޖެއަކީ ޔުނިވާރސަލް ޕްރެކްޓިސްއެއް" އޮންނަން ޖެހޭ ގައުމެއް ކަމުގައި ވިދާޅުވެފައެވެ.

ޝަރިއްޔާ ތަހުޒީބު. ގުރުއާން ތަހުޒީބު. ﷲ ވޮޑިގެންވޭ. ﷲ ސުބުހާނަހޫ ވަތައާލާގެ މިންވަރުފުޅާ އެކު އަޅުގަނޑުމެންނަކީ ސުންނީ މުސްލިމުން. މި ރާއްޖޭގަ މާ މޮޅު ދީންވެރިއަކު ނުއެއް ނެތް. އެންމެން ނަމާދު ކުރޭ. އެހެން ދީންތަކަށް މި ރާއްޖޭގައި ނަމާދުކޮށް އުޅެވޭނެ ގޮތުގެ މައްޗަށް، لَكُمْ دِينُكُمْ وَلِىَ دِينِ މި ގައުމުގައި އުފައްދަން އެބަ ޖެހޭ. މާނައަކީ އެހެން ދީންތަކުގެ މީހުންނަށް އައިސް ނަމާދުކޮށް މިތާގަ އުޅެވެން ވާނެޔޭ،

– ރައްޔިތުންގެ މަޖިލިހުގެ ޖަލްސާގައި ވާހަކަ ދައްކަވަމުން ޖާބިރު ވިދާޅުވެފައި ވެއެވެ.

މި ޖަލްސާގައި އިތުރަށް ވާހަކަ ދައްކަވަމުން ޖާބިރު ވިދާޅުވެފައިވަނީ، ދިވެހިންނަކީ އެކި ގައުމުތަކުން "ބެހިގެން" ރާއްޖެއަށް އައިސް ތިބި "ވަކަރުގޭ ދަރިން"ކަމަށެވެ. ދިވެހިން ކިތަންމެ ރީތިކޮށް ހެދުން އެޅި ނަމަވެސް ދިރިއުޅުން ތަހުޒީބު ކުރަން ޖެހޭކަމަށްވެސް އޭނާ ވިދާޅުވެފައިވެއެވެ.

ރައްޔިތުންގެ މަޖިލިހުގެ ޖަލްސާގައި ޖާބިރު، ދިވެހިރާއްޖޭގައި އެހެން ދީންތަކުގެ މީހުންނަށް އަޅުކަން ކުރުމުގެ ފުރުސަތު ދޭންޖެހޭކަމަށް ފާޅުގައި ގޮވާލިއިރު، ޖާބިރު މަޖިލިސް ފްލޯގައި މިދެއްވި ވާހަކައާއި ގުޅޭގޮތުން ގާނޫނީ ފަރާތްތަކުން ފާހަގަކުރާ ދެ ނުކުތާއެއް އެބަ އޮތެވެ. މިގޮތުން، އެހެން ދީންތަކަށް އަޅުކަން ކުރުމުގެ ފުރުސަތު ދިނުމާއި، އަދި ދިވެއްސަކަށް ވެހުރެއް އެހެން ދީނަކަށް ނޫޅެވޭނެކަން ގާނޫނު އަސާސީން ސާފުބަހުން މަނާ ކޮށްފައި އޮންނަ އޮތުމުގެ އިތުރުން، ގާނޫނީ ގާނޫނީ ބޭފުޅުން ފާހަގަކުރާ އެއް ނުތާއަކީ، ދިވެހިންގެ ދީނީ އެއްބައިވަންތަކަން ހިމާޔަތް ކުރުމާބެގޭ ގާނޫނު (ޤާނޫނު ނަންބަރު 6/94)ގެ 4 ވަނަ މާއްދާގެ (ހ)ގައި ބަޔާން ކުރާ ވާހަކަތަކެވެ.

އެމާއްދާގައި ބުނަނީ ތިރީގައި މިވާފަދައިންނެވެ.

"ދިވެހި ރައްޔިތުންގެ ދީނީ އެއްބައިވަންތަކަން ނަގާލުމަށް މަސައްކަތް ކުރުމާއި، މީހުންގެ މެދުގައި ދީނީގޮތުން ޚިލާފް އުފެދޭ ބާވަތުގެ ވާޙަކަ ދެއްކުމާއި އެފަދަ ގޮތަކަށް އަމަލު ކުރުމާއި، މިއިން އެއްވެސް ކަމެއް ކުރަން އުޅުމަކީ މަނާ ކަމެކެވެ."

މީގެ އިތުރުން ގާނޫނު އަސާސީގެ ގާނޫނު އަސާސީގެ 73ވަނަ މާއްދާގެ (ހ)ގެ (5)އެވެ. ގާނޫނު އަސާސީގެ 73ވަނަ މާއްދާގައި ބަޔާން ކުރަނީ، ރައްޔިތުންގެ މަޖިލިގެ މެމްބަރަކަށް ވުމުގެ ޝުރުތަކެވެ. މި މާއްދާގެ (ހ)ގެ (5) ގައި ބަޔާން ކުރަނީ ތިރީގައި މިވާ ފަދައިންނެވެ.

"ބުއްދި ހަމަޔަށް ހުރި މީހަކު ކަމުގައި ވުން." މިފަދައިންނެވެ.

މިގޮތުން މި ދެމާއްދާއަށް ބަލާއިރު، ފަހުން މިދެންނެވި މާއްދާގައި، ރައްޔިތުންގެ މަޖިލިހުގެ މެމްބަރެއްގެ ކިބައިގައި ހުންނަންޖެހޭ ޝަރުތުތަކުގެ ތެރެއިން ޝަރުތެއް މެމްބަރު ޖާބިރުގެ ކިބައިގައި އުނިވެފައިވާކަމަށް ބައެއް ފަރާތްތަކުން ގަބޫލުކުރަނީ، ހަމައެކަނި، އެހެން ދީންތަކަށް އަޅުކަންކުރަން ރާއްޖޭގައި ފުރުސަތު ދޭންޖެހޭކަމަށް އޭނާ މަޖިލިހުގެ ފްލޯގައި ގޮވާލެއްވި ގޮވާލެއްވުމަށް އެކަނި ރިއާޔަތްކޮށްގެން ނޫންކަން މިފުރުސަތުގައި ފާހަގަކޮށްލަން ޖެހެއެވެ. މި ޝަރުތު ހަގީގަތުގައިވެސް މެމްބަރު ޖާބިރުގެ ކިބައިގައި ފުރިހަމަޔަށް ހުރިތޯ ނުވަތަ ނޫންތޯ ޔަގީންކުރަން ޖެހޭކަމަށް ބައެއް ފަރާތްތަކުން ސުވާލު އުފައްދަމުންދަނީ، ފަހަކަށްއައިސް ރަޔިތުންގެ މަޖިލިހުގެ އިތުރުން، އެހެން ގިނަ ތަންތަނުގައިވެސް ޖާބިރުގެ އަމަލްތައް ހުރިގޮތުން، އޭނާގެ ބުއްދި މުޅިން ފުރިހަމަ ނޫންކަމަށް ގަބޫލުކުރެވޭ މޭރުމުން އޭނާގެ އަމަލްތައް ހުންނަމުންދާތީކަން ފާހަގަ ކޮށްލަން ޖެހެއެވެ.

އެހެންކަމުން ކޮންމެ ގޮތަކަށް ބެލިކަމުގައިވި ނަމަވެސް، ދިވެހިރާއްޖޭގެ ރައްޔިތުންގެ މަޖިލިހަށް ގާނޫނުތަކުންނާއި ގާނޫނު އަސާސީން ލިބިދީފައިވާ އިމްތިޔާޒުތަކާއި އިޚްތިޔާރުތަކުގެ ބޭނުންކޮށް، އެމަޖިހުގައި ދެއްކުން މަނާކޮށްފައިވާ ވާހަކަތައް އެމަޖިލިހުގައި ދެއްކުމުގެ ފުރުސަތު އެއްވެސް މެމްބަރަކަށް އޮވެގެން ނުވާނެ ކަމުގައި ދަންނަވަން ޖެހެއެވެ.

ސަބަބަކީ، ގާނޫނުހަދާ މަޖިލިހުގެ މެމްބަރުންނަކީވެސް ގާނޫނުތަކަށް ބޯލަބަންޖެހޭ އަދި ވަކީން ޚާއްސަކޮށް، އަމަލާ ބަހުން މިސާލު ދައްކަވަން ޖެހޭ ފަރާތްތައް ކަމަށް ވާތީވެސްމެއެވެ.

ރިޔާސަތު ހަނު

ރައްޔިތުންގެ މަޖިލިހަކީ، އެމަޖިލިހުގެ ޖަލްސާތައްވެސް އަދި ކޮމިޓީތައްވެސް މޮޑެރޭޓް ކުރެވިގެން ކުރިޔަށް ދާތަނެކެވެ. ޖަލްސާތައް ކުރިތަށް ދާނީ، ރިޔާސަތުގެ ފުރިހަމަ ބެއްލެވުމުގެ ދަށުންނެވެ. ކޮމިޓީތައް ކުރިޔަށް ދާންވާނީ، މުގައްރިރުންގެ ފުރިހަމަ ބެއްލުވުމުގެ ދަށުންނެވެ. އަދި މިދެންނެވުނު އުސޫލުން މެޑެރޭޓް ކުރެވިގެން، ހިގާނުހިގާ ގޮތް ރަގަޅަށް ވަޒަން ކުރެވިގެން ޖަލްސާތަކާއި ކޮމިޓީތައް ކުރިޔަށް ދާކަން ޔަގީން ކުރުމަށްޓަކާ މަޖިލިސް ރިޔާސަތަށާއި އަދި ކޮމިޓީތަކުގެ މުގައްރިރުންނަށް މަޖިލިހުގެ ގަވާއިދުގެ ތެރެއިން ޚާއްސަ ބާރުތަކަކާއި އިމްތިޔާޒުތަކެއް ލިބިދީގައި އޮންނަކަންވެސް ފާހަގަ ކޮށްލަން ޖެހެއެވެ.

އެހެންކަމުން، މަޖިލިސް މެމްބަރަކު ކޮމިޓީއެއްގައިވެސް އަދި ޖަލްސާއެއްގައި ނަމަވެސް، މަޖިލިހުގެ ގަވާއިދާ އަދި ވަކީން ޚާއްސަކޮށް ގާނޫނު އަސާސީއާއި ޚިލާފް ވާހަކަ ދައްވާނަމަ ނުވަތަ އެފަދަ އަމަލެއް ކުރައްވާނަމަ، އެކަމެއް ހުއްޓުވުމަކީ، މިޖިލިސް ރައީސް، ނުވަތަ އެވަގުތަކު މަޖިލިހުގެ ރިޔާސަތު ބަހައްޓަވާ ބޭފުޅެއްގެ ގާނޫނީ ޒިންމާއެކެވެ.

އެހެންނަމަވެސް، މިހަފްތާގެ ބުދަދުވަހު ބޭއްވިގެންދިޔަ މަޖިލިސް ޖަލްސާގައި، ކާާށިދޫ ދާއިރާގެ މެމްބަރުން މަޖިލިސް ޗެމްބަރުގައި ވާހަކަ ދައްކަވަމުން، ދިވެހިރާއްޖޭގައި ޢައިރު ދީންތަކުގެ މީހުންނަށް އަޅުކަން ކުރުމުގެ ފުރުސަތު ދޭންޖެހޭނެ ކަމަށް ވިދާވަމުން ގެންދެވުއިރުވސް، ޖާބިރުގެ ޝުޢޫރުތައް ފާޅުކުރެއްވުމަށް އޭނާއަށް ރިޔާސަތުން ފުރުސަތު ދެއްވައިގެން އިންނެވިކަން ގިނަބަޔަކު ދަނީ ފާހަގަ ކުރަމުންނެވެ. މަޖިލިސްގެ ރިޔާސަތުގައި އިންނެވި މަޖިލިސްގެ ނާއިބް ރައީސް އިވާ އަބްދުﷲ ޖާބިރުގެ ވާހަކަ ނުހުއްޓުވިއިރު، ވާހަކަ ނިންމަވާލެއްވުމުންވެސް މިވާހަތަކާއިމެދު އެއްވެސް ވަރަކަށް ކަންބޮޑުވުންވެސް ފާޅު ކުރައްވާފައެއްވެސް ނުވެއެވެ. މިގޮތުން، މަޖިލިސް ރިޔާސަތުން އަމަލު ކޮށްފައިވާ ޒިންމާދާރުކަން ކުޑަ ގޮތާއިމެދު ސޯޝަލް މީޑިއާގައި ގިނަ ބަޔަކު ދަނީ މަޖިލިހުގެ ރިޔާސަތަށް ގިނަބައެއްގެ ފާޑުކިއުން އަމާޒުވެގެން ގޮސްފައިވާއިރު، ޖާބިރުގެ ވާހަކަ މަޖިލިސް ރިޔާސަތުން ނުހުއްޓުވި މައްސަލަގައި ގިނަ ބަޔަކު ދަނީ ކަންބޮޑުވުންވެސް ފާޅުކުރަމުންނެވެ.

އެހެންނަމަވެސް، ރާއްޖޭގައި ދީނީ މިނިވަންކަން ދިނުމަށް ގޮވާލާ، ރައްޔިތުންގެ މަޖިލީހުގެ ކާށިދޫ ދާއިރާގެ މެމްބަރު ޢަބްދުﷲ ޖާބިރު އިއްޔެގެ ޖަލްސާގައި ދެއްކި ވާހަކަތައް މަޖިލީހުގެ އިދާރާއިން ބަލަން ފަށާފައިވާކަމަށް ފަހުން އެއިދާރާއިންވަނީ ބުނެފައެވެ. އަދި ޖާބިރު މަޖިލީހުގައި ދެއްކި ވާހަކަތަކާއިއ އެކަން ހިނގިގޮތް މަޖިލީހުން ބަލަމުންދާކަމަށް ބުނިނަމަވެސް އެކަމުގެ އިތުރު ތަފްސީލް އެ އިދާރާއިން ހާމަކޮށްފައެއް ނުވެއެވެ.

ފިޔަވަޅު އަޅުއްވަންޖެހޭ!

ކޮންމެއަކަސް ސާފުކޮށް އެގެން އޮތް އެއް ހަގީގަތަކީ، ރައްޔިތުންގެ މަޖިލިހަށް ގާނޫނު އަސާސީން ލިބިދީފައިވާ މިނިވަންކަމާއި އިމްތިޔާތަކުގެ ތެރޭގައި، އިސްލާމްދީނުގެ އަސްލުތައް ފަހަނަ އަޅާ ދިއުމުގެ އިމްތިޔާޒެއް، އަދި ދިވެހިރާއްޖޭގެ ގާނޫނު އަސާސީގައި ކަޑައެޅިގެން މަނާކޮށްފައިވާ އެއްވެސް ކަމެއް ހުއްދަކުރުމުގެ އެއްވެސް އިޚްތިޔާރަކާއި ބާރެއް އެއްވެސް މަޖިލިސް އެމްބަރަކަށް ލިބިދީފައި ނެތްކަމެވެ.

އަދި މިދެންވުނު މައިގަޑު ދެ މަސްދަރާއި ޚިލާފަށް މެމްބަރަކު މަޖިލިހުގައި އަމަލުކުރައްވާނަމަ، އެމެމްބަރަކާމެދު ގާނޫނު ފިވަޅު އެޅުމަކީ މަޖިލިސް ރައީސްގެ ޒިންމާއެކެވެ. އަދި އެއީ ދައުލަތުގެ މުވައްސަސާތަކުގެ މަސްއޫލިއްޔަތެއްވެސްމެއެވެ.

އެހެންކަމުން، މަޖިލިސް މެމްބަރަކަށް ވީތީ، ހުރިހާ ހުދޫދަކުން ބޭރުވެ، ގާނޫނެއް ގަވާއިދަކަށް ބެލުމެއްނެތި، އަދި މަޖިލިސް ޗެމްބަރަކީ ދުލަށް އައިހާ އެއްޗެއް ގޮވަން ހިތަކަށް ލިބިގައި އޮތް ޕްލެޓްފޯމެއް ކަމުގައި މިއަދު މެމްބަރުންނަށް ގަބޫލު ކުރެވިއްޖެނަމަ، އިންސާފުގެއްލި، މެމްބަރުން މިސާލަކަށް ބަލާ، މުޅި ގައުމުގެ މިސްރާބު ފާލުން ނެއްޓިގެން ދާނޭކަމީ ކަށަވަރުވެ ޔަގީންވާ ކަމެކެވެ. އޭގެ ކުރިން ފިޔަވަޅު އަޅުއްވާ، ގާނޫނުގެ ދިގުއަތް ހުރިހާ އެންމެންނާ ހަމައަށްވެސް ހަމަހަމަ ކަމާއެކު ފޯރާނޭކަން ޔަގީން ކުރުމަކީ، ވެރީންގެ މައްޗަށް އޮތް ވަރަށްވެސް ބޮޑު މަސްއޫލިއްޔަތެކެވެ.