ދެ ސަރުކާރެއްގެ ދެމެދުގައި އޮތް ވާދަވެރިކަމެއްގެ ސަބަބުން ކަތިލެވޭ ޤުރުބާނީއަކަށް ރައްޔިތުންވުން ބަލައި ނުގަނެވޭނެކަމަށް ކުރިއަށް އޮތް ރިޔާސީ އިންތިޚާބުގައި ވާދަކުރެއްވުމަށް ޝަޢުޤުވެރިކަން ފާޅުކުރައްވާފައިވާ ޕްރޮފެސަރު ޙަސަން އުގައިލް ވިދާޅުވެއްޖެއެވެ.
އުގައިލް މިހެން ވިދާޅުވެފައިމިވަނީ ކުރީގެ ރައީސް ޢަބްދުﷲ ޔާމީންގެ ވެރިކަމުގައި ހުޅުމާލެ ދެވަނަ ފިޔަވަހީގައި އިމާރާތްކުރައްވާފައިވާ ހިޔާ މަޝްރޫޢުގެ ފްލެޓްތައް ޢިމާރާތްކުރައްވާފައިވަނީ ބޮޑު އަގެއްގައިކަމަށް ބުނެ މިސަރުކާރުން އެ ފްލެޓްތަކުގެ ފިނިޝިން ނުނިންމާ ހަވާލުކުރުމާއި ގުޅިގެންނެވެ. އުގައިލް ވިދާޅުވީ، ހިޔާ މަޝްރޫޢޫ ކަނޑައެޅިފައިވާގޮތަށް އެ ފްލެޓްތައް ރައްޔިތުންނަށް ލިބެންޖެހޭކަމަށެވެ. އަދި އެތަންތަން ރައްޔިތުންނަށް ލިބެންޖެހޭނީ ވަސީލަތްތަކާއި ހެޔޮ އަގެއްގައި އެންމެ ރައްކާތެރިގޮތުގައިކަމަށްވެސް އުގައިލް ވިދާޅުވިއެވެ. އެއީ އެންމެ އަދުލުވެރި އަދި އޯގާތެރިގޮތްކަމަށްވެސް އުގައިލް ވިދާޅުވިއެވެ.
ހެޔޮވެރިކަމެއްގައި އިސްކުރަންވާނީ އަދުލުވެެރިކަމާއި އިންސާފުވެރިކަމާއި އޯގާތެެރިކަން.
– ޕްރޮފެސަރ ޙަސަން އުގައިލް
ހެޔޮވެރިކަމެއްގައި އިސްކުރަންވާނީ އަދުލުވެެރިކަމާއި އިންސާފުވެރިކަމާއި އޯގާތެެރިކަން. pic.twitter.com/PLPfEwUaDU
— Professor Ugail (@ugail) September 14, 2021
ހިޔާ މަޝްރޫޢު އަކީ ފިނިޝިންއާއެކު ކުޑަ އަގެއްގައި ރައްޔިތުންނަށް ހަވާލުކުރެވޭގޮތަށް ޢިމާރާތްކުރި ސޮޝަލް ހައުސިންގ ޔުނިޓްތަކެއްކަމަށް ކުރީ ސަރުކާރުގެ އިސް ފަރާތްތަކުން އަންނަނީ ބުނަމުންނެވެ. ނަމަވެސް މިސަރުކާރުން ވަނީ އެ މަޝްރޫޢު ކުރިއަށް ގެންގޮސްފައިވަނީ އަގުބޮޑުކޮށްކަމަށް ބުނެ ކުރިން އެ މަޝްރޫއަށް ކަނޑައެޅި ކުއްޔަށްވުރެ ބޮޑު ކުއްޔެއް ނަގަން ފަށާފައިކަމަށް ބައެއް ފަރާތްތަކުން ބުނެއެވެ.
ހިޔާ މަޝްރޫޢުގެ ދަށުން ފްލެޓް ލިބުނު ގިނަބައެއްގެ އެއްބަސްވުން އެކުލަވާލާ ތަޅުދަނޑި މިހާރު ވަނީ ހަވާލުކޮށްފައެވެ. އަދި ބައެއް އާއިލާތައް މިހާރު އެތަނުގައި ވަނީ ދިރިއުޅެން ފަށާފައެވެ.
