ރ. އަލިފުށި ފަޅުގައި ރިސޯޓެއް ހަދަން އަންނަ މަހު 25 ވަނަ ދުވަހު ބީލަމަށް ހުޅުވާލަން ނިންމައިފައިވާ ކަމަށް ޓޫރިޒަމް މިނިސްްޓަރު ޑރ. އަބްދުﷲ މައުސޫމް ވިދާޅުވެއްޖެއެވެ.
މިނިސްޓަރު މައުސޫމު މިހެން ވިދާޅުވީ، ރައްޔިތުންގެ މަޖިލީހުގެ މިއަދުގެ ޖަލްސާގައި އިނގުރައިދޫ ދާއިރާގެ މެމްބަރު ހަސަން އަހުމަދު ލިޔުމުން، މިނިސްޓަރު މައުސޫމާ ކުރެއްވި ސުވާލަށް ލިޔުމުން ޖަވާބު ދެއްވަމުންނެވެ.
އަލިފުށި ފަޅުގައި ރިސޯޓެއް ހެދުމުގެ މަޝްރޫއު އިއުލާން ކުރީ ޑިސެމްބަރު، 2019 އިގައެވެ. ޓޫރިޒަމް މިނިސްޓްރީން އޭރު ބުނީ މިދިޔަ އަހަރުގެ ފުރަތަމަ ހަމަސް ދުވަހުގެ ތެރޭގައި ބިޑް މަރުހަލާ ނިންމާ މަސައްކަތް ފެށޭވަރު ވާނެ ކަމަށް ބެެލެވޭ ކަމަށެވެ. ނަމަވެސް މިއަދާ ހަމައަށް ވެސް އެ މަޝްރޫއުގެ އެއްވެސް މަސައްކަތެއް ފަށާފައެއް ނުވެ އެވެ.
މިނިސްޓަރު ވިދާޅުވީ އަލިފުށި ފަޅުން 10 ހެކްޓަރުގެ ބިން ހިއްކައި އެ ފަޅުގައި އޮންނަ ރ. އެއްތަންގިލީގައި ފަތުރުވެރިކަން ތަރައްގީ ކުރަން އަންނަ މަހު 25 ގައި ހުޅުވާލައި ބީލަން އިއުލާން ކުރާނެ ކަމަށެވެ. އަލިފުށި ފަޅުގައި 200 އެނދު ހިމެނޭ ގޮތަށް ރިސޯޓެއް ހެދުމަށްފަހު އެ ފަޅުގައި އޮންނަ އެއްތިންގިލި ވިޒިޓާސް އައިލެންޑެއްގެ ގޮތުގައި ހިމާޔަތް ކުރަން ވެސް ވަނީ ނިންމާފައެވެ.
އެ ރިސޯޓް ހެދުމާއެކު 400 ވަޒީފާ އުފެދިގެންދާނެ ކަމަށް ވެސް ޓޫރިޒަމް މިނިސްޓްރީން ލަފާކޮށްފައިވެއެވެ.
