ރައީސް ޔާމީނަށް ހުކުމް ކުރުމަށް ޤާސިމް ހައިލަމަށް ގުޅުއްވި ވާހަކަތަކާއި ގުޅިގެން މިވާހަކަ އެންމެބޮޑަށް ދައްކަވަމުންދާ ދެބޭފުޅުންނަށް ކްރިމިނަލް ކޯޓުގެ ކުރީގެ އިސް ޤާޞީ އަހުމަދު ހައިލަމް ރައްދު ދެއްވައިފިއެވެ.
ކުރީގެ ރައީސް އަދި އިދިކޮޅު ލީޑަރު އަބްދުﷲ ޔާމީން އަބްދުލްގައްޔޫމަށް ހުކުމް ކުރެއްވުމަށް އެމަނިކުފާނުގެ މައްސަލަ ބެއްލެވި ކްރިމިނަލް ކޯޓްގެ އޭރުގެ އިސްގާޒީ އަހުމަދު ހައިލަމްއަށް ޖުމްހޫރީ ޕާޓީގެ ލީޑަރު ގާސިމް އިބްރާހިމް ގުޅުއްވި ކަމަށް ކުރާ ތުހުމަތު ޖުމްހޫރީ ޕާޓީން ވަނީ ދޮގުކޮށްފައެވެ. އިދިކޮޅު ކޯލިޝަން ހިންގުމާއި ހަވާލުވެ ހުންނެވި އަބްދުއްރަހީމް ވިދާޅުވެފައިވަނީ ރައީސް ޔާމީނަށް ހުކުމް ކުރުމަށް ޤާޞީ ހައިލަމަށް ޤާސިމް ގުޅުއްވައި ހެއްދެވިކަމަށެވެ.
މިވާހަކަތާއި ގުޅިގެން ހައިލަމް ވިދާޅުވީ މިވާހަތައް އެންމެބޮޑަށް ދައްކަވަމުންދާ އަބްދުއްރަހީމްްއާއި، އިލްހާމް އަކީ ދުވަހަކުވެސް އޭނާ ވާހަކަ ދެއްކި ދެބޭފުޅުން ނޫންކަމަށެވެ. މިމައްސަލާގައިވެސް އަދިއެހެން ކަމެއްގައިވެސް ހައިލަމް މީހަކަށް ގުޅުއްވިކަމެއް މިދެބޭފުޅުންނަށް އެގެންވީ އެއްވެސް ސަބަބެއް ނުވިސްނޭކަމަށް ހައިލަމް ވިދާޅުވިއެވެ.
ޢަބްދުއްރަޙީމާއި އިލްހާމްއާ އަޅުގަނޑު ދުވަހަކު ވެސް ވާހަކަ ދައްކާފައި ނުވާއިރު އަޅުގަނޑަށް މީހަކު ގުޅިކަމަށް ނުވަތަ ނުގުޅާކަމަށް އެބޭފުޅުންނަށް ވިދާޅުވާން އެނގެނީ ކިހިނެއްތޯ؟
– ހައިލަމް ވިދާޅުވިއެވެ.
ޗެނަލް13 ގެ ޕްރަގްރާމެއްގައި ވާހަކަ ދައްކަވަމުން އިދިކޮޅު ކޯލިޝަންގެ އެކްޓިން ލީޑަރު އަަބްދުއްރަހީމް އަބްދުﷲ ވަނީ ރައީސް ޔާމީނަށް ހުކުމް ކުރެއްވުމަށް އެމަނިކުފާނުގެ މައްސަލަ ބެއްލެވި ކްރިމިނަލް ކޯޓްގެ އޭރުގެ އިސްގާޒީ އަހުމަދު ހައިލަމްއަށް ޖުމްހޫރީ ޕާޓީގެ ލީޑަރު ގާސިމް އިބްރާހިމް ގުޅުއްވި ކަމަށް ތުހުމަތު ކުރައްވާ ވާހަކަ ދައްކަވާފައެވެ.
އިލްހާމް ވަނީ އެ ތުހުމަތުތައް ދޮގުކުރައްވާފައެވެ. އަދި ވިދާޅުވީ އެއީ ހިނގާފައިވާ ކަމެއްތޯ ބެއްލެވުމަށް ފުލުހުން ހާއްސަ ތަހުގީގެއް ފެއްޓެވި ނަމަވެސް އެކަމަށް އެއްބާރުލެއްވުން ދެއްވަން ގާސިމް ހުންނެވީ ތައްޔާރަށް ކަމަށެވެ. އިލްހާމް ވިދާޅުވީ ގާސިމަކީ ސިޔާސީ ގޮތުންވިޔަސް އަދި އެ ނޫން ގޮތަކުން ވިޔަސް ރައްޔިތަކަށް އަދި ސިޔާސީ ލީޑަރަކަށްވެސް އަނިޔާއެއް ލިބިވަޑައިގަތުމަށް އެދިވަޑައިގަންނަވާނެ ބޭފުޅެއް ނޫން ކަމަށެވެ.
ރައީސް ޔާމީންގެ މައްސަލަ ބެއްލެވި ހައިކަމް އަކީ އެމައްސަލައިގެ ހުކުމް ކުރުމަށް އެއްދުވަހަށް ވެފައި ވަނިކޮށް ޖޭއެސްސީން ސަސްޕެންޑް ކޮށްފައިވާ ޤާޞީއެކެވެ. އަދި މިކަމުގައި އޭނާ މަޤާމުން ވަކިކުރުމަށް މަޖިލީހަށް ހުށަހެޅުމުން ވަނީ މަޤާމުން އިސްތިއުފާ ދެއްވާފައެވެ.
