ދުނިޔޭގެ ފުޓުބޯޅަ ތާރީހުގައި ގައުމީ ޓީމަށް އެންމެ ގިނަ ލަނޑު ޖަހައިދިން ކުޅުންތެރިއަކަށް ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ ވެއްޖެއެވެ.
އަލީ ދާއީގެ ފުޓުބޯޅަ ހަޔާތް 2006 ވަނަ އަހަރު ހުއްޓާލިއިރު އޭނާ ވަނީ އީރާން ގައުމީ ޓީމަށް ކުޅެދިން 149 މެޗުން 109 ލަނޑު ޖަހާފައެވެ. ރޮނާލްޑޯ މި ރެކޯޑު އުމުރުން 36 އަހަރުގައި މުގުރާލިއިރު، އޭނާ މި ރެކޯޑު މުގުރާލީ 180 މެޗުންްނެވެ. އޭނާގެ ކެރިއަރުގައި މިހާތަނަށް ޕޯޗުގަލް ގައުމީ ޓީމަށް 11 ލަނޑު ޖަހާފައިވެއެވެ.
ޕޯޗުގަލް އާއި އަޔަލޭންޑް ބައްދަލުކުރި މެޗުގައި ރޮނާލްޑޯ އަށް ވަނީ މެޗުގެ 15 ވަނަ މިނެޓުގައި ޕެނަލްޓީއެއް ލިބި ބޭކާރުވެފައެވެ. ރޮނާލްޑޯ ފޮނުވާލި މި ޕެނަލްޓީ އަޔަލޭންޑްގެ ކީޕަރު ވަނީ މަތަކޮށްފައެވެ. މެޗުގެ ފުރަތަމަ ހާފު ނިމުމުގެ ކުރިން އަޔަލޭންޑް ވަނީ މެޗުގައި ލީޑު ނަގާފައެވެ. ކޯނަރެއްގެ އެހީގައި އެ ޓީމަށް މި ލަނޑު ކާމިޔާބުކޮށްދިނީ ޖޯން އިގަން އެވެ. މިއީ ގައުމީ ޓީމަށް އޭނާ ޖަހައިދިން ފުރަތަމަ ލަނޑެވެ.
މި މެޗުގައި ޕޯޗުގަލުން އެ ޓީމު ކޮޅަށް ނަތީޖާ އަނބުރާލާފައިވަނީ މެޗުގެ ފަހުކޮޅެވެ. އެގޮތުން މެޗު ނިމެން މިނެޓަކަށް ވެފައި ވަނިކޮށް ގޮންކާލޯ ގުއެޑެސް ނަގައިދިން ހުރަހަކުން ރޮނާލްޑޯ ވަނީ ޕޯޗުގަލަށް ނަތީޖާ އެއްވަރުކޮށްދީފައެވެ. އަދި މެޗުގެ އިތުރު ވަގުތުގައި ޑިއޯގޯ ޖޮޓާގެ އެހީތެރިކަމާއެކު ރޮނާލްޑޯ ވަނީ އިތުރު ލަނޑެއް ޖަހައި، މި މެޗުން ޕޯޗުގަލް މޮޅުކޮށްދީފައެވެ.
މި މޮޅާއެކު ކޮލިފައިންގެ ގްރޫޕް އޭގެ އެއްވަނައިގައި ޕޯޗުގަލް އޮތީ ކުޅުނު ހަތަރު މެޗުން ލިބުނު 10 ޕޮއިންޓާއެކުއެވެ. ދެވަނައިގައި އޮތް ސާބިއާއަށް ތިން މެޗުން ހަތް ޕޮއިންޓް ލިބިފައިވާއިރު، ޕޯޗުގަލް އަތުން ބަލިވި އަޔަލެންޑް އޮތީ ތާވަލުގެ ހަތަރުވަނައިގައި ތިން މެޗު ކުޅެ ޕޮއިންޓެއް ނުލިބިއެވެ.
