ބޮރޫޝިއާ ޑޯޓްމަންޑްގެ އިތުބާރު ފޯވާޑު ހާލަންޑު ފަހު ވަގުތު ޖެހި ލަނޑުން ޖަރުމަނު ލީގުގައި ރޭ ކުޅުނު މެޗުން ޑޯޓްމަންޑް މޮޅުވެއްޖެއެވެ.
ލީގުގައި ރޭ ހޮފެންހައިމް އަތުން ޑޯޓްމަންޑް މޮޅުވެފައިވަނީ 3 ލަނޑު 2 ލަނޑުންނެވެ. ޑޯޓްމަންޑްގެ މަޝްހޫރު ދަނޑު ސިގްނަލް އިޑޫނާ ޕާކްގައި ކުޅުނު މެޗުގެ ފަސް ގޯލު ވެސް ފެނުނީ ދެ ވަނަ ހާފްގަ އެެވެ. އިނގިރޭސި ޒުވާން މިޑްފީލްޑަރު ޖޫޑް ބެލިންހަމް ދިން ބޯޅައަކުން މެޗުގެ 49 ވަނަ މިނިޓްގައި ޑޯޓްމަންޑަށް ލީޑުނަގައިދިނީ އެމެރިކާގެ މިޑްފީލްޑަރު ޖިއޮވާނީ ރޭނާ އެވެ. މެނުއަލް އަކަންޖީ އަށް ޑޯޓްމަންޑްގެ ލީޑުފުޅާކޮށްދޭން ލިބުނު ފުރުސަތުގެ ބޭނުން ނުހިފުނެވެ.
ހޮފެންހައިމުން ނަތީޖާ ހަމަހަަމަކުރީ 61 ވަނަ މިނިޓްގައި އޮސްޓްރިއާގެ މިޑްފީލްޑަރު ކްރިސްޓޮފް ބޯމްގާޓްނާ ޖެހި ގޯލުންނެވެ. އޭގެ އަށް މިނިޓް ފަހުން އޭރިއާތެރެއިން ލިބުނު ފުރުސަތަކުން ބެލިންހަމް ވަނީ ގޯލެއް ޖަހައި އަލުން ޑޯޓްމަންޑަށް ލީޑުނަގައިދީފައެވެ.
މި މެޗުގައި ޑޯޓްމުންޑުން ދެވަނަ ފަހަރަށް ލީޑު ނަގާފައިވަނީ މެޗުގެ 69 ވަނަ މިނެޓުގައެވެ. އޭރިއާ ތެރެއިން ލިބުނު ފުރުސަތަކުން މި ލަނޑު އެ ޓީމަށް ކާމިޔާބުކޮށްދިނީ ޖޫޑް ބެލިންހަމެވެ. އެކަމަކު މެޗުގެ 90 ވަނަ މިނެޓުގައި ކޯނަރަކުން މޫނަސް ޑަބޯ ވަނީ އަލުން ހޮފެންހެއިމަށް ނަތީޖާ އެއްވަރުކޮށްދީފައެވެ. ނަމަވެސް އޭގެ މިނެޓެއް ފަހުން މެޗުގެ އިތުރު ވަގުތުގައި ހާލަންޑް ވަނީ ލަނޑެއް ޖަހައި، މި މެޗުން ޑޯޓްމުންޑް މޮޅުކޮށްދީފައެވެ. މިއީ މި ފަހަރު ލީގުގެ ތިން މެޗުން ހާލަންޑް ޖެހި ތިން ވަނަ ގޯލެވެ.
