ޔޫއެންގެ ޖެނެރަލް އެސެމްބްލީގެ އިންތިޚާބީ ރައީސްގެ ހައިސިއްޔަތުން، ޖަޕާނު ސަރުކާރުގެ ދައުވަތަކަށް، ޖަޕާނަށް މިހާރު ކުރައްވަމުން ގެންދަވާ ދަތުރުފުޅުގައި، ފޮރިންގ މިނިސްޓަރ އަބުދުﷲ ޝާހިދު، ޖަޕާނުގެ ފޮރިން މިނިސްޓަރ މޮޓެގިއާއި ބައްދަލު ކުރައްވައިފިއެވެ.
މި ބައްދަލު ކުރެއްވުމުގައި، ޖަޕާނުގެ ފޮރިންގ މިނިސްޓަރވަނީ، ޔޫއެންގެ ޖެނެރަލް އެސެމްބަލީގެ ރައީސްކަމަށް އިންތީޚާބު ވެވަޑައިގަތުމުގައި ހޯއްދެވި ފުރިހަމަ ކާމިޔާބީއަށް ޖަޕާން ސަރުކާރުގެ ފަރާތުން ޝާހިދަށް ވަރަށް ހޫނު މަރުހަބާއެއް ދަންނަވާފައެވެ.
އަދި ޖަޕާނުގެ ފޮރިންގ މިނިސްޓަރވަނީ، ބައިނަލްއަގުވާމީ މުޖުތަމަޢަށް ކުރިމަތިވެފައިވާ ތަފާތު ގޮންޖެހުންތައް ހައްލު ކުރުމުގައި، ޝާހިދުގެ ލީޑަރޝިޕްގައި ކުރެވިގެންދާނެ ހުރިހާ މަސަައްކަތަކަށްވެސް ޖަޕާން ސަރުކާރުގެ ފުރިހަމަ އެއްބާރުލުން ލިބިގެންދާނެ ކަމުގެ ޔަގީންކަން ދެއްވާފައެވެ. އަދި، ޝާހިދުވަނީ، ޖަޕާން ސަރުކާރުން އެމަނިކްފާނަށް، ޔޫއެން ޖެނެރަލް އެސެމްބްލީގެ އިންތިޚާބީ ރައީސްގެ ހައިސިއްޔަތުން އެގައުމަށް ވަޑައިގަތުމަށް ދައުވަތު ދެއްވައި، އަދި އަދި، އެމަނިކްފާނުގެ ލީޑަރޝިޕްގައި ކުރެވިގެންދާނެ މަސައްކަތްތަކަށް ޖަޕާން ސަރުކާރުގެ ފުރިހަމަ އެއްރުލުން ލިބިގެން ދާނެކަމުގެ ޔަގީންކަން ދެއްވި ކަމަށްޓަކާ ޖަޕާން ސަރުކާރަށް ޝުކުރު އަދާ ކުރައްވާފައެވެ.
މި ބައްދަލު ކުރެއްވުމުގައި، ފޮރިންގ މިނިސްޓަރ މޮޓެގިވަނީ، ދުނިޔެއަށް ކުރިމަތިވަފައިވާ ކޯވިޑްގެ ބަލިމަޑުކަމުން އަރައިގަތުމަށްޓަކާ، ޖަޕާން ސަރުކާރުން އިސްނަގައިގެން ދުނިޔޭގެ އެކިގައުމުތަކަށް ފޯރުކޮށް ދެމުންދާ ވެކްސިންގެ އެހީތެރިކަމާ ގުޅޭ މައުލޫމާތު މިނިސްޓަރ ޝާހިދަށް އަރުވާފައެވެ. އަދި މޮޓެގީވަނީ، އދ.ގެ ސެކިއުރިޓީ ކައުންސިލް މިހާރު އެތުރިފައިވާ ގޮތަށް އިސްލާހީ ހެޔޮ ބަދަލުގެނައުމުގެ މުހިންމުކަން ފާހަގަ ކުރައްވާ، ޝާހިދުގެ ލީޑަރޝިޕްގައި، މިމަސައްކަތް ބާރަށް ކުރިޔަށް ގެންދަވާނެކަމަށް އުއްމީދު ކުރައްވާކަމުގައި ވިދާޅުވެފައެވެ.
މިބައްދަލުވުމުގައި ދެބޭފުޅުންވެސް ވަނީ، އަފްއާނިސްތާނުގެ މިހާރުގެ ޙާލަތާގުޅޭގޮތުން ހުރި ކަންބޮޑުވުންތަކާ ގުޅޭގޮތުންވެސް މަޝްވަރާ ކުރައްވާފައެވެ. އަދި ބައިނަލްއަގުވާމީ މުޖުތަމަޢު ގުޅިގެން އަފްއާނިސްތާނުގެ ހާލަތު ރަގަޅުކުރުމަށް މަސައްކަތް ކުރުމުގެ މުހިންމުކަންވެސް ދެބޭފުޅުން ފާހަގަ ކުރެއްވިއެވެ. އަދި މީގެއިތުރުން، އުތުރުކޮރެއާގެ ހާލަތާ ގުޅޭގޮތުންވެސް މިބައްދަލުވުމުގައި ދެގައުމުގެ ޚާރިޖީ ވަޒީރުންވަނީ މަޝްވަރާ ކުރައްވާފައެވެ.
މި ބައްދަލު ކުރެއްވުމުގައި ދިވެހިރާއްޖެއާއި ޖަޕާނާ ދެމުދު އޮތް ޒަމާންވީ ގާތްގުޅުން އިތުރަށް ހަރުދަނާ ކުރުމާ ގުޅޭގޮތުންވެސް މި ބައްދަލުވުމުގައި މަޝްވަރާ ކުރައްވާފައި ވެއެވެ.
