ތ.ވަންދޫ ކައުންސިލުގެ ނައިބު ރައީސް ޙުސައިން ޢަފީފް އެމްޑީޕީއާއި ގުޅިވަޑައިގެންފިއެވެ.
އަފީފް ފިޔަވައި ދެން އެކައުންސިލްގައި ހިމެނޭ އަނެއް 4 މެމްބަރުންނަކީވެސް ވެރިކަން ކުރާ އެމްޑީޕީގެ މެމްބަރުންނެވެ. އަފީފް ސޮއި ކުރުމުން ވަންދޫ ކައުންސިލްގެ ފަން މެމްބަރުންނަކީ ވެރިކަން ކުރާ އެމްޑީޕީގެ މެމްބަރުންނަށް ވަނީ ވެފައެވެ. އަފީފް ސޮއިކޮށްފައިވަނީ ރައީސް ޞާލިހު އެރަށަށް ކުރި ދަތުރުގައިއެވެ. ސޮއި ކުރުމަށްފަހު އޭނާގެ ފޯމް ހަވާލު ކުރެއްވީ ރައީސް ޞާލިހުއާއިއެވެ.
ތ.އަތޮޅަށް ރައީސް ޞާލިހު ކުރެއްވި ދަތުރުފުޅުގައި އެމަނިކުފާނުވަނީ އެއަތޮޅިގެ އެކި ރަށްތަކުގެ އެމްޑީޕީ މެމްބަރުންނާއި ބައްދަލުކޮށް، ޕާޓީގެ ހަރަކާތްތައް އިތުރު ކުރުމުގެ މަސައްކަތް ކުރާނެކަމަށް ވިދާޅުވެފައެވެ.
ވެރިކަން ކުރާ އެމްޑީޕީގެ ލީޑަރޝިޕްގައި ބޮޑު ޚިޔާލު ތަފާތުވުމެއް އުފެދިފައިވާ މިދަނޑިވަޅުގައި އެޕާޓީގެ އިސް ބައެއް ބޭފުޅުން އެހެން ޕާޓީތަކާއިވެސް ދަނީ ގުޅެމުންނެވެ. އަދި ރައީސް ނަޝީދު ވަނީ ރައީސް ޞާލިހުއާއި އޮތް ސިޔާސީ ގުޅުން ކަނޑާލާފައިވާކަމަށް އިއުލާން ކުރައްވާފައެވެ.
