މިހާރު އޮލިމްޕިކްސް ބާވަމުން ގެންދާ، ޖަޕާނުގެ ވެރިރަށް ޓޯކިޔޯގައި، ބުރާސްފަތި ދުވަހު 5,042 މީހުން ކޯވިޑަށް ޕޮޒިޓިވް ވެއްޖެއެވެ.
މިއީ ކޯވިޑް19 ދުނިޔޭގައި ފެތުރެން ފެށިފަހުން ޖަޕާނުގައި އެންމެ ގިނަ އަދަދަކަށް ކޯވިޑް19އަށް މީހުން ޕޮޒިޓިވް ވެފައިވާ ދުވަހެވެ.
ފާއިތުވެދިޔަ ޖުލައިމަހުގެ މެދުތެރެއިން ފެށިގެން ވެރިރަށް ޓޯކިއޯގައި ވަނީ ސިއްޙީ ކުއްލި ނުރައްކަލުގެ ހާލަތު އިއުލާން ކޮށްފައެވެ. އަދި އެއަށްފަހު، ޖަޕާނުގެ އިތުރު 4 ސަރަހައްދެއްގައިވެސް ވަނީ ސިއްޙީ ކުއްލި ނުރައްކަލުގެ ހާލަތު އިއުލާން ކޮށްފައެވެ.
ޖަޕާނުގައި އާންމު ކޮށްފައިވާ ސިއްޙީ ކުއްލި ނުރައްކަލުގެ ހާލަތުގައި، ފިހާރަތަށް ހުޅުވާފައި ހުންނަ ގަޑިތަށް ކުރު ކުރުމުގެ އިތުރުން، ރާ ވިއްކާ ރެސްޓޯރަންޓް ތަކާއި އަދި ބާރތައް ހުޅުވުން މަނާކޮށްފައި ވިނަމަވެސް، ދިގު މުއްދަތަކަށް ކޯވިޑް19އާއި ގުޅިގެން ޖަޕާނުގައި އާންމުކުރަމުން އައި ސިއްޙީ ކުއްލި ނުރައްކަލުގެ ހާލަތާއި ގުޅިގެން މީހުން މާޔޫސްވެ، މިގޮތުން އަޅާފިޔަވަޅުތަކަށް ފަހަކަށް އައިސް ގިނަ ތަންތަނުން މާބޮޑު ސަމާލުކަމެއް ނުދޭކަމަށް ޖަޕާނުގެ ލޯކަލް މީޑިއާތަކުން ވަނީ ރިޕޯޓު ކޮށްފައެވެ.
"މުހިންމުކޮށް، މިހާރުގެ ހާލަތާއި ގުޅޭގޮތުން ފިޔަވަޅު އެޅުމަށް މިވަނީ މަޖުބޫރުވެފަ،" ފުރަތަމަ ފަހަރަށް ޖަޕާނުގެ ވެރިރަށް ޓޯކިޔޯގައި ޕޮޒިޓިވް ވަމުންދާ މީހުންގެ ނިސްބަތް 5،000 އިން މައްޗަށް އެރުމާއި ގުޅިގެން، ބޮޑުވަޒީރު ޔޮޝިޑޭ ސުގާ ރިޕޯޓަރުންނާ ވާހަކަ ދައްކަވަމުން ވިދާޅުވެފައި ވެއެވެ.
"ބަލި ޖެހެމުންދާ މީހުންގެ ނިސްބަތް ދަނީ އަހަރެމެން ކުރިން ހީކޮށްފައި ނުވާހާ ބާރުމިނުގައި އިތުރުވަމުން."
ކޯވިޑް ފެތުރެމުންދަނިކޮށް، ޖަޕާނުގައި އޮލިމްޕިކްސް ކުރިޔަށް ގެންދިއުމަށް ނިންމުމާއި ގުޅިގެން ޖަޕާނުގެ އެތައް ބައެއްގެ ފާޑުކިއުން އަމާޒުވެފައިވާ، ބޮޑުވަޒީރު ސުގާ ވިދާޅުވެފައިވަނީ، ޓޯކިޔޯގައި ޕޮޒިޓިވްވާ މީހުންގެ އަދަދު އާދަޔާ ޚިލާފަށް އިތުރުވެގެން ދާދިއުމާ، ޖުލައި 23އިން އޮގަސްޓް 8 އަށް އެގައުމުގައި ކުރިޔަށް އޮލިމްޕިކްސް ކުޅިވަރު މުބާރާތާ އެއްވެސް ގުޅުމެއް ނެތްކަމުގައެވެ.
އަދި އޭނާވަނީ، މިހާރު ކުރިޔަށް ދަނީ ހޫނު މޫސުމްގެ ބަންދު ކަމުގައިވިޔަސް، އަޅާފައިވާ ފިޔަވަޅުތަކަށް ތަބާވެ، މީހުން ގޭގައި މަޑުކުރުމަށް އިލްތިމާސް ކޮށްފައެވެ.
ޓޯކިޔޯގައި އަލަށް ޕޮޒިޓިވްވި މީހުންގެ އަދަދާއެކު، މިހާތަނަށް ކޯވިޑް19އަށް ޕޮޒިޓިވް ވެފައިވާ މީހުންގެ އަދަދު ވަނީ 236,138 އަށް އަރާފައެވެ. މިހަފްތާގެ ބުދަ ދުވަހު، މުޅި ޖަޕާންގައި 14،000 މީހުން ކޯވިޑް19އަށް ޕޮޒިޓިވް ވެފައި ވެއެވެ. އަދި ޖަޕާނުގައި މިހާތަނަށް 970,000 މީހުންވަނީ ކޯވިޑް19 އަށް ޕޮޒިޓިވް ވެފައެވެ.
ޖަޕާނުގެ ވެރިރަށް ޓޯކިޔޯގައި އަދަޔާ ޚިލާފަށް ކޯވިޑް ފެތުރެމުން ދިއުމާ ގުޅިގެން ބައެއް ސިއްޙީ ތަޖުރިބާ ކާރުންވަނީ، ސިއްޙީ ކުއްލި ނުރައްކަލުގެ ހާލަތު މުޅި ޖަޕާނުގައި އިއުލާން ކުުރުމަށް ގޮވާލާފައެވެ.
އެހެންނަމަވެސް، ބޮޑުވަޒީރު ސުގާ، ބުރާފަތި ދުވަހު، އާދައިގެ ފިޔަވަޅުތަކަކާއެކު، ސިއްޙީ ކުއްލި ނުރައްކަލުގެ ހާލަތު އިއުލާން ކުރައްވާފައިވަނީ، ޖަޕާނުގެ އިރުން ފުކުޝީމާ އައި، ދެކުނުން ކުމަމޯޓޯ ހިމެނޭގޮތުން 8 ޕްރީފެކްޗަރއެއްގައެވެ.
