ފްލޮރިޑާއަށް ނިސްބަތްވާ ކޭ ރޯޖާ މި ވަނީ އޭނާގެ ގޭގައި ގެންގުޅޭ ބުޅާ އެ މީހުން ހަދިޔާއެއްގެ ގޮތުގައި ގެއަށް އެއްޗެހި ގެންނަ ކަމަށް ބުނެފައެވެ. އެކަމަކު އެންމެ ފަހުން ގެނައި ހަދިޔާ ވަރަށް ތަފާތު ކަމަށް ރޯޖާ ބުންޏެވެ. އެންމެ ފަހުން އެ ބުޅާ ގެއަށް ގެނެސްފައި ވަނީ ދެ ބޯ ހުރި ހަރުފައެކެވެ.
"އެ ދުވަހު އަހަރެންގެ ދަރިފުޅު އަހަރެންނަށް މެސެޖެއް ކުރީ، މަންމާ ބުޅާ ގެއަށް ހަރުފައެއް ގެނެސްފި، އޭގައި ދެ ބޯ އެބަ ހުރި".
– ރޯޖާ
ރޯޖާ ބުނީ، އެ މީހުން ނިންމާފައި ވަނީ އެއީ ވަރަށް އެޑްވެންޗަރަސް ބުޅަލެއްގެ ގޮތުގައި ކަމަށެވެ. އެ ބުޅަލަށް ދީފައިވާ ނަމަކީ އޮލިވް އެވެ. އެ ބުޅާ ހަރުފަ ގެއަށް ވައްދާފައި ވަނީ ކުއްތާ ވަންނަ ދޮރުންނެވެ. އަދި އެ ބުޅާ އެ ހަރުފަ ބާއްވާފައި ވަނީ ލިވިންގ ރޫމްގެ ކާޕެޓް މަތީގައެވެ.
އެކަން އެނގުނީ ރޯޖާގެ އަންހެން ދަރިފުޅަށެވެ. އޭނާ ގޮސް ވަރަށް ގާތުން އެ ހަރުފަ ބެލިއިރު އޭގައި ދެ ބޯ ހުރިކަން އެނގުނު ކަމަށް ބުނެފައި ވެއެވެ. ރޯޖާގެ ދަރިފުޅު މިހާރު އެ ހަރުފައަށް ނަމެއް ދީފިއެވެ. އެ ހަރުފައަށް ދިން ނަމަކީ ޑޮސް އެވެ.
"އަހަރެން ހީކުރީ ދަރިފުޅު އެހެން ބުނީ މަޖަލަށް ކަމަށް، އެކަމަކު އަހަރެންނަށްވެސް އެ ހަރުފަ ފެނުނީ އަޖައިބުވި، އަހަރެންނަށް ނުފެނޭ އޭގެ ހަރުފައެއް މީގެ ކުރިންނެއް"
– ރޯޖާ
މިފަދަ ހަރުފަތައް އާއްމުކޮށް ނުފެނެވެ. މިގޮތަށް ހަރުފައަށް ދިމާވަނީ އުފެދުމުގައި ގުޅިފައިވާ ދެ ހަށިގަނޑެއް ވަކި ނުވުމުންނެވެ.
