ކޯޓުގެ ހުރުމަތް ކަނޑާލައިގެން، ކޮށްފައިވާ ހުކުމް ތަންފީޒު ކުުރުމަށްޓަކާ، ސައުތު އެފްރިކާގެ ކުރީގެ ރައީސް ޖޭކޮބް ޒޫމާ، އަމިއްލަފުޅަށް ފުލުހުންގެ ބެލުމުގެ ދަށަށް ހިގައްޖެއެވެ.
ޒޫމާގެ ފައުންޑޭޝަންއިން ބުނެފައިވާ ގޮތުގައި، މިފަހްތާގެ ބުދަ ދުވަހު، އޭނާވަނީ ހުކުމް ތަންފީޒުކުރަން ފެއްޓުމަށްޓަކާ، ކުވާޒުލު – ނަޓަލް ޕްރޮވިންސްގައި އޭނާ ދިރިއުޅުއްވާ ގެއާއި ކައިރީގައި ހުންނަ ޖަލަކަށް ވަޑައިގެންފައެވެ.
ފުލުހުންވަނީ، އަމިއްލައަށް ޕޮލިހާއި ހަވާލު ނުވެއްޖެމަނަ، 79 އަހަރުގެ ކުރީގެ ރައީސް، އިއްޔެގެ އިރު އޮއްސުމުގެ ކުރިން ހައްޔަރު ކުރާނެކަމުގެ އިންޒާރު ދީފައެވެ.
ޒޫމާގެ މައްޗަށް ކުރެވެމުންދާ ކޮރަޕްޝަންގެ ތުހުމަތުތަކާ ގުޅޭ ތަހުގީގަށް އޭނާ ހާޒިރު ނުވުމުގެ ސަބަބުން، ކޯޓުންވަނީ، އޭނާގެ މައްޗަށް 15 މަސް ދުވަހުގެ ޖަލު ހުކުމެއް ފާއިތުވެދިޔަ ހަފްތާގައި އިއްވާފައެވެ.
ސައުުތު އެފްރިކާގެ ކޯޓުން ޒޫމާގެ މައްޗަށް އިއްވި ޖަލު ހުކުމާއި ގުޅިގެން އެގައުމުގައިވަނީ، ގާނޫނީ ބޮޑު މައްސަލަގަޑެއް ފެންމަތި ވެފައެވެ. އަދި، ޒޫމާގެ ޖަލު ހުކުމް ތަންފީޒު ކުރުމަށްޓަކާ އޭނާ ހައްޔަރު ކުރުމަށް ބުދަ ދުވަހުގެ ރޭގެ 11:00 އަށް އޮތީ މުހުލަތުވެސް ދީފައެވެ. ޒޫމާ ހައއްޔަރު ކުރުމަށް މުހުލަތު ދީފައިވަނީ، ކޯޓުގެ ހުކުމަށް ގޮންޖައްސަވާ، ފުލުހުންނާ ހަވާލުވުމަށް އޭނާ ދެކޮޅު ހެއްދެވުމާ ގުޅިގެންނެވެ.
"ރައިސް ޒޫމާ ވަނީ، އޭނާ ޖަލަށް ލުމަށް އިއްވާފައިވާ ހުކުމަށް ބޯލަބަން ނިންމަވާފަ،" ޒޫމާގެ ފައުންޑޭޝަނުން ނެރުނު ކުރު ބަޔާނެއްގައި ބުނެފައި ވެއެވެ.
ޒޫމާގެ އަންހެން ދަރިފުޅު ޑުޑު ޒުމާ – ސަމްބުޑްލާ ފަހުން ޓުވީޓް ކުރައްވާފައިވާ ގޮތުގައި، އޭނާގެ ބައްޕަ "މިހާރުވަނީ، ޖަލަށް ދިއުމުގެ މަގުމަތީގައި އަދި ހުންނެވީ ވަރަށް ވަރުގަދަ އަޒުމެއްގައި،" އެވެ.
ސައުތު އެފްރިކާގެ ތާރީޚުގައި މިހާތަނަށް އަގައުމުގެ ކުރީގެ ރައީސަކު ޖަލަށް ލާފައެއް ނުވެއެވެ.
ފާއިތުވެދިޔަ ޖޫންމަހު ޒޫމާ 15 މަސްދުވަހަށް ޖަލަށް ލާން ސައުތު އެފްރިކާގެ ކޯޓަކުން ހުކުމް ކޮށްފައިވަނީ، އޭނާ 9 އަހަރުވަންދެން ސައުތު އެފްރިކާގެ ރައީސްކަން ކުރެއްވިއިރު، ހިންގާފައިވާ ކޮރަޕްޝަންގެ ތުހުމަތުގައި، ހިންގަމުންދާ ތަހުގީގުގައި ހެކި ހުށަހެޅުމަށް އޭނާ އިންކާރު ކުރެއްވުމާއި ގުޅިގެން، ކޯޓުގެ އަމުރަށް ނުކިޔަމަންތެރި ވުމުގެ ކުށުގައެވެ.
ސައުތު އެފްރިކާގެ ބައެއް ވިޔަފާރަވެރިން، ޒޫމާގެ ވެރިކަމުގައި، ސިޔާސީ ފަރާތްތަކާ ޑީލް ހަދައިގެން، މަގާމް ބޭނުން ނާޖާއިޒް ގޮތުގައި ހިފުމުގެ ތުހުމަތު ޒުމާގެ މައްޗަށް ވަނީ ކުރެވިފައެވެ. އެހެންނަމަވެސް ޒުމާ ބުނެފައިވަނީ، އޭނާގެ މައްޗަށް ކުރަމުންދާ ތުހުމަތުތަކަކީ، ސިޔާސީ ތުހުމަތުތަކެއް ކަމުގައެވެ.
2018ވަނަ އަހަރު، ޒޫމާގެ ޕާޓީގެ ޕްރެޝަރަށް އޭނާ ވެރިކަމުން ދުރަށް ދާން މަޖުބޫރުވެ، ވެރިކަމުން ދުރަށް ޖެހިވަޑައިގަތަސް، އޭނާއަށް ޚާއްސަކޮށް، އަމިއްލަފުޅު އަވަށް ކަމުގައިވާ ކުވާޒުލު – ނަތަލް ޕްރޮވިންސްގައި ވަރަށް ބޮޑު ތާއީދެއް އޮވެއެވެ. މީގެތެރޭގައި އޭނާ ނިސްބަތްވާ ޕާޓީ ކަމުގައި އެފްރިކަން ނޭޝަނަލް ކޮންގްރެސް (ANC)ގެ ނުފޫޒު ގަދަ ފަރާތްތައްވެސް ހިމެނެއެވެ.
މިފަހްތާގެ އާދީއްތަ ދުވަހު، ޒޫމާ ހައްޔަރު ވިޔަ ނުދޭން އޭނާގެ ގެކައިރިއަށް އޭނާއަށް ތާއީދުކުރާ ފަރާތްތަކުން އެއްވެ، "އިންސާނީ އައްޑަނައެއް"ގެ ގޮތުގައި ގިނަ ބަޔަކުވަނީ އެތުރި، ފަރަކާތްތެރި ވާންވެސް ފަށާފައެވެ.
