2018ވަނަ އަހަރު އެމްޑީޕީ ވެރިކަމަށް އައީވެސް 12 މެމްބަރުންގެ ފޮޓޯ ވިއްކައިގެންކަމަށް ވިދާޅުވެ، ރައްޔިތުންގެ މަޖިލީހުގެ ކުރީގެ މެމްބަރު އަބުދުއްލަތީފް މުހައްމަދު، ރައްޔިތުންގެ މަޖިލިހުގެ ރައީސް މުހައްމަދު ނަޝީދަށް ވަރަށް ބޮޑަށް ފާޑު ވިދާޅު ވެއްޖެއެވެ.
ލަތީފް ނަޝީދަށް ފާޑު ވިދާޅުވެފައިވަނީ، އެމްޑީޕީގެ ބައެއް މަޖިލިސް މެމްބަރުން، އިމްތިޔާޒު ކޮމިޓީގައި، އެމްޑީޕީގެ ހުށަހެޅުމެއް ފެއިލް ކޮށްލުމަށް ވޯޓު ދިނުމާއި ގުޅިގެން، އެ މެމްބަރުން މަޖިލީހަށް ވަޑައިގެންނެވީ ނަޝީދުގެ ފޮޓޯ ވިއްކައިގެންކަމަށް ބުނެ އެމްޑީޕީގެ އެކްޓިވިސްޓުން އެމްޑީޕީގެ ބައެއް މަޖިލިސް މެމްބަރުންނަށް ފާޑު ކިޔަމުންދާ ދަނޑިވަޅެއްގައެވެ.
ނަޝީދަށް ފާޑުވިދާޅުވެ ލަތީފް މިއަދު ކުރެއްވި ޓުވީޓެއްގައި ވިދާޅުވެފައިވަނީ، ނަޝީދު ޖަލުން މިނިވަން ކުރީވެސް 12 އެމްޕީގެ މަސައްކަތުން ކަމަށާއި، އަދި އެ 12 އެމްޕީންނަށް ދާއިރާގެ ގޮޑި ދޭނެކަމަށް ބުނެ، ނަޝީދު ފަހުން ކަންކުރިގޮތްވެސް މިވަގުތު ހަނދާންކޮށްލުން ރަގަޅުކަމުގައި ލަތީފުގެ ޓުވީޓުގައި ވިދާޅުވެފައި ވެއެވެ.
2018 ގައި އެމް.ޑީ.ޕީ ވެރިކަމަށް އައީ ވެސް 12 އެމް.ޕީންގެ ފޮޓޯ ވިއްކައިގެން. އަދި ނަޝީދު ޖަލުން މިނިވަންކުރީވެސް 12 އެމް.ޕީންގެ މަސައްކަތުން. އެ 12 އެމް.ޕީންނަށް ދާއިރާގެ މަޖިލިސް ގޮނޑި ދޭނެ ކަމަށް ނަޝީދު ވައުދުވެފައި ފަހުން ކަންތައް ކުރި ގޮތްވެސް މިވަގުތު ހަނދާންކޮށްލުން ރަނގަޅު.
— Abdul Latheef (@funamalatheef) June 7, 2021
ރައްޔިތުންގެ މަޖިލީހުގެ 18ވަނަ ދައުރުގައި، އެމަޖިލިހުގެ 12 މެމްބަރަކު ރައީސް ޔާމިންގެ ވެރިކަމުގެ ގޮޑި ގެއްލިއްޖެކަމަށް ނިންމާ މަޖިލީހަށް ވަނުން މަނާކޮށް، އަދި އޭތެރޭގެ ބައެއް މެމްބަރުން ޖަލަށްވެސް ލާފައިވެއެވެ. އަދި އެ 12 މެމްބަރުން ފަހުން މަސައްކަތް ކޮށްފައިވަނީ، އޭރުގެ އިދިކޮޅު ޕާޓީތަކާއެކީގައެވެ.
މިގޮތުން ކުރި މަސައްކަތްތަކުގެ ތެރޭގައި، އޭރު ޖަލުގައި ބަންދުކޮށް އަދި، ރާއްޖެއިން ބޭރަށް އަރުވާލެވިގެން ތިއްބެވި ސިޔާސީ ލީޑަރުން މިނިވަންކުރުމަށް ހިންގުނު ސިޔާސީ ހަރަކާތްތަކުގައިވެސް އެންމެ އިސްދައުރެއް އަދާކޮށްފައިވަނީ އެ 12 މެމްބަރުންނެވެ.
މީގެ އިތުރުން ރައީސް ޔާމިންގެ ވެރިކަން ނިމުމަކަށް ގެންނަން އޭރުގެ އިދިކޮޅު ޕާޓީތަކުން ކުރިޔަށް ގެންދިޔަ ރިޔާސީ ކެމްޕޭނުގައާއި އަދި އާ ސަރުކާރެއް އެކުލަވާލާ، ރައްޔިތުންގެ މަޖިލިސް ހިއްސާކުރާނެ އުސޫލުތައް ކަނޑައެޅިއިރު، 12 މެމްބަރުންގެ ދާއިރާތައް 12 މެމްބަރުންނަށް ޚާއްސަ ކޮށްދޭނެކަމުގައި 2018ގެ ރިޔާސީ އިންތިޚާބަށް އެކުލަވާލި ކޯލިޝަންގެ 4 ލީޑަރުން ވައުދުވެފައި ވެއެވެ.
މީގެތެރޭގައި، 12 މެމްބަރުން، އެމްޑީޕީގެ އޮފީހުގައި ރައީސް ނަޝީދުއާއެކީގައި ބޭއްވި ބައްދަލުވުމުގައި، 12 މެމްބަރުންގެ ދާއިރާތަކަށް ވާދަކުރުމުގެ ފުރުސަތު 12 މެމްބަރުން ދެއްވާނެ ކަމަށް ވިދާޅުވެ، މި ދާއިރާތަކަށް އެމްޑީޕީގެ ކެނޑިޑޭޓުން ވާދަ ނުކުރާނެކަމަށް ނަޝީދު ވިދާޅުވެފައި ވެއެވެ.
އަދި އެބައްދަލުވުމުގައި، 12 މެމްބަރުންނަށް ތިމަންމަނިކްފާނު ޚިޔާނާތްތެރި ވެއްޖެނަމަ، ތިމަންނާގެ މައިން ބަފައިންވެސް ތިމަންނާއަށް މާފް ނުކުރާނެކަމަށް ނަޝީދު ވިދާޅުވިކަމަށް 12 މެމްބަރުން މިއަދު ވިދާޅުވެއެވެ. އަދި މި ބައްދަލުވުމުގައި، ތިމަންނާ 12 މެމްބަރުންނަށް ވީ ވައުދު ނުފުއްދިކަމަށް ބުނެ، ފަހުން އެ 12 މެމްބަރުން ތިމަންނާއަކީ ޚިޔާނާތްތެރިއެކޭ ބުނާ އަޑު އަހަން ބޭނުންނުވާ ކަމަށް ނަޝީދު ވިދާޅުވިކަމަށްވެސް މިއަދު 12 މެމްބަރުން ވިދާޅުވެއެވެ.
2019ވަނަ އަހަރު ބޭއްވުނު ރައްޔިތުންގެ މަޖިލިހުގެ އިންތިޚާބުގައި، 12 މެމްބަރުންގެ ތެރެއިން 19ވަނަ މަޖިލީހަށް އިންތިޚާބުވެފައިވަނީ، ވިލިގިލީ ދާއިރާގެ މެމްބަރު ސައުދު ހުސެއިން އެކަންޏެވެ. އަދި މީގެ ތެރެއިން ގިނަ މެމްބަރުން ތުހުމަތު ކުރާގޮތުގައި، އޭރުގެ އިދިކޮޅު ސިޔާސީ ކޯލިޝަނުން ވައުދުވިގޮތަށް، 12 މެމްބަރުންގެ ދާއިރާތަކަށް ކޯލިޝަންގެ ނަމުގައި ވާދަކުރުމުގެ ފުރުސަތު އެމެމްބަރުންނަށް ގެއްލުނީ ނަޝީދު އަޑީގައި ހުންނަވައިގެން، އެދާއިރާތަކަށް އެމްޑީޕީގެ ކެންޑިޑޭޓުންނަށް ވާދަކުރުމުގެ ފުރުސަތު ފަހިކުރުމަށް ކުރެއްވި މަސައްކަތްތަކުގެ ނަތީޖާއެއްގެ ގޮތުންނެވެ. ނަތީޖާއެއްގެ ގޮތުން، މީގެތެރޭގައި ހިމެނޭ ގިނަ މެމްބަރުން މިއަދު ތުހުމަތު ކުރަނީ، އެބޭފުޅުންނަށް ކޯލިޝަނުން ވީ ވައުދާ ޚިލާފުވުމުގައި އެންމެ އިސް ދައުރެއް އަދާކޮށްފައިވަނީ ނަޝީދުކަމަށެވެ.
ރައީސް އިބުރާހިމް މުހައްމަދު ސޯލިހުގެ ވެރިކަމަށް ގެންނަން ރިޔާސީ ކެމްޕޭނުގަވެސް އިސްދައުރެއް އަދާކުރެވި، ދިއްދޫ ދާއިރާގެ ކުރީގެ މެންބަރު ލަތީފު މިހާރު މަސައްކަތް ކުރައްވަމުން ގެންދަވަނީ ޕީޕީއެމްއާއި އެކު އިދިކޮޅު ސިޔާސީ ހަރަކާތްތަކުގައެވެ.
