ކޯވިޑް ބަލީގައި ރާއްޖެއިން ނިޔާވި އެންމެ ހަގު ކުއްޖާ، އުމުރުން 10 އަހަރުގެ މިޝްކާ މުހައްމަދު ނިޔާވުމުގައި އިހުމާލުވެފައިވާ މައްސަލަ ބަލަމުން އަންނަ ރައްޔިތުންގެ މަޖިލީހުގެ ޖެންޑާ އެންޑް ހިއުމަން ރައިޓްސް ކޮމިޓީ އަށް ހެލްތު މިނިސްޓްރީ އާއި ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރުސީއެމް) މާދަމާ ހާޒިރުކުރަން ނިންމައިފި އެވެ.
ބުރާސްފަތި ދުވަހު ބޭއްވި މަޖިލީހުގެ ހިއުމަން ރައިޓްސް އެންޑް ޖެންޑާ ކޮމިޓީގެ ބައްދަލުވުމުގައި ކޮމިޓީގެ މުގައްރިރު އަދި ހިންނަވަރު ދާއިރާގެ މެމްބަރު ޖީހާން މަހްމޫދު ވިދާޅުވީ މިޝްކާގެ މަރާ ގުޅޭ މައުލޫމާތުތައް ހޯދަން ކަމާ ގުޅޭ މުއައްސަސާތަކުގައި އެދިފައިވާ ކަމަށެވެ.
އެހެންނަމަވެސް ހާދިސާ ތަހުގީގު ކުރުމަށްފަހު ހެލްތު މިނިސްޓްރީން ހާމަކޮށްފައިވާ ރިޕޯޓުންވެސް ގިނަ އިހުމާލުތަކެއް ފާހަގަ ވުމާއި އޭގައި ގިނަ މައުލޫމާތު ތަކެއް ހިމަނާފައި ވަމުން، މާދަމާގެ ކޮންމެވެސް ގަޑިއެއްގައި ކޮމިޓީން މިނިސްޓްރީގެ އިތުރުން އެޗްއާރުސީއެމް އާއި ބައްދަލު ކުރާނެ ކަމަށް ޖީހާން ވަނީ ވިދާޅުވެފައެވެ.
މި ހާދިސާއަށް ފަހު އެޗްއާރުސީއެމުން ވެސް ވަނީ އެ މައްސަލަ ތަހުގީގުކުރަމުން އަންނަ ކަމަށް ބުނެފައެވެ.
ހެލްތު މިނިސްޓްރީގެ ރިޕޯޓުން އެނގޭގޮތުގައި އެ ހާދިސާ މެދުވެރިވުމަށް ދިމާވި ކަންކަމުގެ ތެރޭގައި ކަނޑައެޅިފައިވާ އުސޫލުތަކަށް އަމަލުކޮށްފައިނުވާ އެތައްކަމެއް އެދުވަހު ހިނގާފައި ވެއެވެ. އެގޮތުން އެމްބިއުލަންސް ފޮނުވާފައިވާކަމަށް ބުނެ އާއިލާއަށް ދީފައިވަނީ ދޮގު މަޢުލޫމާތުކަންވެސް އެ ރިޕޯޓުން ވަނީ ހާމަވެފައެވެ.
އެހެންކަމުން އެކަމުގައި ކަމާ ގުޅުންހުރި ފަރާތްތަކުގެ އިހުމާލު ބޮޑުކަން ވަނީ ހާމަވެފައެވެ. ހެލްތު މިނިސްޓަރ އަޙްމަދު ނަސީމް ކުރިން ވިދާޅުވެފައިވަނީ މި މައްސަލާހައި އިހުމާލުވި ފަރާތްތަކާމެދު ފިޔަވަޅު އަޅާނެކަމަށެވެ.
ކޮމެންޓު ފޮނުވާ