ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމް ގޭބަންދަށް ބަދަލުކޮށްފިއެވެ. އެކަން މޯލްޑިވްސް ކަރެކްޝަނަލް ސާރވިސްއިން ވަނީ ކަށަވަރުކޮށްދެއްވާފައެވެ.
ރައީސް ޔާމީން ގޭބަންދަށް ބަދަލުކުރާކަން އެމަނިކުފާނަށާއި، އެމަނިކުފާނުގެ އާއިލާއަށްވެސް މިހާރު ވަނީ އަންގާފައެވެ. ރައީސް ޔާމީން ގޭބަންދަށް ބަދަލުކުރުމަށް ސަރުކާރުގެ ތެރޭގައި މަޝްވަރާކުރެއްވުމަށްފަހު މިރޭ އެމަނިކުފާނު ގޭބަންދަށް ވަނީ ބަދަލުކޮށްފައެވެ. ރައީސް ޔާމީން ގެއަށް މި ބަދަލުކުރެއްވީ، އެމަނިކުފާނު ގެއަށް ބަދަލު ކޮށްދިނުމަށް އެދިވަޑައިގެން އެމަނިކުފާނުގެ އަނބިކަނބަލުން ފާތިމަތު އިބްރާހީމް ދީދީ އާި އިދިކޮޅު ޕްރޮގްރެސިވް ކޯލިޝަނުން ވަނީ ރައީސް އިބްރާހީމް މުހައްމަަދު ސޯލިހަށާއި ދައުލަތުގެ ކަމާ ގުޅޭ އިދާރާތަކުގައި ދަންނަވާފައިވަނިކޮށެވެ.
ކ.މާފުށީ ގައި ހަލުވިކަމާއެކު ކޮވިޑް-19 ފެތުރެމުންދާ މިދަނޑިވަޅުގައި މާފުށީ ޖަލުގެ އޮފިސަރުން ޕޮޒިޓިވްވަމުންދާތީ އެޖަލުގައި ހުކުމް ތަންފީޒު ކުރައްވަމުން ގެންދަވާ ކުރީގެ ރައީސް ޢަބްދު ﷲ ޔާމީން އަބްދުލްޤައްޔޫމް ވަނީ ވަގުތީ ގޮތުން ގޭބަންދަށް ބަދަލު ކުރެވިފަ.
— Maldives Correctional Service (@CorrectionsMv) April 29, 2021
ދާދި ފަހުން ނޫސްވެރިންނާ ބައްދަލު ކުރައްވާ ރައީސް ސޯލިހް ވެސް ވަނީ ރައީސް ޔާމީން ގެއަށް ބަދަލުކުރުމާ ގުޅޭގޮތުން ވާހަކަފުޅު ދައްކަވާފަ އެވެ. އެދުވަހު ރައީސް ވިދާޅުވީ މެޑަމް ފާތުމަތު އިބްރާހިމް ދީދީ ސިޓީއެއް އެމަނިކުފާނަށް ވެސް ލިބިވަޑައިގެންފައިވާތީ ރައީސް ޔާމީން ގެއަށް ބަދަލު ކުރުމުގައި ގޮތްތަކެއް ނިންމަން ބަލަން ޖެހޭ ކަންކަން މިހާރު ބައްލަވަމުން ގެންދަވާ ކަަމަށެވެ.
ރައީސް ޔާމީން ގޭބަންދަށް ބަދަލުކުރުމަށާއި، އެމަނިކުފާނު މިނިވަން ކުރުމަށް ގޮވާލައި މިރޭވެސް ގިނަބަކު ވަނީ މާލޭގައި މުޒާހަރާ ކޮށްފައެވެ. އަދި އިދިކޮޅު ކޯލިޝަނުން ބުނެފައިވަނީ މުޒާހަރާ ހުއްޓާލާނީ ރައީސް ޔާމީން މިނިވަން ވުމަށް ފަހުގައިކަމަށެވެ.
ކުރީގެ ރައީސް ޔާމީންގެ މައްޗަށް މަނީ ލޯންޑަރިން ކުށް ސާބިތުވެ ފަސް މިލިއަން ޑޮލަރުން ޖޫރިމަނާކޮށް ފަސް އަހަރަށް ޖަލަށްލުމަށް ކްރިމިނަލްކޯޓުން ހުކުމްކުރީ 2019ވަނަ އަހަރުގެ ނޮވެމްބަރު މަހުގެ 28 ވަނަދުވަހުއެވެ. ކްރިމިނަލް ކޯޓުން ކުރި ހުކުން ހައިކޯޓުގައި އިސްތިއުނާފްކުރުމުން، ދަށުކޯޓުގެ ޙުކުމް ދަމަހައްޓަން ހައިކޯޓުން ނިންމާފައިވަނީ މިދިޔަ ޖެނުއަރީ މަހުގެ 21ވަނަ ދުވަހުއެވެ.
