ދުނިޔޭގެ 165 ގައުމަކުން 1.7 މިލިއަނަށްވުރެ ގިނަ މުސްލިމުން ބައިވެރިވި މިއަހަރުގެ ޙައްޖުގެ އަޅުކަން ފުރިހަމަކުރުމަށްފަހު، ގިނަ ޙައްޖުވެރިން އެނބުރި ގައުމަށް ދާން ފަށައިފިއެވެ.
ހުކުރު ދުވަހު މިނާގައި ޝައިޠާނާއަށް ހިލައެކުމުގެ ކަންކަން ފުރިހަމަކުރުމަށްފަހު، ޙައްޖުވެރިން ވަނީ މަސްޖިދުލްޙަރާމަށް ގޮސް ވަދާޢީ ތަވާފުކޮށް ޙައްޖުގެ އެންމެހާ ރުކުންތައް އަދާކޮށްފައެވެ. އިސްލާމްދީނުގެ ފަސްވަނަ ރުކުން ކަމުގައިވާ ޙައްޖުގެ މަތިވެރި އަޅުކަން ނިންމާލުމަށްފަހު އެތައް ހާސް ބަޔަކު މިހާރު ދަނީ މައްކާއިން ފުރަމުންނެވެ.
މިއަހަރުގެ ޙައްޖު މޫސުމަކީ މޫސުން ވަރަށް ހޫނު ދުވަސްވަރަކަށް ވުމުން ޙައްޖުވެރިންނަށް އެކިވަރުގެ ސިއްޙީ ގޮންޖެހުންތަކާ ކުރިމަތިލާންޖެހުނެވެ. ނަމަވެސް ސަޢުދީ ސަރުކާރުން ވަނީ ހޫނުން ރައްކާތެރިވުމަށް ހިޔާލިބޭނެ އިންތިޒާމުތައް ހަމަޖައްސައި، ސިއްޙީ އެހީތެރިންގެ އަދަދު އިތުރުކޮށްފައެވެ. ސަޢުދީ ރެޑް ކްރެސެންޓުން މަޢުލޫމާތު ދޭގޮތުގައި ޙައްޖު މޫސުމުގައި 83،000 އަށްވުރެ ގިނަ މީހުންނަށް ކުއްލި ސިއްޙީ ފަރުވާ ވަނީ ފޯރުކޮށްދީފައެވެ.
ގަދަ ހޫނުގެ ސަބަބުން ވަރުބަލިކަން އިޙުސާސްވި ނަމަވެސް، ގިނަ ޙައްޖުވެރިން ތިބީ މި މަތިވެރި އަޅުކަން ފުރިހަމަކުރެވުނީތީ ނުހަނު އުފަލުންނެވެ. އަލަށް ޙައްޖަށްދިޔަ މިޞްރުގެ އުމުރުން 37 އަހަރުގެ އަޙުމަދު މަމްދޫޙު ބުނިގޮތުގައި ޙައްޖު ފުރިހަމަކުރެވުނުކަން ގަބޫލުކުރަންވެސް އޭނާއަށް ދަތިވިއެވެ. އަދި އަލްޖީރިއާގެ 74 އަހަރުގެ ޙައްޖުވެރިއެއް ކަމަށްވާ އަލް-ޒާވީ ބުނީ، އޭނާގެ އަންހެނުންނާއެކު ޙައްޖުގެ އަޅުކަން އަދާކުރުމަކީ 50 އަހަރުވީ ކައިވެނީގައި އަބަދުވެސް ދެކެމުންއައި ހުވަފެނެއް ކަމަށާއި މިއަދު އެކަން ޙަޤީޤަތަކަށް ވެއްޖެކަމަށެވެ.
ކޮމެންޓު ފޮނުވާ