މިއަހަރުގެ ހައްޖުގެ މަތިވެރި އަޅުކަމުގައި ބައިވެރިވާ 1.5 މިލިއަނަށްވުރެ ގިނަ މުސްލިމުން، ގާތްގަނޑަކަށް 40 ޑިގްރީ ސެލްސިއަސްގެ ގަދަ ހޫނުގައި ހައްޖުގެ އެންމެ މުހިންމު ރުކުން އަދާކުރުމަށް އަރަފާތު ބިމަށް މިއަދު ޖަމާވެއްޖެއެވެ.
ރޭ ފަތިހުން ފެށިގެން ހުދު އިހުރާމުގައި ތިބި އެތައް ހާސް ބަޔަކު ވަނީ، ކީރިތި ރަސޫލާ (ޞޢވ) އެންމެ ފަހުގެ ހުތުބާ ދެއްވި ތާރީޚީ ރަހްމަތުގެ ފަރުބަދަ (ޖަބަލުއް ރަހުމާ) ކައިރީގައި ދުއާކުރުމާއި ފާފަ ފުއްސެވުމަށް އެދި ދެންނެވުމުގައި ވަގުތު ހޭދަކޮށްފައެވެ. މެދުއިރުމަތީގައި ހަނގުރާމައިގެ ބިރުވެރިކަމާއި ސިޔާސީ ނުތަނަވަސްކަން ބޮޑުވެފައިވާ ދަނޑިވަޅެއްގައި ވެސް، މިދިޔަ އަހަރަށްވުރެ ގިނަ މީހުން މިއަހަރުގެ ހައްޖުގައި ބައިވެރިވާކަން ސައުދީ އޮފިޝަލުން ފާހަގަކުރައްވައެވެ.
ހޫނުގަދަވުމުގެ ސަބަބުން ދިމާވެދާނެ ސިއްހީ ނުރައްކާތަކުން ރައްކާތެރިވުމަށް ސައުދީ ސަރުކާރުން ވަނީ ހާއްސަ ފިޔަވަޅުތަކެއް އަޅާފައެވެ. އެގޮތުން، އަރަފާތު ބިމުގެ އެކި ސަރަޙައްދުތަކުގައި ފެން ބުރުވާ ނިޒާމުތަކާއި ބޮޑެތި ފަންކާތައް ހަރުކޮށް، މެޑިކަލް ޓީމުތަކާއި ސަލާމަތީ ބާރުތައް ވަނީ އެލާޓަށް ގެނެސްފައެވެ. ރާއްޖެއިން މިއަހަރު ހައްޖަށް ދިޔަ ހުރިހާ މީހުންވެސް ހެޔޮ ހާލުގައި އަރަފާތު ބިމުގައި ތިބިކަން ދިވެހިރާއްޖޭގެ އިސްލާމިކް މިނިސްޓްރީން ވަނީ ކަށަވަރުކޮށްދީފައެވެ.
މިއަދުގެ މެންދުރު ނަމާދާއި އަސްރު ނަމާދު ޖަމްއުކޮށް ގަސްރުކުރުމަށްފަހު، އިރުއޮއްސެންދެން ހައްޖުވެރިން ﷲ އަށް ޒިކުރުކުރުމާއި ދުއާކުރުމުގައި އަރަފާތުގައި ތިބޭނެއެވެ. އެއަށްފަހު އެންމެންގެ މިސްރާބު ހުންނާނީ މުޒްދަލިފާއަށް ގޮސް މަޣްރިބާއި އިޝާ ނަމާދުކޮށް އެތަނުގައި ރޭކުރުމަށެވެ. އަދި މާދަމާގެ ބޮޑު އީދު ދުވަހު އެނބުރި މިނާއަށް ގޮސް ޖަމްރާތަކަށް ހިލަ އުކުމުގެ އަޅުކަން ފަށާނެއެވެ.
ކޮމެންޓު ފޮނުވާ