އިންޑިއާގެ ނިއުދިއްލީގައި ކުރިއަށްދިޔަ ބްރިކްސްގެ ހާރިޖީ ވަޒީރުންގެ ބައްދަލުވުމުގައި، އިރާނާ ދެކޮޅަށް ހިންގި އަސްކަރީ ހަރަކާތްތަކުގައި ޔޫއޭއީން އަމަލީ ގޮތުން ބައިވެރިވެފައިވާ ކަމަށް އިރާނުގެ ހާރިޖީ ވަޒީރު އައްބާސް އަރާގްޗީ ތުހުމަތުކުރައްވައިފި އެވެ.
އިރާނުގެ ދައުލަތުގެ މީޑިއާތަކުން ރިޕޯޓުކޮށްފައިވާ ގޮތުގައި، އިއްތިހާދުގެ ބަދަހިކަން ދެމެހެއްޓުމުގެ ގޮތުން އަރާގްޗީގެ ބަޔާނުގައި ސީދާ ޔޫއޭއީގެ ނަން ގެންނަވާފައެއް ނުވެ އެވެ. ނަމަވެސް، އިރާނަށް ދިން ހަމަލާތަކުގައި އެ ގައުމުން ސީދާ ބައިވެރިވެފައިވާ ކަމަށާއި، ހަނގުރާމަ ފެށުނުއިރު އެ ހަމަލާތައް ކުށްވެރިކޮށްފައި ނުވާތީ އެކަމަށް އޭނާ ވަނީ ވަރަށް ބޮޑަށް ފާޑުވިދާޅުވެފަ އެވެ.
މި ތުހުމަތުތައް ފެންމަތިވެފައި މިވަނީ، ހަނގުރާމައިގެ ތެރޭގައި އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ސިއްރުން ޔޫއޭއީއަށް ވަޑައިގެންނެވި ކަމަށް ދެކެވޭ ވާހަކަތައް އެ ގައުމުން ދޮގުކޮށްފައިވާ ދަނޑިވަޅެއްގަ އެވެ. އަރާގްޗީ ވިދާޅުވީ އެމެރިކާގެ އަސްކަރީ މަރުކަޒުތަކާއި އިޒްރޭލާ އެކު ހަދާ ކޯލިޝަންތަކަކީ ޔޫއޭއީގެ ސަލާމަތާއި ރައްކާތެރިކަން ކަށަވަރުކޮށްދޭނެ ކަންކަން ނޫން ކަމަށެވެ. އަދި އަވަށްޓެރި ގައުމުތަކާ އެކު އޮންނަން ޖެހޭނީ ސުލްހަވެރި ގުޅުމެއްކަން އޭނާ ފާހަގަކުރެއްވި އެވެ.
މިދިޔަ މަހުގެ ތެރޭގައި ޔޫއޭއީ އާއި ސައުދީ އަރަބިއްޔާއިން އިރާނާ ދެކޮޅަށް އަސްކަރީ ހަރަކާތްތަކެއް ހިންގި ކަމަށް ވޯލް ސްޓްރީޓް ޖާނަލް އަދި ރޮއިޓާސް ފަދަ ބައިނަލްއަގުވާމީ މީޑިއާތަކުން ވެސް ވަނީ ރިޕޯޓުކޮށްފަ އެވެ. މި ކަންކަމާ ގުޅިގެން ތެހެރާނާއި އަބޫދާބީއާ ދެމެދު އޮތް ގުޅުން ގޯސްވެ، ބްރިކްސް ބައްދަލުވުމުގެ ނިންމުންތައް ފާސްކުރުމަށް ވެސް ވަނީ ދަތިތަކަކާ ކުރިމަތިވެފަ އެވެ. އިރާނުގެ ޑެޕިއުޓީ ފޮރިން މިނިސްޓަރު ކާޒިމް ގަރީބްއާބާދީ ވިދާޅުވި ގޮތުގައި ޔޫއޭއީގެ އަމަލުތަކުގެ ސަބަބުން މުއާމަލާތް ކުރުމުގައި މިހާރު ވަނީ ބޮޑެތި ހުރަސްތަކެއް ކުރިމަތިވެފަ އެވެ.
ކޮމެންޓު ފޮނުވާ