އަންނަ އާދިއްތަ ދުވަހު ސަރުކާރުން އަލަށް ހުޅުވާލާ ބޯހިޔާވަހިކަމުގެ މަޝްރޫއުގައި، ދެމަފިރިންގެ ތެރެއިން އެކަކުގެ ނަމުގައި ރަޖިސްޓްރީކޮށްފައިވާ ބޯހިޔާވަހިކަމެއް އޮތް ނަމަވެސް، އަނެއް މީހާއަށް ފޯމު ހުށަހެޅޭނެ ގޮތަށް އުސޫލު ބަދަލުކޮށްފިއެވެ.
މިއަހަރުގެ ރިޔާސީ ބަޔާނުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު އިއުލާނު ކުރެއްވި ގެދޮރުވެރިކަމުގެ މި ސިޔާސަތާ ގުޅޭގޮތުން، ހައުސިންގ މިނިސްޓަރު ޑރ. އަބްދުﷲ މުއްތަލިބު ވިދާޅުވީ މި ބަދަލަކީ ހުރިހާ ރައްޔިތުންނަށް ވެސް ގެދޮރުގެ ތަނަވަސްކަން ފަހިކޮށްދިނުމަށް ނިންމެވި ނިންމެވުމެއް ކަމަށެވެ. މިނިސްޓަރު ފާހަގަކުރެއްވި ގޮތުގައި އާ އުސޫލުގެ ދަށުން، ފިރިމީހާ ނުވަތަ އަނބިމީހާގެ ނަމުގައި ތަނެއް އޮތް ނަމަވެސް އަނެއް މީހާ ބޯހިޔާވަހިކަމަށް ޝަރުތު ހަމަވާނެއެވެ. މީގެ ބޭނުމަކީ އެއް ފަރާތެއްގެ ނަމުގައި ފްލެޓެއް ނުވަތަ ތަނެއް ހުއްޓަސް، މުސްތަގުބަލުގައި ދެމަފިރިންނަށް ބިމެއް ނުވަތަ އިތުރު ބޯހިޔާވަހިކަމެއް ހޯދުމުގެ މަގު ތަނަވަސްކޮށްދިނުމެވެ.
މީގެއިތުރުން، އެހެން ފަރާތަކާ ގުޅިގެން ނުވަތަ "ޖޮއިންޓް" ކޮށް ބޯހިޔާވަހިކަން ލިބިފައިވާ ފަރާތްތަކަށް ވެސް ވަކިވަކިން ކުރިމަތިލުމުގެ ފުރުސަތު މި ފަހަރު ލިބިގެންދާނެއެވެ. ނަމަވެސް މިކަން ކުރެވޭނީ، ލިބިފައިވާ ޖޮއިންޓް ބޯހިޔާވަހިކަން ދޫކޮށްލުމަށް އެ ބޯހިޔާވަހިކަމެއްގައި ޝާމިލުވާ ހުރިހާ ފަރާތްތަކުން އެއްބަސްވާނަމައެވެ. "ބިންވެރިޔާ" ސްކީމުގެ ދަށުން ގޯތި ލިބިފައިވާ މީހުންނަށް ވެސް މި އުސޫލު ހިނގާނެ ކަމަށާއި، ގޯތި ދޫކޮށްލަން އެއްބަސްވާނަމަ ވަކިވަކިން ގޯއްޗަށް އެދުމުގެ ފުރުސަތު އޮންނާނެ ކަމަށް މިނިސްޓަރު ވިދާޅުވިއެވެ.
މި ފަހަރުގެ މަޝްރޫއުގެ ދަށުން ޖުމުލަ 15,000 ގޯތި ދޫކުރުމަށް ހަމަޖެހިފައިވާއިރު، މިއީ ކޮންމެ ގޯއްޗެއްގައި 1,250 އަކަފޫޓު ހުންނަ ބިންތަކެކެވެ. މާލޭގެ ރަށްވެހިންނަށާއި ޚާއްސަ ކެޓަގަރީތަކަށް ގޯތި ދޫކުރާނީ ގްރޭޓަރ މާލެ ސަރަޙައްދުންނާއި ރަސްމާލެއިންނެވެ. އަދި މާލޭގައި ދިރިއުޅޭ އެހެން ރަށްރަށުގެ މީހުންނަށް ގޯތި ލިބޭނީ ރަސްމާލެއިންނެވެ. މީގެ އިތުރުން 7,900 ފްލެޓް ދޫކުރުމަށް ނިންމާފައިވާއިރު، އޭގެ ތެރެއިން 4,000 ފްލެޓް މާލޭ ރަށްވެހިންނަށް، 1,500 ފްލެޓް މާލޭގައި އުޅޭ އެހެން ރަށްރަށުގެ މީހުންނަށް އަދި 2,400 ފްލެޓް ޚާއްސަ އެހީއަށް ބޭނުންވާ ފަރާތްތައް ފަދަ އިސްކަންދޭ ކެޓަގަރީތަކަށް ވަނީ ކަނޑައަޅާފައެވެ.
ކޮމެންޓު ފޮނުވާ