ހޮނިހިރު ދުވަހު އީރާނުން އަމާޒުކުރި ގިނަ އަދަދެއްގެ މިސައިލްތަކެއް ޔުނައިޓެޑް އަރަބް އެމިރޭޓްސް (ޔޫއޭއީ) ގެ ވައިގެ ސަރަހައްދުން ހުއްޓުވައި، އެ ހަމަލާތައް ނާކާމިޔާބުކޮށްލާފައިވާ ކަމަށް އެ ގައުމުން ހާމަކޮށްފިއެވެ. ނަމަވެސް، މި ހާދިސާގައި ވައިގެ ތެރެއަށް ގޮއްވާލި މިސައިލްތަކުގެ ބައިތައް ވެއްޓުމުގެ ސަބަބުން އެކަކު ވަނީ މަރުވެފައެވެ.
މި ހަމަލާތަކަކީ ހޮނިހިރު ދުވަހުގެ ކުރީކޮޅު އެމެރިކާއާއި އިޒްރޭލުން ގުޅިގެން އީރާނަށް ދިން ހަމަލާތަކުގެ ރައްދުގައި އީރާނުން ދިން ހަމަލާތަކެއް ކަމަށް މަސްރަހު ދިރާސާކުރާ ފަރާތްތަކުން ބުނެއެވެ. ޔޫއޭއީގެ ރަސްމީ ނޫސް އޭޖެންސީ "ވަމް" އިން މައުލޫމާތު ދީފައިވާ ގޮތުގައި، ވައިގެ ދިފާއީ ނިޒާމުން މިސައިލްތައް ގޮއްވާލުމުން އޭގެ ބައިތައް ވެއްޓިފައިވަނީ މީހުން ދިރިއުޅޭ ސަރަހައްދަކަށެވެ. މި ހާދިސާގައި މަރުވެފައިވަނީ އޭޝިއާ ނަސްލަށް ނިސްބަތްވާ މީހެއް ކަމަށް ބުނި ނަމަވެސް، އެއީ ކޮން ގައުމެއްގެ ރައްޔިތެއްކަން އަދި ހާމަކޮށްފައެއް ނުވެއެވެ.
ޔޫއޭއީގެ ޑިފެންސް މިނިސްޓްރީން ވަނީ މި އަމަލު ވަރަށް ބޮޑަށް ކުށްވެރިކޮށްފައެވެ. އެ މިނިސްޓްރީން ނެރުނު ބަޔާނެއްގައި ސިފަކޮށްފައިވާ ގޮތުގައި މިއީ ގައުމުގެ އިސްތިގުލާލާއި ބައިނަލްއަގުވާމީ ގާނޫނުތަކާ ކަނޑައެޅިގެން ޚިލާފު އަމަލެކެވެ. އަދި ގައުމުގެ ސަރަހައްދާއި ރައްޔިތުންގެ ރައްކާތެރިކަން ކަށަވަރުކުރުމަށްޓަކައި އަޅަންޖެހޭ ކޮންމެ ފިޔަވަޅެއް އެޅުމާއި، މިފަދަ ހަމަލާތަކަށް ރައްދު ދިނުމުގެ ފުރިހަމަ ހައްގު ޔޫއޭއީއަށް ލިބިގެންވާކަމަށް ވެސް އެ ބަޔާނުގައިވެއެވެ.
އެމެރިކާގެ އަސްކަރީ މަރުކަޒުތައް ވެސް ގާއިމުކޮށްފައިވާ އަބޫދާބީ އާއި ދުބާއީގައި ދިރިއުޅޭ އާންމުންނާ ހަވާލާދީ "އަލް އަރަބިއްޔާ އިންގްލިޝް" އިން ރިޕޯޓްކޮށްފައިވާ ގޮތުގައި، އެ ސިޓީތަކަށް ވަރަށް ބާރުގަދަ ގޮވުންތަކެއްގެ އަޑު އިވިފައިވެއެވެ. މި ނުރައްކާތެރި ހާލަތާ ގުޅިގެން ރައްކާތެރިކަމުގެ ފިޔަވަޅެއްގެ ގޮތުން ޔޫއޭއީގެ ވައިގެ ސަރަހައްދު ވަގުތީ ގޮތުން ބަންދުކުރަން ޖެހުނެވެ. މީގެ ސަބަބުން އެ ގައުމަށް ޖައްސަން އޮތް ފްލައިޓްތަކަށާއި ފުރަން ހަމަޖެހިފައިވާ ބައެއް ފްލައިޓްތަކުގެ ޝެޑިއުލަށް ވަނީ ބަދަލުތަކެއް އައިސްފައެވެ.
ކޮމެންޓު ފޮނުވާ