މާލޭގެ އުތުރު ފަރާތު ބޮޑުތަކުރުފާނު މަގު ހަތަރު ލޭނަށް ބަދަލުކޮށް ޒަމާނީ ފެންވަރަށް ތަރައްގީކުރުމަށް ހިންގާ ބިޔަ މަޝްރޫއުގެ ދެވަނަ ސެގްމެންޓުގެ ޝީޓްޕައިލިންގެ މަސައްކަތް އެއްކޮށް ނިންމާލައިފިކަމަށް، އެ މަސައްކަތް ކުރަމުން އަންނަ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން ހާމަކޮށްފިއެވެ.
އެ ކުންފުނިން މިއަދު އާންމުކުރި މައުލޫމާތުތަކަށް ބަލާއިރު، ބާޒާރުމަތި ހިމެނޭހެން ކުރިއަށްގެންދާ މި ދެވަނަ ސެގްމެންޓުގެ 260 މީޓަރުގެ ސަރަހައްދެއްގައި ޝީޓްޕައިލް ކުރުމުގެ މަސައްކަތް މިހާރު ވަނީ ސަތޭކަ އިންސައްތަ ނިމިފައެވެ. މީގެ އިތުރުން، އެ ސަރަހައްދުގެ 105 މީޓަރުގެ ކުއޭ ވޯލް ކެޕިން ކޮންކްރީޓް މަސައްކަތް ނިންމާލެވިފައިވާއިރު، މަގު ފުޅާކުރުމަށް ބޭނުންވާ ބިން ހިއްކުމުގެ 65 އިންސައްތަ މަސައްކަތް ވެސް މިހާރު ވަނީ ފުރިހަމަކުރެވިފައެވެ.
ޖުމްލަ ތިން ބަޔަކަށް (ސެގްމެންޓަށް) ބަހާލައިގެން ކުރިއަށް ގެންދާ މި މަޝްރޫއުގެ އަމަލީ މަސައްކަތް ފަށާފައިވަނީ މިއަހަރުގެ އޮގަސްޓް މަހުގެ 22 ވަނަ ދުވަހުއެވެ. މި މަޝްރޫއުގެ ދަށުން މުޅި ޖުމްލަ 830 މީޓަރުގެ މަގެއް ހެދުމަށް ހަމަޖެހިފައިވާއިރު، އޭގެ ތެރެއިން 737 މީޓަރުގެ ސަރަހައްދެއްގައި ޝީޓް ޕައިލް ކުރެވޭނެއެވެ. ފާހަގަކޮށްލެވޭ ގޮތުގައި، މި މަޝްރޫއުގެ ފުރަތަމަ ސެގްމެންޓުގެ މަސައްކަތްތައް މީގެ ކުރިން ނިންމައި، އެ ސަރަހައްދު މިހާރު ވަނީ އާންމު ދަތުރުފަތުރަށް ހުޅުވާލާފައެވެ.
މި މަޝްރޫއު ނިމިގެންދާއިރު ހުޅުމާލެ ފެރީ ޓާމިނަލުން ފެށިގެން ލޯކަލް މާރުކޭޓާ ހަމަޔަށް ތާރު އަޅައި، ފެން ހިންދާ ނިޒާމާއި ދުވާރުތަކުގެ އިތުރުން މަގުމަތީގެ ނިޝާންތަކާއި ބޯޑުތައް ހަރުކުރެވިގެންދާނެއެވެ. ދައުލަތުގެ ބަޖެޓުން 144.5 މިލިއަނަށްވުރެ ގިނަ ރުފިޔާ ޚަރަދުކޮށްގެން ހިންގާ މި މަޝްރޫއު އެމްޓީސީސީއާ ހަވާލުކުރެވުނީ މިއަހަރުގެ އޭޕްރީލް މަހުގެ ތެރޭގައެވެ. މާލޭގެ އުތުރު ފަރާތަކީ ވިޔަފާރީގެ މައި ސަރަހައްދު ކަމަށްވެފައި، އުޅަނދުތައް ގިނަ ސަރަހައްދަކަށް ވުމުން، ހަތަރު ލޭނަށް މަގު ފުޅާކުރެވިގެން ދިއުމަކީ އެ ސަރަހައްދުގެ ޓްރެފިކަށް ލިބިގެންދާނެ ވަރަށް ބޮޑު ލުޔަކަށް ވާނެކަމަށް ބެލެވެއެވެ.
ކޮމެންޓު ފޮނުވާ