ރާއްޖޭގައި ބިދޭސީން ވަޒީފާ އަދާކުރުމާ ބެހޭ ގަވާއިދަށް މިނިސްޓްރީ އޮފް ހޯމްލޭންޑް ސެކިއުރިޓީ އެންޑް ޓެކްނޮލޮޖީން އިސްލާހު ގެނައުމާ ގުޅިގެން، ދިވެހިންނަށް ފުރުސަތު ދިނުމަށް ގިނަ ދާއިރާތަކަކަށް ބިދޭސީން ގެނައުން މަނާވެއްޖެ އެވެ. މިދިޔަ އާދީއްތަ ދުވަހު ގެނެސްފައިވާ މި އިސްލާހުން، ކެބިނެޓުން ކަނޑައަޅާފައިވާ ދާއިރާތަކުން މިހާރު ދޫކޮށްފައިވާ ކޯޓާތައް ބާތިލުކުރުމަށް ވަކި މުއްދަތުތަކެއް ވަނީ ކަނޑައަޅާފަ އެވެ.
އަލަށް ގެނެސްފައިވާ އިސްލާހުގެ ދަށުން، ބައެއް ވަޒީފާތަކުގެ ކޯޓާތައް ދެ އަހަރުން ފެށިގެން ފަސް އަހަރާ ހަމައަށް ތަފާތު މުއްދަތުތަކުގައި ބާތިލުކުރަން ވަނީ ކަނޑައަޅާފަ އެވެ. އެގޮތުން ހެއާ ޑްރެސަރުން، ބިއުޓީޝަނުން، ބޭބީ ސިޓާސް، ޕާސަނަލް ޓްރެއިނާސް، އިލެކްޓްރީޝަނުން، ގެސްޓް ރިލޭޝަން އޮފިސަރުން، ޓުއާ ގައިޑުން، އެކައުންޓެންޓުންނާއި އިމާމުންގެ ކޯޓާތައް ދެ އަހަރުގެ ތެރޭގައި ބާތިލުކުރަން ވާނެ އެވެ.
ތިން އަހަރުގެ މުއްދަތަކަށް ފަހު ޑައިވަރުން، ނަރުހުން، ބިލްޑިން އިންސްޕެކްޓަރުން، ސޭވޭޔަރުން، ސައިޓް ސުޕަވައިޒަރުންނާއި ޕައިލެޓުންގެ ކޯޓާތައް ބާތިލުވާނެ އެވެ. އަދި ހަތަރު އަހަރު ފަހުން އިލެކްޓްރިކަލް އިންޖީނިއަރުންނާއި ޑައިވް އިންސްޓްރަކްޓަރުންގެ ކޯޓާތައް ވަނީ ބާތިލުކުރަން ތާވަލުކޮށްފަ އެވެ. ފަސް އަހަރުން ފަހު ހައުސް ކީޕިން މެނޭޖަރުން، ހިއުމަން ރިސޯސް މެނޭޖަރުން، ފްރަންޓް އޮފީސް މެނޭޖަރުންނާއި ޕްރައިމަރީ އަދި ސެކަންޑަރީ ޓީޗަރުންގެ ކޯޓާތައް ބާތިލުވާނެ އެވެ.
މިއީ ސަރުކާރުން ގަވައިދާ ހިލާފަށް އުޅޭ ބިދޭސީންގެ މައްސަލަ ހައްލުކުރުމަށް ކުރަމުންދާ ބޮޑު މަސައްކަތުގެ ބައެއް ކަމުގައިވާއިރު، މި އޮޕަރޭޝަނުގައި ގިނަ ބިދޭސީން ޑީޕޯޓްކޮށް، 191،723 ބިދޭސީންގެ ބަޔޯމެޓްރިކްސް ނަގައި ރަޖިސްޓްރީކުރުމުގެ މަސައްކަތް މިހާތަނަށް ވަނީ ނިންމާފަ އެވެ.
ކޮމެންޓު ފޮނުވާ