އެމްޑީޕީން މިހާރު ތަޖުރިބާ ކުރަމުންދަނީ އުނދަގޫ ދުވަސްތަކެއް ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ. އެކްސްގައި ކުރެއްވި ޕޯސްޓެއްގައި ނަޝީދު ވިދާޅުވީ ޕާޓީ މި ހާލަތުން އަރައިގަންނާނެ ކަމާ މެދު ޝައްކު ނުކުރައްވާ ކަމަށާއި، ގިނަ މެންބަރުންނަށް ޕާޓީގެ އެއްބައިވަންތަކަން މުހިންމު ކަމަށެވެ.
ނަޝީދު މިހެން ވިދާޅުވެފައި މިވަނީ ޗެއާޕާސަން ފައްޔާޒު އިސްމާއިލް ކުއްލިއަކަށް އިސްތިއުފާ ދެއްވުމާ ގުޅިގެން ވަގުތީ ޗެއާޕާސަނެއް ހޮވަން ރޭ ބޭއްވި ގައުމީ މަޖިލީހުގެ ޖަލްސާ ހޫނުވެ، ކުރިޔަށް ނުގެންދެވިގެން ހުއްޓާލާފައި ވަނިކޮށެވެ. ނަޝީދު ފެކްޝަނުން ހުށަހެޅި އަބްދުﷲ ވަހީދަށް ބޭނުންވާ ވޯޓު ނުލިބުނުއިރު، ރައީސް ސޯލިހް ފަޅިން ހުށަހެޅި އަސްލަމްގެ ނަމާ މެދު ޝަރުތު ހަމަނުވާ ކަމަށް ބުނެ ބޮޑު ޒުވާބެއް ހިނގިއެވެ.
ނަޝީދު އަލުން ޕާޓީއާ ގުޅިވަޑައިގަތް ފަހުން ޕާޓީގެ އެތެރޭގެ ދެބަސްވުންތައް އިތުރަށް ބޮޑުވެފައިވާއިރު، ދާދިފަހުން ވަޓްސްއެޕް ގުރޫޕެއްގައި ނަޝީދާއި ރައީސް ސޯލިހާއި ފައްޔާޒާ މެދު ބަހުގެ ހަމަލާތަކެއް ވެސް ބަދަލުކޮށްފައިވެއެވެ.
ކޮމެންޓު ފޮނުވާ