އީގަލްސްއާ ދެކޮޅަށް މާދަމާ ހަވީރު ކުޅޭ ޔުނައިޓެޑް ވިކްޓްރީ (ޔޫވީ) ވެސް މި ވަގުތު އޮތީ އަނިޔާގެ މައްސަލަތަކުގެ ސަބަބުން ވަރަށް ހާލަތު ގޯސްކޮށް ކަމަށް ޔުނައިޓެޑް ވިކްޓްރީގެ ކޯޗު މުހައްމަދު އާދަމް ބުނެފިއެވެ.
މުހައްމަދު އާދަމް ބުނީ ޓީމުގެ މުހިއްމު ހަތް ވަރަކަށް ކުޅުންތެރިން ތިބީ އަނިޔާގައި ކަަމަށާއި އެހެންވެ އީގަލްސްއާ ދެކޮޅަށް މާ ރަނގަޅު ޓީމެއް ނެރެވޭނެކަމުގެ އުއްމީދު ކުޑަކަމަށެވެ. ޗެރިޓީ ޝީލްޑް މެޗުން މޮޅުވިފަހުން އީގަލްސްގެ މޮޅު ކުޅުން އަދި ނުފެންނަ ކަމަށާއި އީގަލްސް އަށް ވެސް މިހާރު ކުރިމަތިވެފައި އޮތީ އަނިޔާގެ މައްސަލަކަން ފެންނަން އޮތް ކަމަށް މުހައްމަދު ބުނެފައިވެއެވެ. އެހެން ނަމަވެސް ދެ ޓީމު އަޅާކިޔާއިރު ޔުނައިޓެޑް ވިކްޓްރީ އަށް ނެތް އެޑްވާންޓޭޖެއް އީގަލްސް އަށް އޮތް ކަމަށް އޭނާ ދެކެއެވެ.
އަނެއްހެން ފުދޭ ވަރެއްގެ ދެރަކަމެއް. ޔޫވީ ކަހަލަ ބެންޗުގައި މާ ރަނގަޅު ކުޅުންތެރިން ނެތް ޓީމެއްގައި ފުދޭ ވަރަކަށް އުނދަގޫ ސިޓުއޭޝަނެއް.
– މުހައްމަދު ބުނެފައިވެއެވެ.
މުހައްމަދު ބުނީ މިިހާރުގެ ހާލަތަށް ބަލާއިރު އީގަލްސްއާ ދެކޮޅަށް މާ ރަނގަޅު ޓީމެއް ނެރެވޭނެ ކަމުގެ އުންމީދެއް ނެތް ކަމަށެވެ. އެގޮތުން އެންމެ ފަހުން ޓީސީ ސްޕޯޓްސް ކުލަބާ ދެކޮޅަށް ކުޅުނު މެޗުގައި ޔޫވީގެ ދެ ޑިފެންޑަރުން ކަމަށްވާ ޔާސީން ފިރާގާއި އާދިލް އަބްދުލް ރަހްމާނަށް އަނިޔާވިއިރު، އެ ދެ ކުޅުންތެރިން އެނބުރި ކުޅުމުގެ ތެރެއަށް އަންނަން މަހެއްހާ ދުވަސް ނަގާނެ ކަމަށާއި، އެހެންކަމުން އީގަލްސްއާ ދެކޮޅަށް ނުކުންނަން ޖެހޭނީ ޖުމްލަ ހަތް ކުޅުންތެރިއަކު ނުލައި ކަމަށް މުޙައްމަދު އާދަމް ބުންޏެވެ.
އީގަލްސް އަށް މި ހާލަތުގައި ވެސް އިން އެޑްވާންޓޭޖެއް އެއީ ވަރަށް ގިނަ ދުވަސްތަކެއް ވަންދެން އެކީގައި ކުޅޭ ކުޅުންތެރިންތަކެއް ތިބުން. އެގޮތަށް ބަލާއިރު ޔޫވީގެ މައްސަލައަކީ އެބަތިބި ހައެއް ނޫނީ ހަތް ވަރަކަށް ކުޅުންތެރިން އަލަށް ޖޮއިންކޮށްގެން ފުރަތަމަ އެގާރައިގައި ކުޅޭ. އެއީ އިން ޑިސެޑްވާންޓޭޖެއް ޔޫވީ އަށް އެ ގޮތުން ބަލާއިރު.
މުހައްމަދު ބުނެފައިވެއެވެ.
އީގަލްސް އާއި ޔުނައިޓެޑް ވިކްޓަރީ އަކީ މި ފަަހަރުގެ ލީގުގައި މޮޅެއް ނުލިބި އޮތް ތިން ޓީމުގެ ތެރެއިން ދެ ޓީމެވެ.
ކޮމެންޓު ފޮނުވާ