ބައިނަލްއަގްވާމީ ފެންވަރުގެ ސްވިމިން ކޮމްޕްލެކްސް އެއް އެޅުމަށް ވިޔަފާރިވެރިންތަކެއް 50 މިލިއަން ރުފިޔާ ދޭން އެއްބަސްވެފައިވާ ކަމަށާއި ސަރުކާރުން ދީފައިވާ ބިމުގައި އެތަން ބިނާކުރުމުގެ މަސައްކަތް ފަށަން ތައްޔާރުވަމުން އަންނަ ކަމަށް ސްވިމިން އެސޯސިއޭޝަނުން ބުނެފި އެވެ.
ސްވިމިން އެސޯސިއޭޝަނުގެ ނައިބް ރައީސް އިސްމާއިލް އަލީ ވިދާޅުވީ ސަރުކާރުން ބިމެއް ހަމަޖައްސައި ދެނިކޮށް، އިންވެސްޓަރުން ހޯދައިގެން ދުނިޔޭގެ ފެންވަރުގެ ޕޫލެއް އަޅަން އެސޯސިއޭޝަނުން އައީ ކުރީއްސުރެ މަސައްކަތްކުރަމުން ކަމަށާއި މި މަސައްކަތަށް ދުވެލި ލިބުނީ މި ސަރުކާރުން ބިން ހަމަޖައްސައިދިނުމުން ކަމަށެވެ. ފަންޑް ހަމަޖެހިފައިވަނީ 50 މީޓަރުގެ އޮލިމްޕިކް ސައިޒުގެ ޕޫލާއި 25 މީޓަރުގެ ޓްރެއިނިން ޕޫލް އަދި ކުޅިބަލާނެ ސަރަހައްދެއް ތަރައްގީ ކުރާށެވެ. އެސޯސިއޭޝަނުން ރާވާފައި އޮތީ އިތުރު ފަންޑް ހޯދައިގެން ކޮމްޕްލެކްސް އިތުރަށް ތަރައްގީކުރާށެވެ. އެގޮތުން އެތަން ބަލަހައްޓައި މަރާމާތަށް ބޭނުންވާ ފައިސާ ލިބޭނެ ފަދަ ވަސީލަތްތަކެއް ކޮމްޕްލެކްސްގައި ގާއިމްކުރަން ވަނީ ވިސްނާފަ އެވެ.
ޕޫލް އަޅަން ސަރުކާރުން އެސޯސިއޭޝަނަށް ދިނީ ކުރީގެ އެއް ނަމްބަރު ކޮށި 50 އަހަރަށެވެ. ކުރެހުން ނިމި ޕްލޭނިން މިނިސްޓްރީންނާއި ސިޓީ ކައުންސިލުން ހުއްދަތައް ދިނުމާ އެކު އަންނަ މަހުގެ ތެރޭގައި މަސައްކަތް ފެށޭނެ ކަމަށް އިސްމާއިލް އުއްމީދުކުރައްވަ އެވެ. އަމާޒަކީ ލަސްވެގެން 18 މަސް ދުވަހުގެ ތެރޭގައި ކޮމްޕްލެކްސްގެ ޕޫލް ބޭނުންކުރަން ފެށުމެވެ.
ކޮމެންޓު ފޮނުވާ