މ. ކޮޅުފުށީގެ މަގުތައް ތަރައްޤީކުރުމުގެ މަސައްކަތާއި، ފިޓްނަސް އެންޑް ރިކްރިއޭޝަން ސެންޓަރު ޤާއިމުކުރުމުގެ މަސައްކަތް މިއަދު ރަސްމީކޮށް ފެށިއްޖެއެވެ. މި ދެ ބޮޑު މަޝްރޫޢުގެ މަސައްކަތް ފައްޓަވައިދެއްވީ މ. އަތޮޅަށް ކުރައްވަމުން ގެންދަވާ ދަތުރުފުޅުގެ ތެރެއިން ކޮޅުފުށްޓަށް ވަޑައިގެންނެވި ރައީސުލްޖުމްހޫރިއްޔާ ޑރ. މުހައްމަދު މުއިއްޒެވެ.
ކޮޅުފުށީގެ މަގުތައް ތަރައްޤީކުރުމުގެ މަސައްކަތް ފައްޓަވައިދެއްވުމުގެ ރަސްމިއްޔާތު ބޭއްވި އިރު، އެ ރަސްމިއްޔާތުގައި ގެދޮރުވެރިކަމާއި ބިމާއި އުމްރާނީ ތަރައްޤީއާ ބެހޭ ވަޒީރު ޑރ. އަބްދުﷲ މުއްތަލިބް ބައިވެރިވެވަޑައިގެންނެވިއެވެ. އަދި އާރްޑީސީގެ މެނޭޖިން ޑިރެކްޓަރު އިބްރާހިމް ނަޒީމާއި ކޮޅުފުށީ ކައުންސިލްގެ ރައީސް އަބްދުﷲ އަލީމް ވެސް ބައިވެރިވެވަޑައިގެންނެވިއެވެ.
ފިޓްނަސް އެންޑް ރިކްރިއޭޝަން ސެންޓަރުގެ މަސައްކަތް ފައްޓަވައިދެއްވުމުގެ ރަސްމިއްޔާތު ވަކިން ބޭއްވުނު އިރު، އެ ރަސްމިއްޔާތުގައި މާލީ ކަންކަމާއި ތަރައްޤީގެ ރޭވުންތެރިކަމާ ބެހޭ ވަޒީރު މޫސާ ޒަމީރު ބައިވެރިވެވަޑައިގެންނެވިއެވެ. މީގެ އިތުރުން މުލަކު ދާއިރާގެ މެންބަރު އިބްރާހިމް ނައުފަލާއި، ކޮޅުފުށީ ކައުންސިލްގެ ރައީސް އަބްދުﷲ އަލީމް އަދި އެމްޓީސީސީގެ މެނޭޖިން ޑިރެކްޓަރު ޑީސީޕީ (ރިޓަޔާޑް) އަހުމަދު ސައުދީ ވެސް ބައިވެރިވެވަޑައިގެންނެވިއެވެ.
ރައީސް ޑރ. މުހައްމަދު މުއިއްޒުގެ ރިޔާސީ ވައުދުފުޅެއްގެ ގޮތުގައި 2026 ވަނަ އަހަރުގެ ނިޔަލަށް ރާއްޖޭގައި މީހުން ދިރިއުޅޭ ހުރިހާ ރަށެއްގައި ފިޓްނަސް އެންޑް ރިކްރިއޭޝަން ސެންޓަރުތައް ޤާއިމުކުރުމަށް ވަނީ ވައުދުވެވަޑައިގެންފައެވެ. މި ސެންޓަރުތަކަކީ ރައްޔިތުންނަށް އެކި ވައްތަރުގެ ކަސްރަތުތަކާއި ކުޅިވަރުތައް ކުޅެވޭނެ ވަސީލަތްތައް ޤާއިމުކޮށް، ދުޅަހެޔޮ ސިއްޙަތެއްގައި ދިރިއުޅުމަށް ހިތްވަރުދިނުމުގެ މަޤްޞަދުގައި ސަރުކާރުން ކުރައްވާ މުހިންމު އިންވެސްޓްމަންޓެއް ކަމުގައި ފާހަގަކުރެވެއެވެ.
ކޮޅުފުށްޓަކީ މ. އަތޮޅުގެ އެންމެ ބޮޑު އާބާދީ ހިމެނޭ ރަށްތަކުގެ ތެރެއިން ރަށެއް ކަމުން، މި ދެ މަޝްރޫޢު ފެށުމުން އެ ރަށުގެ ރައްޔިތުންނަށް ލިބޭނެ ފައިދާތައް ވަރަށް ބޮޑު ކަމުގައި ބެލެވެއެވެ. މަގުތައް ތަރައްޤީކުރުމުން ދަތުރުފަތުރުގެ ފަސޭހަކަން އިތުރުވުމާއެކު، ފިޓްނަސް ސެންޓަރު ޤާއިމުވުމުން ޒުވާނުންނާއި އުމުރުން ދުވަސްވީ ފަރާތްތަކަށް ވެސް ކަސްރަތުކޮށް ދުޅަހެޔޮ ސިއްޙަތެއްގައި ތިބުމުގެ ފުރުޞަތު ފަހިވެގެންދާނެއެވެ.
ކޮމެންޓު ފޮނުވާ