މ. ވޭވަށުގެ ތަރައްޤީއަށް ރޭވިފައިވާ މަޝްރޫޢުތައް އަވަސް ދުވެލީގައި ކުރިއަށް ގެންދަވާނެ ކަމުގެ ޔަޤީންކަން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ދެއްވައިފިއެވެ. މިކަން ރައީސް ހާމަކުރެއްވީ މިއަދު ވޭވަށު ސްކޫލުގައި ބޭއްވި ރައްޔިތުންނާއެކު ބޭއްވި މަޝްވަރާ ބައްދަލުވުމުގައެވެ.
ރަށުގެ ކައުންސިލާއި ރައްޔިތުން މި ބައްދަލުވުމުގައި ފާހަގަކުރެއްވީ ރަށުގެ އިޖުތިމާޢީ ތަރައްޤީއަށް މުހިންމު ކަންކަމެވެ. ރައްޔިތުން އެދިވަޑައިގަތީ ކުޅިވަރު ކުޅޭނެ ދަނޑުތައް ތަރައްޤީކޮށްދިނުމާއި، ފަތުރުވެރިކަން ކުރިއެރުވުމަށް މަގުފަހިވާނެ ގޮތަކަށް ވަސީލަތްތައް ޤާއިމުކޮށްދިނުމަށެވެ. މީގެ އިތުރުން ބޯހިޔާވަހިކަމުގެ މަޝްރޫޢެއް ހިންގުމާއި، ސްކޫލުގައި ދިމާވެފައިވާ ޖާގައިގެ ދަތިކަން ހައްލުކުރުމަށްވެސް ރައްޔިތުން އެދުނެވެ.
ރައްޔިތުންގެ ކަންބޮޑުވުންތަކަށް ރިޢާޔަތްކުރައްވައި ރައީސް ވިދާޅުވީ، ރަށުގެ ތަރައްޤީއަށް ކުރަންޖެހޭ މަސައްކަތްތައް އަވަހަށް ފަށައިގަންނަވާނެ ކަމަށެވެ. ބަނދަރު ތަރައްޤީކުރުމުގެ މަޝްރޫޢު 2026 ވަނަ އަހަރުގެ ބަޖެޓުގައި ހިމެނުމަށް ރައީސް ވިދާޅުވިއެވެ. ހަމައެއާއެކު 2026 ވަނަ އަހަރުގެ ދިރާސީ އަހަރު ފެށުމުގެ ކުރިން ސްކޫލުގެ ޖާގައިގެ މައްސަލައަށް ހައްލެއް ހޯދައިދޭނެކަމަށްވެސް ރައީސް ޔަޤީންކަން ދެއްވިއެވެ.
ކުޅިވަރުގެ ދާއިރާ ތަރައްޤީކުރުމަށް ބޭނުންވާ ކަންކަން ފުރިހަމަކުރުމާއި، ހެލްތު ސެންޓަރު ތަރައްޤީކުރުމުގެ މަސައްކަތް މި އަހަރު ތެރޭގައި ފެށޭނެކަމަށްވެސް ރައީސް ވިދާޅުވިއެވެ. އަމާޒަކީ މިހާރު ހުއްޓިފައިހުރި މަޝްރޫޢުތައް މި އަހަރާއި އަންނަ އަހަރުގެ ފުރަތަމަ ބައިގައި ނިންމާލުން ކަމަށްވެސް ރައީސް މުއިއްޒު ވިދާޅުވިއެވެ.
ކޮމެންޓު ފޮނުވާ