އިނގިރޭސި ލީގު ކަޕްގެ ސެމީ ފައިނަލުގައި މެންޗެސްޓާ ޔުނައިޓެޑް 2-0 އިން ބަލިކޮށް އެންމެ ފަހުގެ ޗެމްޕިއަން މެންޗެސްޓާ ސިޓީން މުބާރާތުގެ ފައިނަލުން ޖާގަ ހޯދައިފިއެވެ.
ފުރަތަމަ ހާފުގައި ސިޓީ އަށް ލީޑުނަގައިދޭން ކެވިން ޑިބްރޭނާ ޖެހި ބޯޅަ އަމާޒުވީ ގޯލުގެ ދަނޑިއަށެވެ. ސިޓީން ދެ ގޯލު ޖެހީ ވެސް ދެ ވަނަ ހާފުގައެވެ. ފުރަތަމަ ގޯލު މެޗުގެ 50 ވަނަ މިނިޓްގައި ކާމިޔާބުކުރީ ޖޯން ސްޓޯންސް އެވެ. ސިޓީ އަށް ފައިނަލުގެ ޖާގަ ކަށަވަރުކޮށްދިނީ ފެނާންޑީނިއޯ އެވެ. މެޗު ނިމެން ހަތް މިނިޓަށް ވެފައި ހުއްޓައި ފެނާންޑީނިއޯ އޭރިއާބޭރުން ޖެހި ބޯޅަ ގޯލަށް ވަނީ ތިިރިތިރިން ގޮހެވެ.
ފައިނަލުގައި ސިޓީ ކުޅޭނީ ފުރަތަމަ ސެމީގައި ބްރެންޓްފޯޑް އަތުން މޮޅުވި ޓޮޓެންހަމް ހޮޓްސްޕާސްއާ ދެކޮޅަށެވެ. ޓޮޓެންހަމްގެ ކޯޗު ހޯސޭ މޮރީނިއޯ މި މުބާރާތުގެ ފައިނަލުގައި މިހާތަނަށް ބަލިވެފައިނުވެ އެވެ. އަނެއްކޮޅުން ސިޓީ ވަނީ މިދިޔަ ތިން އަހަރު ވެސް މި މުބާރާތުގެ ފައިނަލުން މޮޅުވެފަ އެވެ. މިއީ 2011 ވަނަ އަހަރުގެ ސްޕެއިނުގެ ކޮޕަ ޑެލް ރޭ އަށް ފަހު ކަޕް ފައިނަލެއްގައި މޮރީނިއޯ އާއި ސިޓީގެ ކޯޗު ޕެޕް ގާޑިއޯލާ ކުރިމަތިލާނެ ފުރަތަމަ ފަހަރެވެ.
ކޮމެންޓު ފޮނުވާ