ރެއާލްއިން އަނެއްކާވެސް މުސާރަ ކުޑަ ކޮށްފި

ކޯވިޑް-19 އާ ގުޅިގެން ކުރިމަތި ވެފައިވާ ހާލަތުގެ ސަބަބުން، ރެއާލް މެޑްރިޑްގެ މުސާރަތައް އަނެއްކާ ވެސް ކުޑަ ކުރަން އެ ކުލަބުން ނިންމައިފި އެވެ.

ސީޒަން ދެބައިވާން ކައިރިވެފައިވާއިރު، އެ ކުލަބުން ވަނީ އެއްބައިގެ މުސާރައިގެ ވެސް 10 ޕަސަންޓް އުނި ކުރަން ހުށަހަޅާފައެވެ. މިދިޔަ ސީޒަންގެ ފަހުބައިގަ މުސާރަތައް ވެސް ދިނީ 10 ޕަސަންޓް އުނި ކުރުމަށް ފަހު އެވެ. އަދި ފުޓްބޯޅަ ހުއްޓާލަން ޖެހުނު މުއްދަތުގެ މުސާރަތައް ދީފައި ވަނީ 20 ޕަސަންޓް ކުޑަ ކުރުމަށް ފަހުއެވެ.

އެ ކުލަބުގެ ފުޓްބޯޅަ ޓީމަށާއި ބާސްކެޓްބޯޅަ ޓީމަށް މިހާރު ވަނީ، ސީޒަންގެ ފުރަތަމަ ބައިގެ މުސާރަތައް ދީފައެވެ. ފުރަތަމަ ބައިގަ މުސާރަތައް ދިނީ 10 ޕަސަންޓް އުނި ކުރުމަށް ފަހުއެވެ. ރެއާލްގެ މި ސީޒަންގެ ބަޖެޓް 900 މިލިއަން ޔޫރޯ އަށް ހަދާނެ ކަމަށް ބެލެވުނު ނަމަވެސް، ކުލަބުގެ ކޮންގްރެސްއިން ފާސް ކުރީ 618 މިލިއަން ޔޫރޯގެ ބަޖެޓެކެވެ.

މިދިޔަ 40 އަހަރުގައި ޓްރާންސްފާގައި އެ ކުލަބުން އެއްވެސް ހަރަކާތެއް ނުހިންގާ ހަމައެކަނި މި ސީޒަނެވެ.