ސިޓީގެ އަމާޒު ކޭން އަދި ސަން އަށް

އިނގިރޭސި ޤައުމީ ޓީމުގެ ފޯވާޑް އަދި ކެޕްޓަން ހެރީ ކޭން ހޯދުމަށް 90 މިލިއަން ޕައުންޑްގެ ބިޑެއް ހުށައަޅަން ވާދަވެރި މެންޗެސްޓަރ ސިޓީން މަސައްކަތްކުރަމުން އަންނަ ކަމަށް މީޑިއާ ރިޕޯޓުތައް ބުނެފިއެވެ.

ކޭން ވަނީ ޕްރިމިއަރ ލީގުގައި މިހާތަނަށް ހޭދަކުރި ހަ ސީޒަނުގެ ތެރެއިން ދެ ސީޒަނެެއްގެ ގޯލްޑަން ބޫޓު އެވޯޑު ހޯދާފައެވެ. މީޑިއާ ރިޕޯޓުތައް ބުނާގޮތުން ސިޓީން ދަނީ ޓޮޓެންހަމްގެ ދެކުނު ކޮރެއާ ފޯވާޑް ސަން އަށް ބިޑުކުރުމަށް ވެސް ތައްޔާރުވަމުންނެވެ. މި ދެ ކުޅުންތެރިންނަކީ ޓޮޓެންހަމްގެ ހަމަލާތަކުގައި އެންމެ އިސް ދައުރެއް އަދާކުރާ ކުޅުންތެރިންނެވެ.

އަންނަ ހޫނު މޫސުމުގައި މި ބިޑުކުރަން ސިޓީން ތައްޔާރުވަމުން އަންނައިރު، ރިޕޯޓުތައް ބުނާގޮތުން ސިޓީން މި ބިޑު ކުރަނީ އެ ޓީމަށް ގިނަ އަހަރުތަކެއްް ވަންދެން ކުޅެމުން އަންނަ އާޖެންޓީނާގެ ތަރި ސާޖިއޯ އަގުއެރޯގެ ބަދަލުގައެވެ. ސިޓީގެ ބޯޑުން ނިންމާފައިވަނީ އަގުއެރޯ ގެ ބަދަލުގައި އެހެން ކުޅުންތެރިއަކު ވީ އެންމެ އަވަހަކަށް ގެނައުމަށް ކަމަށްވެސ ރިޕޯޓުތައް ބުނެއެވެ.

ކޭން ވަނީ އެންމެފަހުން އެ ޓީމު ކުޅުނު 15 މެޗުގައި ނުވަ ގޯލު ޖަހާފައެވެ. އަދި 10 ފަހަރު އެސިސްޓް ނުވަތަ ގޯލު ޖެހުމަށް އެހީތެރިވިއެވެ. މެންޗެސްޓަރ ސިޓީއާއެކު އަގުއެރޯ ވަނީ މިހާތަނަށް 378 މެޗު ކުޅެ، 256 ގޯލު ޖަހާފައެވެ.