ފަހު މިނިޓު ޖެހި ލަނޑުން ޓީސީއަށް ޕޮއިންޓެއް

ދިވެހި ޕްރިމިއާ ލީގުގައި  ޔުނައިޓެޑް ވިކްޓްރީ މޮޅުވާން ދަނިކޮށް މެޗުގެ ފަހު މިނެޓުގައި ޓީސީ ސްޕޯޓްސް ކްލަބުން ނަތީޖާ 1-1 އިން އެއްވަރުކޮށްފިއެވެ.

މެޗުގެ ފުރަތަމަ ހާފުގައި ނުރައްކާތެރި ގިނަ ހަމަލާތައް އުފެއްދީ ޔުނައިޓެޑް ވިކްޓްރީ އިންނެވެ. މި ހާފުގައި އެޓީމުގެ ބިދޭސީ މިޑްފީލްޑަރު އަނަޓޯލީ ވްލަސިޗެވް ފޮނުވާލި ހިލޭ ޖެހުން ގޯލުގެ ތިރީ ކަނަށް އަމާޒުވި ނަމަވެސް ޓީސީ ގޯލްކީޕަރު މަމަދޯފް އާޒާދް ވަނީ ހުށިޔާރުކަމާ އެކު މަތަކޮށްފަ އެވެ. އޭގެފަހުން އަނަޓޯލީ ފޮނުވާލީ ދެ ވަނަ ހިލޭޖެހުން ދިޔައީ ގޯލުގެ ދަނޑި ކައިރިން ބޭރަށެވެ. މެޗުގައި ޓީސީ ޓީމުގެ ކުރިޔަށް ކުޅުނީ ބެލެހެއްޓީ މިދިޔަ ސީޒަނުގެ ފަހުކޮޅު އެޓީމަށް ކުޅުނު ބިދޭސީ ފޯވާޑް ސްޓެވާޓް މެލްކޮމް ކަސިއުސް އެވެ. ޓީމާ ނުގުޅޭތީ ލީގުގެ ފުރަތަމަ ތިން މެޗުގައި މެލްކޮމް ފެނިފައެއްނުވެ އެވެ. ޓީސީ އިން ނުރައްކާތެރި ހަމަލާއެއް ފުރަތަމަ ހާފުގައި އުފައްދާފައި ނުވާއިރު، އެޓީމުން ގޯލާ އަމާޒުކޮށް ދެ ހަމަލާ ވެސް ފޮނުވާލީ ފޯވާޑް މެލްކޮމް ކަސިއުސް އެވެ.

މެޗުގައި ޔުނައިޓެޑް ވިކްޓްރީގެ ލަނޑު 59 ވަނަ މިނެޓުގައި ކާމިޔާބުކޮށްމޮދިނީ މަރަޓް އަދްޒިނިއަޒޯވް އެވެ. އޭރިޔާ ބޭރުން އީސަ ނަގައިދިން ޖެހުން މަރަޓް ބޮލުން ފޮނުވާލި ބޯޅަ ވަނީ ގޯލުގެ މަތީ ކަނަށެވެ. ޓީސީ އިން ނަތީޖާ ހަމަހަމަ ކުރީ މެޗުގެ ފަހު ސިކުންތުކޮޅުގެ ތެރޭގައި ލިބުނު ހިލޭ ޖެހުމަކުން އެވެ. ޔޫވީ ޕެނެލްޓީއޭރިޔާ ބޭރުން އަބްދުލްވާހިދު އިބްރާހީމް (ވާޑު) ނަގައިދިން ބޯޅަ އޭރިޔާ ތެރޭ ހުހަށް ހުރެ ބޮލުން ގޯލުގެ ތެރެއަށް ވައްދާލީ މެޗުގެ މޮޅު ކުޅުންތެރިޔާގެ މަގާމް ހޯދީ ޑިފެންޑަރު މުހައްމަދު އަޖުފާން އެވެ.

މި ނަތީޖާއެކު ޓީސީ މިހާރު ފަސް ޕޮއިންޓާ އެކު ތާވަލުގެ ފަސް ވަނައިގައި އޮތްއިރު ޔުނައިޓެޑް ވިކްޓްރީ އޮތީ ދެ ޕޮއިންޓާ އެކު ހަތް ވަނައިގަ އެވެ. ލީގުގެ މެޗުތައް ދެން ކުޅޭނީ އަންނަ ހޮނިހިރު އަދި އާދީއްތަ ދުވަހު އެވެ.