ސިންގަޕޫރު ދަތުރުފުޅާއެކު ދެ ޤައުމުގެ ގުޅުން އިތުރަށް ބަދަހިވެއްޖެ: ރައީސް

ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ސިންގަޕޫރަށް ކުރެއްވި ރަސްމީ ދަތުރުފުޅު ދަތުރުފުޅަކީ ދެ ޤައުމުގެ ދެމެދުގައި އޮތް ގުޅުން އިތުރަށް ހަރުދަނާކޮށް، އާ ދާއިރާތަކަށް ފުޅާކުރުމަށް މަގުފަހިވެގެންދިޔަ ދަތުރުފުޅެއްކަމަށް ރައީސުލްޖުމްހޫރިއްޔާ ވިދާޅުވެއްޖެއެވެ.

އެކްސްގައި ކުރެއްވި ޕޯސްޓެއްގައި ރައީސް ވިދާޅުވީ، ސިންގަޕޫރުގެ ރައީސް ޝަންމުގަރަނަމް އާއި ބޮޑުވަޒީރު ލޯރެންސް ވޮންގް އަދި އެ ޤައުމުގެ ރައްޔިތުން އެމަނިކުފާނުގެ ދެމަފިރިކަނބަލުންނަށާއި ސަރުކާރުގެ ވަފްދަށް ދެއްވި ހޫނު މަރުހަބާއާއި މެހެމާންދާރީ ވަރަށް ބޮޑަށް ފާހަގަކުރައްވާ ކަމަށެވެ. މި ދަތުރުފުޅުގައި ކުރެވުނު މުހިންމު މަޝްވަރާތަކުގެ ސަބަބުން ދެ ޤައުމުގެ ދެމެދުގައި އޮތް ގުޅުން އިތުރަށް ބަދަހިވެގެންދާނެ ކަމުގެ އުންމީދު ބޮޑުކަމަށްވެސް ރައީސް ފާހަގަކުރެއްވިއެވެ.

މި ތާރީޚީ ދަތުރުފުޅުގައި ދެ ޤައުމުގެ ދެމެދު އެކި ދާއިރާތަކުން ގުޅުން ބަދަހިކުރުމަށްޓަކައި ތަފާތު ފަހުމުނާމާތަކެއްގައި ސޮއިކުރެވިފައިވެއެވެ. އޭގެ ތެރޭގައި ތިމާވެށީގެ ދާއިރާއިން ގުޅިގެން މަސައްކަތްކުރުމާއި، ދެމެހެއްޓެނިވި ތަރައްޤީއަށް ގުޅިގެން މަސައްކަތްކުރުމާއި، މަތީ ތަޢުލީމުގެ ދާއިރާއިން ފުރުސަތުތައް ފަހިކުރުމާއި، ފަންނީ ދާއިރާތަކުން ދިވެހި ޒުވާނުންނަށް ތަމްރީނު ލިބޭނެ ގޮތް ހަމަޖެއްސުން ފަދަ މުހިންމު ކަންކަން ހިމެނެއެވެ.

ހާއްސަކޮށް ފާހަގަކޮށްލެވޭ ކަމަކީ ސިންގަޕޫރުގެ ކޯޕަރޭޝަން އެންޓަޕްރައިޒާއެކު ވެވުނު އެއްބަސްވުމެވެ. މި އެއްބަސްވުމުގެ ދަށުން ދިވެހި ޒުވާނުންނަށް ޤާބިލިއްޔަތުކަން އިތުރުކުރުމުގެ ޕްރޮގްރާމްތަކާއި ޢިލްމީ ދަތުރުތަކުގެ ފުރުސަތުތައް ލިބިގެންދާނެއެވެ.

ދަތުރުފުޅުގެ އެއް މުހިންމު ހަރަކާތަކީ ސިންގަޕޯރ މޯލްޑިވްސް ބިޒްނަސް ފޯރަމެވެ. މި ފޯރަމުގައި ސިންގަޕޫރުގެ ތަފާތު ވިޔަފާރިތަކުން 250 އަށްވުރެ ގިނަ މަންދޫބުން ބައިވެރިވިއެވެ. ރައީސް ފާހަގަކުރެއްވި ގޮތުގައި، މި ފޯރަމުގެ ސަބަބުން ދެ ޤައުމުގެ ވިޔަފާރިވެރިންގެ ދެމެދުގައި ގުޅުން ބަދަހިވެ، އިންވެސްޓްމަންޓާއި ވިޔަފާރީގެ އާ ފުރުސަތުތަކެއް ހުޅުވިގެންދިޔައެވެ.

މިއަހަރަކީ ރާއްޖެއާއި ސިންގަޕޫރާ ދެމެދު ސިޔާސީ ގުޅުން ޤާއިމްވިތާ 50 އަހަރު ފުރޭ އަހަރެވެ. މި ޚާއްސަ މުނާސަބަތުގައި ކުރެވުނު މި ދަތުރުފުޅަކީ ދެ ޤައުމުގެ ގުޅުން އިތުރަށް ހަރުދަނާކޮށް، އާ ހަރުފަތަކަށް ގެންދިއުމަށް މަގުފަހިކޮށްދޭ ދަތުރުފުޅެއްކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވިއެވެ.