ވެލެންސިޔާ އެއްވަނާގައި ދެ ޕޮއިންޓުގެ ލީޑެއް

ދިރާގު ދިވެހި ޕްރިމިއާ ލީގުގައި މިއަދު ހަވީރު ކްލަބް އީގަލްސް 2-0 އިން ބަލިކޮށް ކްލަބް ވެލެންސިއާ ލީގު ތާވަލުގެ އެއް ވަނައަށް އަރައިފި އެވެ.

މެޗުގައި ވެލެންސިއާ އިން ލީޑު ނެގީ އެޓީމަށް ލިބުނު ފުރަތަމަ ފުރުސަތުގަ އެވެ. 17 ވަނަ މިނެޓުގައި އީގަލްސްގެ ހުސައިން އަހުސަމް މޫސާ ވެލެންސިއާގެ އަލީ ފާސިރު (ސެންޓޭ)އަށް ކުރި ފައުލަކުން ލިބުނު ޕެނަލްޓީ ގޯލަށް ވައްދާލީ އަލީ އަޝްފާގް (ދަގަނޑޭ) އެވެ.

އީގަލްސްއަށް އިތުރު މައްސަލަތަކެއް ކުރިމަތިވީ އަނިޔާގެ ސަބަބުން ފުރަތަމަ ހާފުގައި އިތުރު ދެ ބަދަލެއް ކުރަން ޖެހުމުންނެވެ. މިގޮތުން ހިސާމް ސަލީމަށް އަނިޔާވެގެން 42 ވަނަ މިނެޓުގައި އަބްދުﷲ ސަމީހު މޫސާ ކުޅެން އެރިއިރު ފުރަތަމަ ހާފުގެ ފަހު މިނެޓުގައި އަޙްމަދު ރިޒުވާން (ރިޒޭ) އަށް އަނިޔާވުމުގެ ސަބަބުން ބިދޭސީ ފޯވާޑް އެލްޝިހީ ވަނީ ކުޅެން އަރުވައިފަ އެވެ.

ރިޒޭ އަށް އަނެއްކާ ވެސް އަނިޔާވިއިރު ލީގުގެ ފުރަތަމަ ދެ މެޗުގައި ވެސް އަނިޔާގެ ސަބަބުން ރިޒޭ ނުކުޅެ އެވެ. ފުރަތަމަ ހާފުގައި ގިނަ ހަމަލާތައް އުފެއްދީ ވެލެންސިއާ އިންނެވެ. އީގަލްސް އިން ތަނަވަސްކުރި ހަމައެކަނި އެންމެ ފުރުސަތެކެވެ.

އީގަލްސް ޓީމާ އަލަށް ގުޅުނު މިޑްފީލްޑަރ އޮސާމާ މިއަދުގެ މެޗުގެ ފުރަތަމަ އެގާރައިގައި ހިމެނިގެން ކުޅުނުއިރު އަލަށް ގުޅުނު ބިދޭސީ ފޯވާޑް ސަބާ އެލްޝިހީ ކުޅެން އެރީ ބެންޗުންނެވެ. މެޗުގެ ދެ ވަނަ ހާފުގައި އީގަލްސް އިން ވަނީ ކުރިއަށް ޖެހި ގޯލެއް ޖަހަން މަސައްކަތްކޮށްފަ އެވެ. ވެލެންސިއާގެ ދެ ވަނަ ލަނޑު ވެސް ޖެހީ ލިބުނު ޕެނަލްޓީއަކުންނެވެ.

މިއީ ދަގަނޑޭ އަށް އޭރިޔާ ތެރެއިން ކީޕަރު މިލާން ކުރި ފައުލަކަށް ލިބުނު ޕެނަލްޓީއަކުން ސެންޓޭ ކާމިޔާބުކުރި ލަނޑެކެވެ. އީގަލްސްގެ ނާއިމް އަށް މެޗުގެ 87 ވަނަ މިނެޓުގައި ރަތް ކާޑު ދެއްކުމުން އެޓީމުން މެޗު ނިންމާލީ 10 ކުޅުންތެރިންނާއެކު އެވެ. ނާއިމަށް ދެ ވަނަ ރީނދޫ ކާޑާއެކު ރަތް ކާޑު ދެއްކީ ވެލެންސިއާގެ މުޙައްމަދު ސަމްދޫހަށް ގަސްތުގައި ފައުލް ކުރުމުންނެވެ.

ހަތަރު މެޗުން 10 ޕޮއިންޓް ހޯދައި ވެލެންސިއާ އެއް ވަނަ އަށް އެރިއިރު ދެ ވަނައިގައި އޮތީ އަށް ޕޮއިންޓް ހޯދާފައިވާ މާޒިޔާ އެވެ. ތިން ވަނައިގައި އޮތް ދަ ގްރާންޑޭ ސްޕޯޓްސް ކްލަބާއި ހަތަރު ވަނައިގައި އޮތް ސުޕަ ޔުނައިޓެޑް ސްޕޯޓްސް އަށް ލިބިފައިވަނީ ހަ ޕޮއިންޓެވެ.