ކޮލޮމްބިއާގެ އިސް ރިޔާސީ ކެންޑިޑޭޓް މިގުއެލް އުރިބޭއަށް ހޮނިހިރު ދުވަހު ދީފައިވާ ބަޑިގެ ހަމަލާގައި އޭނާގެ ހާލު ނުހަނު ނާޒުކުކަމަށް ރަސްމީ ފަރާތްތަކުން ހާމަކޮށްފިއެވެ. މިވަގުތު އޭނާއަށް ފަރުވާ ދެމުންދަނީ އައިސީޔޫގައި ކަމަށް މެޑިކަލް އޮފިޝަލުން ވަނީ ބުނެފައެވެ.
އެގައުމުގެ ވެރިރަށް ބޮގޯޓާގައި ސަޕޯޓަރުންނާ ބައްދަލުކުރުމަށް ބޭއްވި ސިޔާސީ ރެލީއެއްގައި ވާހަކަ ދައްކަމުންދަނިކޮށް ބައިވެރިންގެ ތެރެއިން މީހަކު އޭނާއާ ވަރަށް ގާތަށް ގޮސް ދީފައިވާ މި ހަމަލާގައި އުރިބޭގެ ބޮލަށް ދެ ވަޒަނާއި ހަށިގަނޑަށް އެއް ވަޒަން ޖެހިފައިވާކަމަށް ތަހުގީގު އިދާރާތަކުން ބުނެއެވެ.
އަންނަ އަހަރު ބާއްވާ ރިޔާސީ އިންތިހާބުގައި އެންމެ ކުރިއަށް އޮތް ކެންޑިޑޭޓުކަމަށް ސިޔާސީ ތަހުލީލުވެރިން ފާހަގަކުރާ އުރިބޭއަށް ދިން މި ހަމަލާގެ ވީޑިއޯތައް މިހާރު ވަނީ ސޯޝަލް މީޑިއާގައި ފެތުރިފައެވެ. އެ ވީޑިއޯތަކުން ފެންނަގޮތުގައި ހަމަލާ ދިނުމާއެކު ސެކިއުރިޓީ އޮފިސަރުން އަވަސްއަރުވައި އޭނާގެ ބޮލުގައި ހިފަހައްޓައިގެން ތަނުން ނެރެގެންދާ މަންޒަރު ފެނެއެވެ. އަދި އޭނާގެ ބޮލުން ގިނަ އަދަދަކަށް ލޭ ފައިބަމުންދާތަން ވެސް ސާފުކޮށް ފެނެއެވެ.
ފުލުހުން ހާމަކުރި މައުލޫމާތުގައިވާ ގޮތުން، މި ހަމަލާ ދިންކަމުގެ ތުހުމަތުގައި 15 އަހަރުގެ ކުއްޖަކު ވަނީ ހައްޔަރުކޮށްފައެވެ. މި ކުއްޖާ ހަމަލާ ދިން ސަބަބާއި މަގުސަދު ދެނެގަތުމަށް ތަހުގީގު ކުރިއަށްދާ ކަމަށާއި، ސިޔާސީ ސަބަބަކާ ގުޅިގެންތޯ ނުވަތަ އެހެން ސަބަބަކާ ގުޅިގެންތޯ ބެލުމުގެ މަސައްކަތް ކުރަމުންދާކަމަށް ސެކިއުރިޓީ ފޯސަސްއިން ބުނެފައިވެއެވެ.
މި ހާދިސާއާ ގުޅިގެން ކޮލޮމްބިއާގެ ސިޔާސީ ލީޑަރުން ވަނީ ކަންބޮޑުވުން ފާޅުކޮށް، މި ހަމަލާ ކުށްވެރިކޮށްފައެވެ. އަދި މިފަދަ ހަމަލާތަކުން ޑިމޮކްރަޓިކް ޕްރޮސެސްއަށް ނުރައްކާވާނެ ކަމަށް އިންޒާރު ދީފައިވެއެވެ.
ކޮމެންޓު ފޮނުވާ