ދިރާގު ދިވެހި ޕްރިމިއާ ލީގުގައި މާޒިޔާ އިން ދެ ގޯލުގެ ލީޑެއްގައި އޮއްވައި ދަ ގްރާންޑޭ ސްޕޯޓްސް ކްލަބުން ފަހަތުން އަރައި 2-2 އިން މެޗު އެއްވަރުކޮށްފި އެވެ.
މެޗުގެ ފުރަތަމަ ހާފުގައި މޮޅަށް ކުޅޭ މާޒިޔާ އިން ވަނީ ލަނޑު ޖަހާނެ ގިނަ ފުރުސަތުތަކެއް ތަނަވަސްކޮށްފަ އެވެ. އެޓީމުން މެޗުގައި ލީޑު ނެގި ލަނޑު 13 ވަނަ މިނެޓުގައި ކާމިޔާބުކޮށްދިނީ މޫސާ ޔާމީން އެވެ. ފުރަތަމަ ހާފުގެ ފަހުކޮޅު އެޓީމަށް ލީޑު ފުޅާކޮށްދިން ލަނޑު ލިބުނު ޕެނަލްޓީއަކުން ޖެހީ ސްޓެވާޓް އެވެ.
ދެވަނަހާފްގައި ދަ ގްރާންޑޭ އިން ވަނީ ކުޅުން ރަނގަޅުކޮށް ހަމަލާތައް ވަރުގަދަކޮށްފަ އެވެ. މެޗުގެ 62 ވަނަ މިނެޓުގައި ދަ ގްރާންޑޭގެ ފުރަތަމަ ލަނޑު ޖަހައިދިނީ އަހުމަދު އަޔާޒު އެވެ. ފަހުހާފުގެ ފަހުކޮޅު އިބްރާހީމް މަހުދީ ހުސައިން (ފޭދޫ އިއްބެ) ފޮނުވާލި ބޯޅައެއް ގޯލުގެ ދަނޑިއަށް އަމާޒުވިއިރު ކައުންޓަ އެޓޭކުގައި އެޓީމަށް އިތުރު ފުރުސަތުތައް ލިބުނެވެ. ދަ ގްރާންޑޭ އިން މެޗުގެ ނަތީޖާ ހަމަހަމަކުރީ މެޗުގެ އިތުރު ވަގުތުގަ އެވެ. އޭރިޔާ ބޭރުން ލިބުނު ޖެހުމެއްގައި ޔަސްފާދް ހަބީބް (މުލަކޭ) ޖައްސާލި ބޯޅަ ބިދޭސީ ޑިފެންޑަރު ކޮމިލޯވް އަބްދުލްރަސަލް ފޮނުވާލި ބާރު ބޯޅަ ވަނީ ގޯލުގެ މަތީ ކަނަށެވެ.
މި ނަތީޖާއާ އެކު މާޒިޔާ ވަނީ ލީގުގެ އެއް ވަނައިގައި އެއް ޕޮއިންޓުގެ ލީޑެއް ލިބިފަ އެވެ. މާޒިޔާ އަށް ހަތަރު މެޗުން އަށް ޕޮއިންޓް ލިބިފައިވާއިރު، ދެ ވަނައިގައި އޮތް ވެލެންސިއާ އަށް ތިން މެޗުން ލިބިފައިވަނީ ހަތް ޕޮއިންޓެވެ. ވެލެންސިއާ މިއަދު ހަވީރު ކުޅޭ މެޗުން އީގަލްސް އަތުން މޮޅުވެގެން އެއް ވަނައިގައި ދެ ޕޮއިންޓުގެ ލީޑެއް ނެގޭނެ އެވެ. މެޗުން ލިބުނު ލިބުނު ޕޮއިންޓާ އެކު ދަ ގްރާންޑޭ ވަނީ ހަ ޕޮއިންޓާ އެކު އަލުން ތިން ވަނަ އަށް އަރައިފަ އެވެ.
ކޮމެންޓު ފޮނުވާ