ޔަމަނުގެ ގައުމީ ޓީމަށް ކުޅެފައިވާ މިޑްފީލްޑަރު އޮސާމާ އަންބާރު ކްލަބް އީގަލްސްއާ ގުޅިއްޖެއެވެ.
އޮސާމާ ވަނީ ޔަމަން ގައުމީ ޓީމަށް ހަ މެޗު ކުޅެދީފަ އެވެ. މީގެ ހަަތަރު ވަރަކަށް އަހަރު ކުރިން ޔަމަން ޓީމަށް ކުޅުނު އޮސާމާ ވަނީ 2016 ވަނަ އަހަރު އޭޝިއަން ކަޕް ކޮލިފައިންގައި ރާއްޖެއާ ދެކޮޅަށް ޔަަމަނުގައި ކުޅުނު ލެގުގެ ސްކޮޑުގައި ހިމެނިފައެވެ. އޭނާ ޔަމަނަށް ކުޅެދިން މެޗުތަކުގެ ތެރޭގައި އުތުރު ކޮރެއާ އާއި ޕާކިސްތާން އަދި އުޒްބެކިސްތާނަށް ކުޅުނު މެޗުތައް ހިމެނެއެވެ. ކްލަބް ލެވަލްގައި އޭނާ ކުޅެފައިވަނީ ޔަމަން ޓީމުތަކަށެވެ.
އުމުރުން 25 އަހަރުގެ މިޑްފީލްޑަރު އީގަލްސްގެ ޕްރެކްޓިހުގައި ބައިވެރިވަމުން އަންނައިރު، އެ ޓީމުން ހޯމަ ދުވަހު ހަވީރު ކްލަބް ވެލެންސިއާއާ ދެކޮޅަށް ކުޅޭ މެޗުގައި އޭނާ ފެނުމުގެ ފުރުސަތު އެބައޮތެވެ. އީގަލްސް އިން މި ސީޒަނުގައި ގެނައި ފުރަތަމަ ބިދޭސީ ކުޅުންތެރިޔާ ކަމަށްވާ އެ ޓީމުގެ ގޯލުކީޕަރު މޮންޓެނެގްރޯގެ މިލާން ޔެލޮވަކް އެވެ. އެންމެ ފަހުން އީގަލްސް ކުޅުނު މެޗުގައި ދަ ގްރާންޑޭއާ 1-1 އިން އެއްވަރުވިއިރު އެނާ ވަނީ ފުރަތަމަ 11 ހިމެނިގެން ކުޅެފައެވެ.
މި ސީޒަނުގައި އީގަލްސްގެ ސްކޮޑުގައި ދެން ޖަހާފައިވަނީ ބުރްކީނާ ފާސޯގެ ޑިފެންޑަރު އިސްމާއިލް ޔަނޯގޯ އާއި މިސްރުގެ ފޯވާޑެކެވެ.
ކޮމެންޓު ފޮނުވާ