ސެލްޓާވީގޯ އަތުން މޮޅުވެ ރެއާލް ތާވަލުގެ އެއްވަނައަށް

ސްޕެނިޝް ލަލީގާގައި ރެއާލް މޮޅުވެ ތާވަލުގެ އެއްވަނައަށް ޖެހިލައިފިއެވެ.

ރެއާލް މޮޅުވީ އަމިއްލަ ދަނޑުގައި ސެލްޓާވީގޯ އަތުން 2-0 މޮޅުވެގެންނެވެ. މެޗު ފަށައިގެން ހަވަނަ މިނިޓުގައި ލޫކަސް ވަޒްކުއެޒްގެ ލަނޑުން ލީޑު ނެގިއިރު މެޑްރިޑަށް ލީޑު އިތުރަށް ފުޅާކޮއްދިނީ މާކޯ އެސެންސިއޯއެވެ. މިއީ އޭނާ މިސީޒަނުގައި މެޑްރިޑަށް ކާމިޔާބުކޮށްދިން ފުރަތަމަ ލަނޑެވެ. މިމެޗާ ކުރިމަތިލީއިރު ސެލްޓާވީގޯއިން މިދިޔަ ނޮވެންބަރު މަހު 21 ވަނަ ދުވަހު ލީގުގައި ބަލިވިފަހުން މެޗަކުން އެޓީމު ބަލިވެފަނުވެއެވެ.

މެޗުގައި ސެލްޓާއަށް ދިމާވި އެންމެ ބޮޑު މައްސަލައަކީ މި ސީޒަންގެ ލަލީގާގެ މިހާތަނަށް އެންމެ ގިނަ ލަނޑުޖެހި ކުޅުންތެރިޔާ ލަގޯ އަސްޕަސްއަށް ދެވަނަހާފްގެ ކުރީކޮޅު އަނިޔާވެގެން ބަދަލުކުރަން ޖެހެމުންނެވެ. ރޭގައި ލީގުގައި ސެވިއްޔާ އާއި ރެއާލްބެޓިސްގެ ކުރިމަތިލުން އެއްވަރުވިއިރު ވިޔަރެއާލް ވަނީ ލެންވަންތޭގެ މައްޗަށް ކުރިހޯދާފައެވެ.

ރޭގެ މޮޅާއެކު ލީގުގެ އެއްވަނައިގަ ރެއާލުން އޮތީ 17 މެޗުން 36 ޕޮއިންޓް ހޯދައިގެންނެވެ. އެއީ ދެވަނައިގަވާ އެތުލެޓިކޯ މެޑްރިޑަށްވުރެ ތިން މެޗު އިތުރަށް ކުޅެގެންނެވެ. އެތުލެޓިކޯ މެޑްރިޑް ދެވަނައިގަ އޮތީ 14 މެޗުން ހޯދި 35 ޕޮއިންޓާއެކުއެވެ. ރެއާލް ސޮސެއިޑާޑް ތިންވަނައިގަ އޮތީ 17 މެޗުން 29 ޕޮއިންޓް ހޯދައިގެންނެވެ. ހަތަރުވަނައިގާވާ ވިޔަރެއާލްއިން ވެސް ވަނީ ހަމަ މިއަދަދަށް ޕޮއިންޓް ހޯދައިފައެވެ.