ރ. ފުއްގިރި ކުއްޔަށް ދޫކުރުމުގައި ހިޔާނާތްތެރިވި ކަމަށް ބުނެ ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމްގެ މައްޗަށް ދައުލަތުން އުފުލާފައިވާ ރިޝްވަތާއި މަނީ ލޯންޑަރިންގގެ ދަޢުވާގެ އަޑުއެހުމެއް އޭޕްރީލް 28 އަށް ތާވަލުކޮށްފިއެވެ.
ކްރިމިނަލް ކޯޓުގައި މި މައްސަލައިގެ އަޑުއެހުން އެންމެ ފަހުން ބޭއްވުނީ މިދިޔަ އޯގަސްޓް މަހުއެވެ. އެއީވެސް އަހަރަކަށްވުރެ ގިނަ ދުވަހުގެ މެދުކެނޑުމަކަށްފަހުގައެވެ.
ޔާމީންގެ މައްޗަށް ވ. އާރަށް ކުއްޔަށް ދޫކުރުމުގައި ހިޔާނާތްތެރިވި ކަމަށް ތުހުމަތުކޮށް 2022 ވަނަ އަހަރު ކްރިމިނަލް ކޯޓުން 11 އަހަރުގެ ޖަލު ހުކުމެއް އިއްވާފައިވެއެވެ. އެހެންނަމަވެސް، ހައިކޯޓުން އެ މައްސަލަ ބެލުމަށްފަހު ނިންމީ ކްރިމިނަލް ކޯޓުން އެ މައްސަލަ އަލުން ބަލަންޖެހޭކަމަށެވެ.
ހައިކޯޓުން އެ މައްސަލައިގައި ކުރި ހުކުމުގެ ބައެއް ސުޕްރީމް ކޯޓުގައި އިސްތިއުނާފުކޮށްފައިވެއެވެ. ސުޕްރީމް ކޯޓުގައި އިސްތިއުނާފުކޮށްފައިވަނީ ޔާމީންގެ މައްޗަށް އުފުލާފައިވާ ހިޔާނާތުގެ ދަޢުވާތައް ސާބިތުކުރުމަށް ކްރިމިނަލް ކޯޓުގައި ދައުލަތުން ހުށަހެޅި އާ ހެކިތައް އެއްފަރާތްކުރުމަށް ހައިކޯޓުން ނިންމި ނިންމުމެވެ.
ޕީއެންސީ/ޕީޕީއެމްގެ ރިޔާސީ ޓިކެޓު އޭރު އަރުވާފައިވާ ޔާމީން 11 އަހަރަށް ޖަލަށްލުމަށާއި ފަސް މިލިއަން ޑޮލަރުން ޖޫރިމަނާކުރުމަށް ކްރިމިނަލް ކޯޓުން ހުކުމްކުރީ 2022 ވަނަ އަހަރުގެ ޑިސެމްބަރު 25 ގައެވެ. އެ ހުކުމް 2023 ވަނަ އަހަރުގެ މާރޗް މަހު އިސްތިއުނާފަށް ހުށަހެޅުނެވެ. ޝަރީޢަތް ފެށުނީ 2023 ޖޫން މަހުގައެވެ. އަދި އަޑުއެހުންތައް ނިންމާލީ 2023 ނޮވެމްބަރު 21 ގައެވެ.
ޔާމީން މިނިވަންވީ 2024 އޭޕްރީލް މަހުގައެވެ. މިދިޔަ އަހަރުގެ ރިޔާސީ އިންތިޚާބުގައި ޔާމީނަށް ވާދަނުކުރެވުނީ އިންތިޚާބުގެ ވަގުތު ޖެހުނުއިރުވެސް އޭނާގެ މައްޗަށް ކުރެވުނު ހުކުމް ދެމިއޮތުމުންނެވެ.
ޔާމީންގެ މައްޗަށް ގއ. ވޮޑަމުލާ ކުއްޔަށް ދޫކުރުމުގައި ހިނގި ކަމަށް ބުނާ ހިޔާނާތުގެ މައްސަލައިގައި ފަސް އަހަރުގެ ޖަލު ހުކުމެއް ކްރިމިނަލް ކޯޓުން އިއްވުމުން، އެ ހުކުމް ހައިކޯޓުންވެސް ދެމެހެއްޓިއެވެ. ނަމަވެސް އެ މައްސަލައިގައި ސުޕްރީމް ކޯޓުން 2021 ނޮވެމްބަރު މަހު ޔާމީނާ އެއްކޮޅަށް މައްސަލަ ނިންމިއެވެ.
ކޮމެންޓު ފޮނުވާ