ލިވަޕޫލު ޕޮއިންޓަކާއެކު އަހަރުގެ ފަހުމެޗު ނިންމާލައިފި

އިނގިރޭސި ލީގުގައި ލިވަޕޫލް އާއި ނިއުކާސަލް މެޗު އެއްވަރުވެއްޖެއެވެ.

ރަށުން ބޭރުގައި ލިވަޕޫލްއިން ކުޅުނު މި މެޗު އެއްވަރުވީ ލަނޑެއް ނުޖެހިއެވެ. މެޗުގެ ފުރަތަމަ ހާފްގައި ލިވަޕޫލްއިން ގިނައިރު ބޯޅަ ހިފަހައްޓައިގެން ކުޅުނުއިރު ލިވަޕޫލްއިން ވަނީ ހަތަރު ހަމަލާއެއް ފުރަތަމަ ހާފުގައި އުފައްދައިފައެވެ. އޭގެތެރެއިން ތިން ހަމަލާއެއް ވަނީ ނިއުކާސަލްގެ ގޯލާ އަމާޒުކޮށް ފޮނުވާލާފައެވެ.

މެޗުގައި ލިވަޕޫލްއަށް ލަނޑު ޖަހަން އެންމެ ރަނގަޅު ފުރުސަތުތަކެއް ލިބިގެން އެޓީމުގެ މިސްރު ފޯވާޑް މުހަންމަދު ސަލާހަށެވެ. މެޗުގެ ފުރަތަމަ ހާފްގައި ސަލާހް އަށް ލިބުނު ރަނގަޅު ދެ ފުރުސަތު ނަގާލިއިރު މެޗު ނިމެން 10 މިނިޓަށް ވެފައިވަނިކޮށް ލިވަޕޫލްގެ ސަޑިއޯ މާނޭ ލިބުނު ފުރުސަތުވެސް ވަނީ ބޭނުން ކުރެވޭ ގޮތްނުވެފައެވެ. މިއީ މި ސީޒަންގައި ލިވަޕޫލްއިން ލަނޑެއް ނުޖެހި ނިންމާލި ފުރަތަމަ މެޗުވެ. މިއީ 74 މެޗަށްފަހު ލަނޑެއް ނުޖެހި މި ދެޓީމު އެއްވަރުވި ފުރަތަމަ ފަހަރެވެ.

މިއީ 2017 ވަނައަހަރު ފަހުން ލިވަޕޫލް އަތުން ނިއުކާސަލްއިން ހޯދި ފުރަތަމަ ޕޮއިންޓެވެ. މި ނަތީޖާއެކު ލީގުގެ ކުރީގައި ފަސްޕޮއިންޓަށް ފުޅާކުރަން ލިބުނު ފުރުސަތު ލިވަޕޫލްއިން ނަގާލިއިރު އަހަރު ނިންމާލީ ލިވަޕޫލްއިން ލީގުގަ ކުރީގަ އޮވެގެންނެވެ. މި އަހަރު ލިވަޕޫލްއިން ނިންމާލީ 77 ޕޮއިންޓާއިކުއެވެ. ވޭތުވެދިޔަ ދެއަހަރު ވެސް ލިވަޕޫލްއިން ނިންމާލީ އެންމެ ގިނަ ޕޮއިންޓު ހޯދީ ޓީމެއްގެ ގޮތުގައިއެވެ.

ލިވަޕޫލް އެއްވަނައިގަ އޮތީ 16 މެޗުން 33 ޕޮއިންޓްހޯދައިގެންނެވެ. ދެވަނާގައި ތިން ޕޮއިންޓް މަދުން ހޯދައިގެން މެންޗެސްޓަރ ޔުނައިޓެޑު އޮތީ 15 މެޗު ކުޅެގެންނެވެ. ތިންވަނައިގަ ލެސްޓާ ސިޓީ އޮތީ 16 މެޗުން 29 ޕޮއިންޓް ހޯދައިގެންނެވެ. އެވަޓަން ހަތަރުވަނާއިގަ އޮތީ 15 މެޗުން 29 ޕޮއިންޓް ހޯދައިގެންނެވެ.