ކުރީގެ ޓޫރިޒަމް މިނިސްޓަރު އިބްރާހީމް ފައިސަލް، މިނިސްޓަރުކަމުގެ މަޤާމުގައި ހުންނެވިއިރު އެ މަޤާމުގެ މަސްއޫލިއްޔަތު އަދާކުރެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ފަރާތްޕުޅުން ލިބިވަޑައިގަތް އެއްބާރުލެއްވުމަށް ޝުކުރު އަދާކުރައްވައިފިއެވެ.
ރައްޔިތުންގެ މަޖިލީހުގެ ރައީސް މުޙައްމަދު ނަޝީދުގެ ދަރިކަލުން ފައިސަލް، މިނިސްޓަރުކަމުގެ މަޤާމުން ވަކިކުރެއްވީ މިދިޔަ އަންގާރަ ދުވަހުއެވެ. މަޤާމުން ވަކިކުރެއްވި ސަބަބު ސަރުކާރުން ހާމަކުރައްވާފައެއް ނުވެއެވެ. ނަމަވެސް ބައެއް މަސްދަރުތަކުން ބުނާ ގޮތުގައި ރައީސް މުޢިއްޒާއި މަޖިލިސް ރައީސް އަބްދުއްރަޙީމްއާ ދެމެދު އޮތް ގުޅުން ވަރަށް ބޮޑަށް ހީނަރުވެފައިވާ ކަމަށާއި، ފައިސަލް ވަކިކުރެއްވީ މިފަދا ސަބަބުތަކާ ހުރެ ކަމަށް ބެލެވެއެވެ.
މަޤާމުން ވަކިކުރެއްވި ތާ ދެ ދުވަސް ފަހުން މިއަދު ނެރުއްވި ބަޔާނެއްގައި ފައިސަލް ވިދާޅުވެފައިވަނީ، ޓޫރިޒަމް މިނިސްޓަރުކަމުގެ މަޤާމަށް ރައީސް މުޢިއްޒު އޭނާ ޢައްޔަންކުރެއްވުމަކީ އޭނާއަށް ލިބިވަޑައިގެންނެވި މަތިވެރި އުފަލަކާއި ޝަރަފެއް ކަމަށެވެ. އަދި އެ ފުރުޞަތު ދެއްވުމަކީ އަބަދުވެސް ފަޚުރުވެރިވާނެ ކަމެއް ކަމުގައި ވިދާޅުވިއެވެ.
ފައިސަލްގެ ބަޔާނުގައި ވިދާޅުވެފައިވަނީ، އޭނާއާ ޙަވާލުކުރެއްވި މަސައްކަތް އަދާކޮށްފައިވާނީ ޝައުޤުވެރިކަމާއި އިޚްލާޞްތެރިކަމާއި ތެދުވެރިކަމާއެކު ކަމަށެވެ. އަދި އޭނާގެ ޤާބިލިއްޔަތު ތަންދިން އެންމެ މަތީ ދަރަޖައިގައި ވަރުބަލިނުވެ މަޤާމުގެ މަސްއޫލިއްޔަތު އަދާކުރައްވާފައިވާނެ ކަމަށްވެސް ވިދާޅުވިއެވެ.
ޓޫރިޒަމްގެ އަމާޒުތަކަށް ވާޞިލުވުމަށް މަސައްކަތްކުރައްވާފައިވަނީ ދިވެހި ރައްޔިތުންނާ ގާތުން އަދި ބަދަލުވަމުންދާ ދުނިޔޭގެ ފަތުރުވެރިކަމަށް ރިޢާޔަތްކޮށްގެން ކަމަށްވެސް ފައިސަލް ފާހަގަކުރެއްވިއެވެ. އަދި ދިވެހި ސަރުކާރާއެކު ޚިދުމަތްކުރެއްވިއިރު، ރައީސުލްޖުމްހޫރިއްޔާ އާއި ވަޒީރުންގެ މަޖިލީހާއި ޓޫރިޒަމް މިނިސްޓްރީގެ ސިޔާސީ އަދި ސިވިލް ސަރވިސް މުވައްޒަފުންގެ ފަރާތުން ވަރަށް ބޮޑު އެއްބާރުލުމެއް ލިބިވަޑައިގެންނެވި ކަމަށް ވިދާޅުވެ، އެ ހުރިހާ ފަރާތްތަކަށް ޝުކުރު އަދާކުރެއްވިއެވެ.
ދިވެހިރާއްޖޭގެ ފަތުރުވެރިކަން އިތުރު ހަރުފަތަކަށް ގެންދިއުމަށް މިހާރު އަޅަންޖެހޭ އެންމެ މުހިންމު ފިޔަވަޅަކީ، ޒުވާނުންނަށް ފަހި ފުރުޞަތުތައް ހޯދައިދީ، އިންވެސްޓްކޮށް، އެ ދާއިރާގައި ޒުވާނުންގެ ބައިވެރިވުން އިތުރުކޮށް، ދިވެހި ޓޫރިޒަމް ދިވެހިންގެ އަތްމައްޗަށް ގެނައުން ކަމަށާއި، އިތުރު އެނދުތައް ތަރައްޤީކުރުމަށް ބޭނުންވާ ފަންޑު ހޯދައިދިނުމާއެކު ޒުވާނުންނަށް ފަސޭހަ މާޙައުލެއް އުފެއްދުން ކަމަށް ވިދާޅުވިއެވެ.
ފައިސަލްގެ ބަޔާން ނިންމަވާލެއްވީ، ޤައުމާއި ރައްޔިތުންނަށް ޚިދުމަތްކުރުމުގެ ފުރުޞަތު ލިބުމަކީ އަބަދުވެސް ދެކެވަޑައިގަންނަވަމުން ދިޔا ހުވަފެނެއް ކަމަށާއި، އެއީ ލިބިވަޑައިގެންނެވި ވަރަށް ބޮޑު އުފަލެއް ކަމުގައި ވިދާޅުވަމުންނެވެ.
