ދިވެހިބަހާއި އަދަބިއްޔާތުގެ ދާއިރާއަށް އަގުހުރި އެތައް ޚިދުމަތްތަކެއް ކުރައްވާފައިވާ ނިޝާން އިއްޒުއްދީންގެ އިއްޒަތުގެ ވެރިޔާ އަބްދުﷲ ސާދިގު (ސޯދުބެ) އަށް މިއަދު އުމުރުފުޅުން 90 އަހަރު ފުރިވަޑައިގެންފިއެވެ.
1935 ވަނަ އަހަރުގެ ޖެނުއަރީ 11 ވަނަ ދުވަހު މުލަކަތޮޅު މުލީގައި އުފަންވެވަޑައިގެން، އުމުރުފުޅުން 9 އަހަރުގައި މާލެ ވަޑައިގެން ތަޢުލީމު ޙާޞިލުކުރެއްވުމަށްފަހު، ދިވެހިބަހާއި އަދަބިއްޔާތުގެ ދާއިރާއަށް ގިނަގުނަ ޚިދުމަތްތަކެއް ކުރައްވާފައިވެއެވެ. މީގެ ތެރޭގައި "ބަހުގެ ހަމައިގެ އަތްމަތީ ފޮތް"، "ބަސްމަގު ފަށާ ފޮތް" އަދި "ދިވެހި ސިޓީ" ފަދަ މުހިންމު ފޮތްތައް ލިޔުއްވުން ހިމެނެއެވެ.
ސޯދުބެގެ ފާހަގަކޮށްލެވޭ އެންމެ ބޮޑު އެއް ޚިދުމަތަކީ ދިވެހިބަސް ކިޔަވައިދެއްވުމުގެ ދާއިރާއަށް ކުރައްވާފައިވާ މަސައްކަތްތަކެވެ. މާލޭގެ ގިނަ މަދަރުސާތަކެއްގައި ކިޔަވައިދެއްވުމުގެ އިތުރުން، އަމިއްލަފުޅަށް "އެލްޕާސޯ ކުލާސް" ގެ ނަމުގައި ޓިއުޝަން ކުލާސްތަކެއް ހިންގަވާފައިވެއެވެ. މި ކުލާސްތައް ފަހުން ވެގެންދިޔައީ މުޅި ރާއްޖެއަށް މަޝްހޫރުވެފައިވާ "ސޯދުބޭގެ ޓިއުޝަން ސެންޓަރު" އަށެވެ.
ސޯދުބެގެ އަގުހުރި ޚިދުމަތްތަކަށް ދިވެހި ދައުލަތުން ވަނީ އެކި ދުވަސްވަރު އެކި އިނާމުތައް އަރުވާފައެވެ. މީގެ ތެރޭގައި އާންމު ޚިދުމަތުގެ ހިތްވަރު ދިނުމުގެ އިނާމާއި، މިނިވަން 25 ގެ އާންމު ޚިދުމަތުގެ އިނާމު އަދި 2019 ވަނަ އަހަރު ދެއްވި ނިޝާން އިއްޒުއްދީންގެ އިއްޒަތުގެ ވެރިކަމުގެ ލަގަބު ހިމެނެއެވެ.
