ރަށްރަށުގައި ކަރަންޓް ބިލުގައި، ކުނި ނެގުމުގެ ބިލުގެ ފީ ހިމަނަން ވޭސްޓް މެނޭޖްމަންޓް ކޯޕަރޭޝަން (ވެމްކޯ) އިން ނިންމި ނިންމުން އަނބުރާ ގެންގޮސްފި އެވެ.
ވެމްކޯ އިން ބުނީ މި މަހުން ފެށިގެން ވެމްކޯ އިން އަތޮޅުތެރޭ ރަށްރަށުގައި ފޯރުކޮށްދޭ ގޭބިސީތަކުން ކުނި ނަގައިދިނުމުގެ ހިދުމަތުގެ ބިލު ޔޫޓިލިޓީ އެހެން ހިދުމަތެއްގެ ބިލުގައި ހިމެނުމަށް ނިންމި ނިންމުން ރައީސް ޑރ. މުހައްމަދު މުއިއްޒުގެ ލަފާފުޅުގެ މަތިން ބާތިލުކޮށްފައިވާ ކަމަށެވެ.
"2025 ޖަނަވަރީ އިން ފެށިގެން ވެމްކޯއިން އަތޮޅު ތެރޭގައި ފޯރުކޮށްދޭ ގޭބިސީ ތަކުން ކުނި ނަގައިދިނުމުގެ ހިދުމަތުގެ ބިލް ޔުޓިލިޓީ އެހެން ހިދުމަތެއްގެ ބިލުގައި ހިމެނުމަށް ނިންމި ނިންމުން ދިވެހިރާއްޖޭގެ އިއްޒަތްތެރި ރައީސް ޑރ. މުހައްމަދު މުއިއްޒުގެ ލަފާ ފުޅުގެ މަތިން ބާތިލް ކުރެވިފައިވާ ވާހަކަ ދަންނަވަމެވެ" ވެމްކޯ އިން ނެރުނު އިއުލާނެއްގައި ބުނެފައިވެ އެވެ.
އެކުންފުނިން ބުނީ، އެ ބަދަލާއެކު ރަށްރަށުގައި ވެމްކޯގެ ހިދުމަތް ފޯރުކޮށްދޭނީ އަދި ބިލު ކުރެވޭނީ ހަމައެކަނި ރަޖިސްޓްރީ ކޮށްފައިވާ ފަރާތްތަކަށް އެކަނި ކަމަށް އެ ކުންފުނިން ބުންޏެވެ.
އޭގެ އިތުރުން ބިލަށް ފައިސާ ދެއްކުމުގެ ކަންކަން އެ ރަށްރަށުގައި ގާއިމް ކޮށްފައިވާ ވެމްކޯގެ އޮފީސްތަކުންނާއި ވެމްކޯގެ "އަވަސް ޕޭ" ޕޯޓަލް މެދުވެރިކޮށް ކުރެވޭނެ ކަމަށް އެ ކުންފުނިން ބުންޏެވެ.
